༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༤ སྟེ་དྷམྨ་ཅཀྲ་པྲབརྟན་དི་བས་ཐེངས་ ༦༧ དང་སྟབས་བསྟུན་འཕགས་བོད་འབྲེལ་མཐུད་ལས་ཁུངས་དང་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མ། རྒྱལ་ཡོངས་བོད་རང་དབང་འགུལ་ཚོགས་པ་མཉམ་སྦྲེལ་གྱིས་མཧཱ་རཱཥཊྲའི་ནག་པུར་དུ་བོད་དོན་གོ་རྟོགས་ཀྱི་ལས་འགུལ་སྤེལ་ཡོད་པ་རེད།
དེ་ཡང་དྷམྨ་ཅཀྲ་པྲབརྟན་དི་བས་ནི་རྒྱ་གར་གྱི་གསར་བརྗེ་བ་དང་། རྒྱ་གར་གྱི་རྩ་ཁྲིམས་འཆར་འགོད་པ་ཨཱམྦེཊ་ཀར་མཆོག་ནང་པར་སྒྱུར་བའི་དུས་དྲན་ཡིན་པ་དང་། ཉིན་དེར་ཨཱམྦེཊ་ཀར་གྱི་རྗེས་འཇུག་ནང་པ་དུ་མ་ལྷན་འཛོམས་ཀྱིས་དུས་དྲུན་སྲུང་བརྩི་ཞུ་སྲོལ་ཡོད། དུས་དྲན་དེ་དང་སྟབས་བསྟུན་ནས་འཕགས་བོད་འབྲེལ་མཐུད་ལས་ཁུངས་དང་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མ། རྒྱལ་ཡོངས་བོད་རང་དབང་འགུལ་ཚོགས་པ་མཉམ་སྦྲེལ་གྱིས་བོད་དོན་གོ་རྟོགས་ཀྱི་ལས་འགུལ་ཞིག་སྤེལ་ཞིང་། སྐབས་དེར་འབུམ་རམས་པ་ཨཱམྦེཊ་ཀར་གྱིས་བོད་དོན་དང་འབྲེལ་ཏེ། ཕྱི་ལོ ༡༩༤༩ ལོར་རྒྱ་གར་གཞུང་གིས་རྒྱ་ནག་ངོས་འཛིན་བྱ་རྒྱུའི་ཚབ་ཏུ་བོད་ལ་ངོས་འཛིན་གནང་ཡོད་ན། རྒྱ་དཀར་ནག་གི་ས་མཚམས་དཀའ་རྙོག་མི་ཡོང་། ཞེས་གསུངས་པ་གསལ་སྟོན་གྱིས་རྒྱ་གར་མི་མང་ལ་བོད་དོན་གལ་གནད་ཆེ་ཚུལ་གྱི་གོ་རྟོགས་སྤེལ་ཡོད།
སྐབས་དེར་འཕགས་བོད་འབྲེལ་མཐུད་ལས་ཁུངས་ཀྱི་བཀྲ་ཤིས་བདེ་སྐྱིད་ལགས་ནས་གསར་འགོད་པ་རྣམས་ལ་བོད་ནང་གི་ཛ་དྲག་གནས་སྟངས་དང་། ལོ་རྒྱུས་རང་བཞིན་ལྡན་པའི་འཕགས་བོད་ཀྱི་འབྲེལ་ལམ། བོད་མིའི་འཐབ་རྩོད་ཀྱི་རང་བཞིན་དེ་འཚེ་བ་མེད་པ་ཡིན་པ། བོད་དེ་ས་ཁམས་ཆབ་སྲིད་ལ་གལ་གནད་ཆེ་ཚུལ་སོགས་ཀྱི་སྐོར་ངོ་སྤྲོད་གནང་ཡོད་པ་དང། དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ནུབ་ཕྱོགས་ས་གནས་ཀྱི་ཟུང་སྦྲེལ་འབྲེལ་མཐུད་པ་སྐུ་ཞབས་ཨར་བིན་ནི་ཀོ་སི་ལགས་ནས་མི་ཚོགས་འཛོམས་སའི་དུས་སྟོན་སྐབས་སུ་བོད་དོན་དྲིལ་བསྒྲགས་གནང་རྒྱུའི་གལ་གནད་དང་། ད་ལྟའང་རྒྱ་གར་མང་ཚོགས་ཁྲོད་བོད་དོན་སྐོར་གོ་རྟོགས་ཞན་པོ་ཡོད་ཚུལ་ངོ་སྤྲོད་དང་འབྲེལ་རྒྱ་གར་ནང་བོད་དོན་དྲིལ་བསྒྲགས་གནང་རྒྱུ་གལ་ཆེན་པོ་ཡིན་ལ་གསལ་སྟོན་གནང་ཡོད།
ཉིན་གྲངས་གཅིག་གི་བོད་དོན་གོ་རྟོགས་ལས་འགུལ་བརྒྱུད་ས་གནས་རྒྱ་གར་མང་ཚོགས་ཁྲོད་བོད་ཀྱི་རང་དབང་འཐབ་རྩོད་དང་། རྒྱ་གར་ལ་བོད་དོན་གལ་གནད་ཆེ་ཚུལ་སོགས་ཀྱི་སྐོར་གོ་རྟོགས་གང་ལེགས་སྤེལ་ཐུབ་པ་བྱུང་ཡོད་པ་བཅས།། 
