༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་མེཀ་སི་ཀོའི་གྲོས་ཚོགས་ཀྱི་ཚོགས་གཞོན་ཀར་ལ་ཨལ་མ་ཛན་ (Karla Almazán) མཆོག་གཙོ་བཞུགས་ཐོག་གྲོས་ཚོགས་སུ་ཕེབས་བསུ་ཆེ་བསྟོད་ཞུས་ཡོད་པ་རེད།

ཐེངས་འདིར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་འཛམ་བུ་གླིང་ནང་གི་གྲོས་ཚོགས་འཐུས་མིའི་གྲངས་མང་ཤོས་ (༥༠༠) ཡོད་པའི་གྲོས་ཚོགས་སུ་དགའ་བསུ་དང་ཆེ་བསྟོད་གནང་བ་ནི་བོད་དོན་འཐབ་རྩོད་དང་བོད་མིར་རྒྱབ་སྐྱོར་ཚད་མཐོ་པོ་ཡོད་པ་མཚོན་པ་མ་ཟད། བོད་ནང་གི་བོད་མི་རྣམས་ནས་ལོ་ངོ་བཅུ་ཕྲག་དྲུག་ལྷག་རྒྱ་གཞུང་གི་སྡུག་རྩུབ་མནར་གཅོད་འོག་སྡུག་སྦྱོང་མྱངས་བ་ལའང་གདུང་སེམས་མཉམ་སྐྱེའི་རྣམ་པ་གསལ་པོ་བསྟན་ཡོད།

དེ་ཡང་མེཀ་སི་ཀོའོ་གྲོས་ཚོགས་སུ་གྲོས་ཚོགས་འཐུས་མི་སལ་ཝ་ཊོར་ཀ་རོ་ (Salvador Caro) ལགས་སྐུ་བཞེངས་ཐོག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ངོ་སྤྲོད་དང་འབྲེལ། མེཀ་སི་ཀོར་ཆེས་ཐོག་མར་ཕེབས་པར་དགའ་བསུ་ཞུས་ཐོག་མེཀ་སོ་ཀོ་ནང་གི་བོད་དོན་རྒྱབ་སྐྱོར་བ་ཡོངས་ཀྱི་ཚབ་ཞུས་ཏེ་བོད་དོན་འཐབ་རྩོད་དང་བོད་མིར་རྒྱབ་སྐྱོར་ཚད་མཐོ་ཞུས་ཡོད། དཔལ་ལྡན་སྲིད་སྐྱོང་མཆོག་གྲོས་ཚོགས་སུ་མ་ཕེབས་སྔོན་ཙམ་ལ་ཚོགས་གཙོ་གཞོན་པའི་སྐུ་ཚབ་ཇོ་ཧ་ན་ཨེ་ལེ་ཇན་དྲ་ཀྲོ་རི་སི་ (Joanna Alejandra Felipe Torres) མཆོག་གིས་མེཀ་སི་ཀོའི་གྲོས་ཚོགས་ཀྱིས་ཚབ་ཞུས་ཏེ་གྲོས་ཚོགས་ངོས་ནས་བོད་དོན་ལ་རྒྱབ་སྐྱོར་སྲ་བརྟན་གཏང་རྒྱུའི་གཞུང་འབྲེལ་གསལ་བསྒྲགས་ཡོངས་ཁྱབ་གནང་ཡོད།

