༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༠༦ ཉིན་བོད་མིའི་སྒྲིག་འཛུགས་ཀྱི་གཞུང་འབྲེལ་སྐུ་མགྲོན་ཨོསྟྲེ་ཡ་དང་འཇར་མ་ནཱིའི་གྲོས་ཚོགས་འཐུས་མི་རྣམ་པས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་གསར་འགོད་གསལ་བསྒྲགས་བསྐྱངས་ཏེ་བོད་མིའི་རང་དབང་འཐབ་རྩོད་དང་ཆོས་རིག་རྒྱུན་འཛིན་ཐོག་རྒྱབ་སྐྱོར་གནང་རྒྱུའི་ནན་བརྗོད་གནང་ཡོད།
དེ་ཡང་གསར་འགོད་གསལ་བསྒྲགས་ཐོག་ཨོསྟྲི་ཡཱའི་གྲོས་ཚོགས་འཐུས་མི་ཡན་ནིག་ཤེ་ཊི་ (Yannick Shetty) ལགས་དང་། ཊོ་ལོ་རེ་སི་བྷ་ཀོ་ (Dolores Bakos) ལགས། འཇར་མ་ནཱའི་གྲོས་ཚོགས་འཐུས་མི་ཊི་རིག་བྷར་ནར་ (Dirk Bergner) ལགས། རེ་གེ་ན་བྷར་གར་ (Regina Bergner) ལགས། ཀྲོར་སན་ཧབ་སི་ (Torsten Herbst) ལགས། སན་དྲ་ཝི་སར་( Sandra Weeser) ལགས། ཀི་རིས་ཊིན་ཨ་ཤ་བག་(Christine Aschenberg-Dugnus) ལགས་ཐུན་མོང་ནས་ཐེངས་འདིར་ (Friedrich Naumann Foundation) རོགས་ཀྱི་གོ་སྒྲིག་འོག་བཞུགས་སྒར་རྡ་རམ་ས་ལར་ཆེད་བཅར་ཞུས་ཏེ་བོད་ཀྱི་ཆོས་དང་རིག་གཞུང་། ལོ་རྒྱུས། འཚོ་བའི་གནས་སྟངས། ཤེས་ཡོན་སོགས་ཀྱི་སྐོར་དངོས་སུ་རྒྱུས་ལོན་ཞུ་རྒྱུ་བྱུང་བར་འདོད་བློ་ཚིམ་པོ་བྱུང་ཡོད་པ་དང་། དེ་ལྟ་བུའི་ཉམས་མྱོང་ལ་བརྟེན་ནས་སླད་མར་རྒྱལ་ཁབ་སོ་སོའི་ངོས་ནས་བོད་དོན་ལ་རྒྱབ་སྐྱོར་བྱེད་ཕྱོགས་ལ་ཕན་ཐོགས་ཆེན་པོ་བྱུང་སྐོར་འགྲེལ་བརྗོད་གནང་ཡོད།
དེ་བཞིན་ཁོང་རྣམས་ནས་བོད་ཀྱི་བདེན་པ་དང་། རང་དབང་གི་འཐབ་རྩོད་ལ་རྒྱབ་སྐྱོར་ཞུ་རྒྱུ་མ་ཟད། བོད་རྒྱའི་དཀའ་རྙོག་ཞི་བའི་ངང་ནས་བསལ་ཐུབ་པའི་རེ་བ་རྒྱག་གི་ཡོད་ཅེས་ནན་བརྗོད་གནང་ཡོད།
དེ་རྗེས་གསར་འགོད་པས་ཨ་རིའི་གཞུང་ནས་བོད་དོན་ལ་རྒྱབ་སྐྱོར་གྱི་ཁྲིམས་ཡིག་གཏན་འབེབས་གནང་ཡོད་པ་ལྟར་ཡུ་རོབ་ངོས་ནས་དེ་ལྟར་གནང་ཐུབ་མིན་སྐོར་བཀའ་འདྲི་ཞུས་པར། སྤྱིར་བོད་དོན་ལ་ཆབ་སྲིད་རྒྱབ་སྐྱོར་གནང་ཕྱོགས་ཐད་ཡུ་རོབ་རྒྱལ་ཁབ་རྣམས་ཨ་རིའི་རྗེས་སུ་ལུས་ཡོད་པ་དངོས་བདེན་ཡིན་ཞིང་། ཕྱོགས་བསྐྱོད་འདིའི་སྐབས་བོད་དོན་སྐོར་རྒྱུས་ལོན་གཏིང་ཟབ་བྱུང་བས་ཁོང་རྣམས་རང་ཡུལ་དུ་ཕེབས་རྗེས་ཕྱག་སྦྲེལ་རྣམས་དང་གྲོས་མོལ་གྱིས་བོད་དོན་ལ་རྒྱབ་སྐྱོར་ཚད་མཐོར་གཏོང་ཕྱོགས་ལ་འབད་རྩོལ་ཞུ་རྒྱུ་ཡིན་ཞེས་ལན་འདེབས་གནང་ཡོད།
སྤྱིར་འཇར་མན་རོགས་ཚོགས་ (Friedrich Naumann Foundation) རོགས་ཚོགས་ཀྱིས་གོ་སྒྲིག་ཞུས་པའི་གྲོས་ཚོགས་འཐུས་མི་རྣམས་ལ་དམིགས་པའི་བོད་དོན་གོ་རྟོགས་ལས་གཞིའི་འོག་ཨོསྟྲེ་ཡཱ་དང་འཇར་མ་ནཱའི་གྲོས་ཚོགས་འཐུས་མི་བདུན་ཕྱི་ལོ་ ༢༠༢༣ ཟླ་བ་ ༡༠ ཚེས་ ༠༦ ནས་ ༠༧ བར་བཞུགས་སྒར་རྡ་རམ་ས་ལར་ཆེད་ཕེབས་ཀྱིས་བོད་ཀྱི་ཆོས་དང་རིག་གཞུང་། ཆབ་སྲིད་སྐོར་རྒྱུས་ལོན་གང་ལེགས་ཞུས་ཡོད། ཕྱོགས་ཕེབས་སྐབས་གྲོས་ཚོགས་འཐུས་མི་རྣམས་ནས་ལྡི་ལིར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བཞུགས་སྒར་དུ་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་གཙོས་པའི་རྒྱུན་ལས་རྣམ་པ། དཔལ་ལྡན་སྲིད་ཚབ་ལྕང་ར་ཐར་ལམ་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་མཇལ་འཕྲད་གནང་ཡོད་པ་མ་ཟད། གཞན་ཡང་བཞུགས་སྒར་ཁུལ་གྱི་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ་ལྷན་དུ་མཇལ་འཕྲད་ཀྱིས་ཚོགས་སྡེ་སོ་སོའི་ལས་དོན་བྱེད་ཕྱོགས་དང་དམིགས་ཡུལ་སོགས་ཀྱི་སྐོར་རྒྱུས་ལོན་ཞུས་ཡོད།
གསར་འགོད་གསལ་བསྒྲགས་སྐབས་འཇར་མན་རོགས་ཚོགས་ཀྱི་ལྷོ་ཨེ་ཤི་ཡའི་འགན་འཛིན་ཀལ་སི་ཊན་ཀི་ལིན་ (Dr. Carsten Klein) ལགས་ཀྱང་ལྷན་ཞུགས་གནང་སྟེ་ཐེངས་འདིའི་བོད་དོན་གོ་རྟོགས་ལས་གཞི་སྤེལ་དགོས་པའི་དམིགས་ཡུལ་སྐོར་འགྲེལ་བརྗོད་གནང་ཡོད་པ་བཅས།། 
