༄༅། །འདི་གར་བྱང་ཨ་རི་སྐུ་ཚབ་དོན་གཅོང་ཁང་ནས་བཏང་གནས་ནང་འཁོད་དོན། ཨ་རིའི་གྲོང་ཁྱེར་ནིའུ་ཡོག་ཏུ་ཡོད་པའི་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་སྡེ་བཞིའི་ནང་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་ཞུ་བའི་ཉིན་ལྔའི་རིང་གི་འབུམ་ཚོགས་འདི།  ཟླ་བ་ ༡༠ ཚེས་ ༡ ཉིན་ལེགས་པར་གྲུབ་ཅིང་།  དེ་ནི་མཧཱ་གུ་རུའི་འབུམ་ཚོགས་ཐེངས་ལྔ་པ་ཡིན་པ་དང་།  གྲ་སྒྲིག་གནང་མཁན་གཙོ་བོ་ནིའུ་ཡོག་གནས་ཆུང་ཆོས་ཚོགས་རེད།  ཕྱི་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་ཆོལ་གསུམ་བོད་མིའི་ཞི་བའི་སྒེར་ལངས་ལ་རྒྱ་ནག་དམར་པོའི་གཞུང་གིས་དྲག་གནོན་བྱས་ནས་ལོ་ ༢༨ ཀྱི་རྗེས་ཏེ།  ཕྱི་ལོ་ ༡༩༨༧ ལོའི་ཟླ་བ་ ༩ ཚེས་ ༢༧ ཉིན་བོད་ཀྱི་མི་རབས་གསར་པའི་ཞི་རྒོལ་ལས་འགུལ་ཐེངས་དང་པོ་བརྩམས་ནས་འདི་ལོ་ཟླ་བ་ ༩ ཚེས་ ༢༧ ཉིན་མི་ལོ་ཧྲིལ་པོ་ ༣༦ ཏག་ཏག་འཁོར་གྱི་ཡོད།  

ནིའུ་ཡོག་གནས་ཆུང་ཆོས་ཚོགས་ཀྱིས་ཉིན་མོ་འདི་དང་བསྟུན་ནས་མཧཱ་གུ་རུའི་འབུམ་ཚོགས་ཐེངས་ལྔ་པ་གྲ་སྒྲིག་གནང་ཞིང་།  གནས་ཆུང་མཆོག་སྤྲུལ་བསྟན་འཛིན་བློ་གསལ་རིན་པོ་ཆེ་མཆོག་རྒྱ་གར་ནས་ཆེད་དུ་འབུམ་ཚོགས་ཀྱི་ཚོགས་མགོན་དུ་ཕེབས་ཡོད་པ་དང་། ནིའུ་ཡོག་དང་ནིའུ་འཇར་སི་ཁུལ་གྱི་རིས་མེད་ཆོས་ཚོགས་ཁག་གི་དགེ་འདུན་པ་རྣམ་པ་དང་།  བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ།  ཁྲིམས་ཞིབ་པ་ཟུར་པ་ངག་དབང་རབ་རྒྱས་མཆོག་དང་དོན་ཟུར་རིན་ཆེན་དར་ལོ་ལགས་སོགས་གཞུང་ཞབས་ཟུར་པ་དང་།  ཚོགས་པ་ཆེ་ཁག་གི་སྐུ་ཚབ།  མང་ཚོགས་བཅས་མི་གྲངས་ ༤༠༠ ལྷག་འབུམ་ཚོགས་ལ་མཉམ་ཞུགས་གནང་། ནིའུ་ཡོག་གནས་ཆུང་ཆོས་ཚོགས་ཀྱི་ལས་སྣེའི་གྲས་སྐུ་ཞབས་བཟོད་པ་ལགས་ནས་འབུམ་ཚོགས་ཉིན་དང་པོའི་ཉིན་ངོ་སྤྲོད་གསུང་བཤད་གནང་སྐབས་ ” གནས་ཆུང་ཆོས་ཚོགས་ནས་འབུམ་ཚོགས་གོ་སྒྲིག་གནང་བའི་དམིགས་ཡུལ་གཙོ་བོ་ནི།  རྒྱལ་བསྟན་དར་ཞིང་འགྲོ་ཀུན་བདེ་བ་དང་།  རང་ཅག་རྣམས་ལ་བཀའ་དྲིན་ཟླ་མེད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་སྐལ་བརྒྱར་བརྟན་པ།  བོད་འབངས་རྣམས་ཀྱི་རིང་ནས་སྙིང་དུ་བསྣག་པའི་འདོད་དོན་མྱུར་དུ་གྲུབ་པ།  སྤྱི་མཐུན་གྱི་བསོད་ནམས་གོང་མཐོར་འཕེལ་ཐབས།  འཛམ་གླིང་ཁྱོན་ནང་ནད་མུག་འཁྲུག་རྩོད་སོགས་ཡ་ང་བའི་འཇིགས་ཚོགས་རྣམས་རང་སར་ཞི་བ་བཅས་ཀྱི་ཆེད་དུ་ཡིན་པས།  