༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༥ ཉིན་འཕགས་བོད་འབྲེལ་མཐུད་ལས་ཁུངས་དང་བྷན་ད་ར་ཧིན་བོད་མཛའ་འབྲེལ་ཚོགས་པ་ཟུང་སྦྲེལ་གྱིས་བྷན་ད་རར་རྟེན་གཞི་བྱས་པའི་མ་ཧིནྡྲ་ཚན་རིག་མཐོ་སློབ་ཏུ་བོད་དོན་གོ་རྟོགས་ཀྱི་ལས་འགུལ་སྤེལ་ཡོད་པ་རེད།
དེ་ཡང་བོད་དོན་གོ་རྟོགས་ཀྱི་གཏམ་བཤད་ལས་རིམ་ཐོག་སྐུ་མགྲོན་གཙོ་བོ་མ་ར་ཊིའི་སྙན་ངག་པ་དང་རྩོམ་པ་པོ་གྲགས་ཅན་པྲ་མོཏ་ཀུ་མཱར་ལགས་དང་། ཆེ་བསྟོད་སྐུ་མགྲོན་བྷན་ད་ར་གྲོང་སྡེ་མཐུན་ཚོགས་ཀྱི་ཚོགས་གཙོ་ཟུར་པ་མ་ཧིནྡྲ་གྷཊ་ཀ་རི་ལགས། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ནུབ་ཕྱོགས་མངའ་ཁུལ་གྱི་ཟུང་སྦྲེལ་འབྲེལ་མཐུད་པ་ཨར་བིན་ནི་ཀོ་སི་ལགས། མཧཱ་རཱཥཊྲ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨམ་རུཏ་བན་སོཊ་ལགས། ནག་པུར་ཧིན་བོད་མཛའ་འབྲེལ་ཚོགས་པའི་ས་ཅིན་གྷ་བ་ནི་ལགས། མཐོ་སློབ་ཀྱི་སློབ་སྤྱི་མོ་རེཤ་བར་གྷི་དམ་ལགས། འཕགས་བོད་འབྲེལ་མཐུད་ལས་ཁུངས་ཀྱི་བཀྲ་ཤིས་བདེ་སྐྱིད་ལགས་དང་ཆོས་ཉིད་ཚེ་རིང་ལགས། མཐོ་སློབ་ཀྱི་དགེ་ལས་སློབ་གཉེར་བ་སོགས་མཉམ་ཞུགས་གནང་ཡོད།
སྐབས་དེར་འཕགས་བོད་འབྲེལ་མཐུད་ལས་ཁུངས་ཀྱི་བཀྲ་ཤིས་བདེ་སྐྱིད་ལགས་ཀྱིས་རྒྱ་གར་ནང་དུ་བོད་དོན་གོ་རྟོགས་ལས་འགུལ་སྤེལ་དགོས་པའི་དམིགས་ཡུལ་དང་། རྒྱ་གར་དང་བོད་བར་གྱི་ལོ་རྒྱུས་རང་བཞིན་ལྡན་པའི་འབྲེལ་ལམ་སྐོར། དེ་བཞིན་བོད་ནང་གི་ཛ་དྲག་གནས་སྟངས་མཚོན་པའི་བོད་མིའི་རང་དབང་འཐབ་རྩོད་སྐོར་ངོ་སྤྲོད་གནང་། གཞན་ཡང་མཛད་སྒོའི་ཐོག་སྐུ་ཞབས་ཨམ་རུཊ་བྷན་སོཊ་ལགས་དང་། ས་ཅིན་གྷ་བ་ནི་ལགས། མ་ཧིནྡྲ་གྷཊ་ཀ་རི། པྲ་མོཊ་ཀུ་མཱར། ཨར་བིན་ནི་ཀོ་སི་ལགས་ནས་རྒྱ་གར་མང་ཚོགས་ཁྲོད་བོད་དོན་གོ་རྟོགས་སྤེལ་དགོས་པའི་གལ་གནད་དང་། བོད་དང་རྒྱ་གར་བར་གྱི་འབྲེལ་ལམ། རྒྱ་གར་གྱི་བདེ་འཇགས་ཆེད་བོད་གལ་ཆེ་ཚུལ་སོགས་ཀྱི་སྐོར་འགྲེལ་བརྗོད་གནང་ཡོད་པ་བཅས།། 
