༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༣ ཉིན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མ་དང་། འཕགས་བོད་འབྲེལ་མཐུད་ལས་ཁུངས་གཉིས་ཟུང་འབྲེལ་ཐོག་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པའི་གྲོས་ཆོད་དགོངས་དོན་མཇུག་སྐྱོང་གནང་ཕྱོགས་དང་འབྲེལ་ཏེ་རྒྱ་གར་མཧཱ་རཱཥཊྲ་མངའ་སྡེའི་ནག་པུར་ཁུལ་གྱི་བོད་དོན་རྒྱབ་སྐྱོར་ཚོགས་པ་ལྷན་འཛོམས་ཀྱི་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་ཚོགས་འདུའི་ཐོག་ནག་པུར་ཁུལ་དུ་ཡོད་པའི་རྒྱ་གར་བོད་དོན་རྒྱབ་སྐྱོར་ཚོགས་པ་ཁག་གི་ཚོགས་མི་འཐུས་ཚབ་ ༣༠ ལྷག་མཉམ་ཞུགས་གནང་ཡོད་པ་མ་ཟད། བན་ད་ར་ནོར་རྒྱས་གླིང་གི་ས་གནས་འགོ་འཛིན་དང་། ས་གནས་བོད་ཀྱི་གཞོན་ནུ་ལྷན་ཚོགས། ས་གནས་བོད་ཀྱི་བུད་མེད་ལྷན་ཚོགས་ལའང་མགྲོན་འབོད་གནང་ཡོད། སྐབས་དེར་འཕགས་བོད་འབྲེལ་མཐུད་ལས་ཁུངས་ཀྱི་འཐུས་ཚབ་བཀྲ་ཤིས་བདེ་སྐྱིད་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་དང་འབྲེལ། བོད་ནང་གི་ཛ་དྲག་གནས་སྟངས་དང་། བོད་མིའི་རང་དབང་འཐབ་རྩོད་ལས་འགུལ་ཀྱི་གནས་བབ། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པའི་བསྒྲགས་གཏམ་དང་ལག་བསྟར་འཆར་གཞི་ཁག་སྙན་སྒྲོན་ཞུས་ཏེ་ཚོགས་མི་རྣམས་ནས་དེ་ལྟར་ལག་བསྟར་མཇུག་སྐྱོང་གནང་སྐྱོང་ཡོང་བའི་རེ་སྐུལ་ཞུས་ཡོད་པ་རེད།
དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཨ་ཤོཀ་མེན་ཊ་ལགས་དང་། མཧཱ་རཱཥཊྲ་མངའ་སྡེའི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་མྲཏ་བནྶོཊ་ལགས་ནས་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གཞུང་ནས་བྷ་རཏ་རཏྣ་ཕུལ་དགོས་པའི་ཞུ་འབོད་དང་སྦྲགས། བོད་ཀྱི་ཁོར་ཡུག་སྲུང་སྐྱོབ་བྱ་རྒྱུའི་གལ་གནད་དང་། རྒྱ་གར་མང་ཚོགས་ཁྲོད་བོད་དོན་གོ་རྟོགས་སྤེལ་རྒྱུ་གལ་ཆེན་པོ་ཡིན་སྐོར་སོགས་གསུངས་ཡོད།
ཚོགས་འདུའི་ཐོག་རྒྱ་གར་བོད་དོན་རྒྱབ་སྐྱོར་ཚོགས་པ་རྣམས་ཀྱི་འདས་པའི་ཟླ་བ་འགའ་ཤས་ཀྱི་ལས་དོན་ཁག་ལ་བསྐྱར་ཞིབ་དང་། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པའི་གྲོས་ཆོད་དགོངས་དོན་མ་འོངས་ལས་འཆར་སྤེལ་ཕྱོགས་ཇི་དགེའི་ཐད་གྲོས་བསྡུར་གནང་ཞིང་། སྐབས་དེར་ཚོགས་བཅར་བ་རྣམས་ནས་བོད་དོན་ལས་འགུལ་སྲ་བརྟན་གཏོང་ཕྱོགས་དང་བོད་དོན་རྒྱབ་སྐྱོར་བ་ཕན་ཚུན་འབྲེལ་ལམ་གོང་མཐོར་གཏོང་ཕྱོགས་སྐོར་བསམ་ཚུལ་བརྗེ་ལེན་ལྷུག་པོ་གནང་ཡོད་པ་བཅས།།