འབུམ་ཚོགས་ལ་དངོས་སུ་ཕེབས་པ་དང་།  ཕེབས་མ་ཐུབ་པ་བཅས་ཚང་མས་ཐུགས་སྨོན་གནད་དུ་སྨིན་པ་གནང་ཐུབ་ན།  སློབ་དཔོན་པདྨ་འབྱུང་གནས་ཀྱི་ཐུགས་རྗེའི་བྱིན་རླབས་ལ་བརྟེན་ནས་ཕན་ཐོགས་ཡོང་རྒྱུར་ཐེ་ཚོམ་མེད་སྟབས།  དེ་དོན་ཚང་མས་དགོངས་འཇགས་ཀྱིས་ཐུགས་སྨོན་རྒྱ་མི་ཆུང་བ་གནང་རོགས་གནང་། ” ཞེས་གསུངས།   ཉིན་ལྔའི་འབུམ་ཚོགས་རིང་གནས་ཆུང་མཆོག་སྤྲུལ་བསྟན་འཛིན་བློ་གསལ་རིན་པོ་ཆེ་མཆོག་དབུ་བཞུགས་ཐོག  སེར་སྐྱ་ཀུན་གྱིས་ཉིན་ལྟར་ཞོགས་པ་ཚུ་ཚོད་ ༩ ནས་ཕྱི་དྲོ་ཆུ་ཚོད་ ༤ དང་ཕྱེད་ཀ་བར་ཕུན་ཚོགས་སྡེ་བཞི་ཚོགས་ཁང་དབུས་ཀྱི་རྟེན་མཆོག་སྤྱན་སྔར་སྣེ་འཛོམས་མཆོད་སྤྲིན་དང་།  རིག་འཛིན་གདུང་སྒྲུབ་ཀྱི་ཆོ་གའི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་གནང་ཞིང་། ཉིན་ལྟར་དགེ་འདུན་པ་རྣམས་ལ་བསྙེན་བཀུར་དང་།  ཚོགས་ཡོངས་ལ་གསོལ་ཇ་བཞེས་བག    ཉིན་གུང་དང་དགོང་དྲོའི་གསོལ་ཚིགས་དཀར་སྐྱོང་བཅས་འདེགས་འབུལ་ཞུས།མཧཱ་གུ་རུའི་འབུམ་ཚོགས་ནི་བོད་བསྟན་སྲིད་དང་། ༧རྒྱལ་བའི་སྐུ་ཕྱྭར་གཙོ་བོར་དམིགས་པའི་ཆོས་ཕྱོགས་ཀྱི་འདུ་འཛོམས་གལ་ཆེ་ཞིག་ཡིན་སྟབས།  འབུམ་ཚོགས་ཉིན་དང་པོ་དང་ཉིན་མཐའ་མའི་མཇུག་སྡོམ་ལ་བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་མཉམ་ཞུགས་གནང་ཡོད།  གནས་ཆུང་ཆོས་ཚོགས་ཀྱི་སྐུ་ཞབས་བཟོད་པ་ལགས་ནས་ “གནས་ཆུང་ཆོས་ཚོགས་ཀྱིས་གྲ་སྒྲིག་ཞུས་པའི་མཧཱ་གུ་རུའི་འབུམ་ཚོགས་ནི་བསྟན་སྲིད་ཞབས་རིམ་དང་།  ༧རྒྱལ་བའི་སྐུ་ཕྱྭར་དམིགས་པའི་ཆོས་ཕྱོགས་ཀྱི་བྱ་བ་གལ་ཆེ་ཞིག་ཡིན་སྟབས།  བྱུང་སོང་ཁ་འཐབ་ཡོང་མིན་ལ་བསམ་བློ་མ་བཏང་བར་ལོ་ལྟར་ཐེངས་རེ་གྲ་སྒྲིག་ཞུ་གི་ཡོད།   ད་རེས་ཐེངས་ལྔ་པ་དེ་རེད།  མང་ཚོགས་ཧ་ཅང་མང་པོ་ཕེབས་སོང་། ཕན་ཐོགས་ཆེན་པོ་བྱུང་ཡོད་པ་སྨོས་མེད་རེད།  སྐལ་པ་བཟང་པོ་བྱུང་། རྒྱབ་སྐྱོར་དང་མཉམ་ཞུགས་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན། ” ཅེས་གསུང་གི་འདུགཉིན་ལྔའི་རིང་ལྷག་བསམ་དད་གུས་ཆེན་པོས་དང་བླངས་ཕྱག་རོགས་གནང་མཁན་ཡོངས་ལ་མཆོག་སྤྲུལ་བསྟན་འཛིན་བློ་གསལ་རིན་པོ་ཆེ་མཆོག་ནས་དཀར་གཙང་མཇལ་དར་དང་།  སྲུང་མ་དམར་ནག་གི་སྐུ་པར་གསོལ་སྩལ་གནང་སྟེ་ཐུགས་རྗེ་ཆེ་ཞུ་མཚོན་པ་གནང་རྗེས།  སྐུ་ཞབས་བཟོད་པ་ལགས་ཀྱིས་རྩིས་ཁྲ་སྙན་སྒྲོན་དང་ཆབས་ཅིག་མཧཱ་གུ་རུའི་འབུམ་ཚོགས་ཐེངས་ལྔ་པ་དེ་རེ་ཞིག་མཇུག་སྒྲིལ་གནང་ཡོད་པ་རེད།།