གཞུང་འབྲེལ་གསལ་བསྒྲགས་ཡོངས་ཁྱབ་གནང་སྐབས་ཚོགས་གཙོ་གཞོན་པའི་སྐུ་ཚབ་ཇོ་ཧ་ན་ཨེ་ལེ་ཇན་དྲ་ཀྲོ་རི་སི་མཆོག་གིས་མེཀ་སི་ཀོ་གྲོས་ཚོགས་ངོས་ནས་བོད་མིའི་ཆོས་དང་རིག་གཞུང་། རང་དབང་སྲུང་སྐྱོབ་དང་། བོད་ཕྲུག་རྣམས་ཀྱིས་རང་གི་སྐད་ཡིག་སྦྱོང་སྤྱོད་སྤེལ་གསུམ་བྱེད་པར་ཞུ་གཏུག་གནང་རྒྱུའི་ནན་བརྗོད་གནང་བ་མ་ཟད། ཁོང་གིས་བོད་ནང་གི་བོད་མི་རྣམས་ཀྱི་དཀའ་སྡུག་ལ་གདུང་སེམས་མཉམ་སྐྱེ་དང་འབྲེལ་མེཀ་སི་ཀོ་གྲོས་ཚོགས་ནས་བོད་མིའི་མངོན་འདོད་གྲུབ་ཆེད་རྒྱབ་སྐྱོར་ཆ་ཚང་གནང་རྒྱུའི་ཞལ་བཞེས་གནང་ཡོད་པ་རེད། དེ་བཞིན་གྲོས་ཚོགས་ཀྱི་འཐུས་མི་ཅབ་མན་མོ་རི་ནོ་ (Chapman Moreno) ལགས་ཀྱིས་དཔལ་ལྡན་སྲིད་སྐྱོང་མཆོག་མེཀ་སི་ཀོར་གཞུང་འབྲེལ་ཕྱོགས་ཕེབས་གནང་བར་བསྔགས་བརྗོད་དང་སྦྲགས། ཕྱོགས་ཕེབས་འདི་ལ་བརྟེན་ནས་རྒྱལ་སྤྱིའི་སྟེང་བོད་དོན་ལ་རྒྱབ་སྐྱོར་སྔར་ལྷག་ཚད་མཐོར་འགྲོ་བའི་རེ་བ་ཡོད་ཅེས་གསུངས་རྗེས་གྲོས་ཚོགས་འཐུས་མི་ཨིལ་ཝི་ཡ་ཡོ་ལན་ཊ་(Elvia Yolanda Martinez Cosio) ལགས། མ་རི་ཡ་ཨི་ལི་ན་ལི་མོན་གྷར་སི་ཡ་ (Maria Elena Limon Garcia) ལགས། ཇུ་ལི་ཊ་མེ་ཇེ་ཡ་ (Julieta Mejía Ibáñez) ལགས། རོ་ས་མ་རི་ཧ་ (Rosa Maria Gonzalez Azcarrag) ལགས། ཀོ་རི་ན་ཝི་ལི་གྷ་སི་ (Corina Villegas) ལགས་ནས་བོད་དོན་ལ་རྒྱབ་སྐྱོར་གནང་རྒྱུའི་ཞལ་བཞེས་དང་འབྲེལ་གཞན་རྣམས་ཀྱང་དེ་ལྟར་དྲང་བདེན་ལ་རྒྱབ་སྐྱོར་གནང་དགོས་པའི་རེ་སྐུལ་གནང་ཡོད།

དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གྲོས་ཚོགས་འཐུས་མི་རྣམས་གསུང་བཤད་གནང་སྐབས་མེཀ་སི་ཀོ་གྲོས་ཚོགས་ངོས་ནས་བོད་དོན་ལ་རྒྱབ་སྐྱོར་ཡུན་རིང་གནང་ཐབས་སུ་གྲོས་ཚོགས་འཐུས་མིའི་ཚོགས་པ་དེ་བཞིན་སྒྲིག་འཛུགས་ལྡན་པའི་ཚོགས་པ་ཞིག་ཏུ་བསྒྱུར་ཐབས་གནང་དགོས་པ་དང་། མེཀ་སི་ཀོས་དབུ་ཁྲིད་དེ་དབུས་ཨ་མི་རི་ཀའི་ཁུལ་དུ་བོད་དོན་གོ་རྟོགས་དང་རྒྱབ་སྐྱོར་འཚོལ་ཐབས་གནང་གལ་ཆེ་བའི་སྐོར་གསུངས། དེ་བཞིན་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་ཨ་མི་རི་ཀ་དང་ལྷག་པར་དུ་མེཀ་སི་ཀོར་ཐེངས་བཞི་ཆིབས་སྒྱུར་བཀའ་དྲིན་བསྐྱངས་པ་བརྒྱུད་བོད་དང་དབུས་ཨ་མི་རི་ཀའི་བར་འབྲེལ་བ་གྲུབ་པའི་རིམ་པ་ངོ་སྤྲོད་གནང་བ་མ་ཟད། མེཀ་སི་ཀོའི་གྲོས་ཚོགས་ཀྱི་ཚོགས་གཞོན་གཙོས་པའི་གྲོས་ཚོགས་འཐུས་མི་རྣམས་ནས་ནས་བོད་དོན་ལ་རྒྱབ་སྐྱོར་ཚད་མཐོ་གནང་དང་གནང་བཞིན་པར་ཐུགས་རྗེ་ལེགས་འབུལ་ཞུས་ཡོད་པ་བཅས།།