༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༣ ཉིན་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ཏེ་ལོ་ངོ་ ༦༣ འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ ༩།༡༥ ཐོག་མཛད་སྒོའི་སྐུ་མགྲོན་གཙོ་བོར་༸སྐྱབས་རྗེ་ཀུན་བདེ་གླིང་རྟ་ཚག་རིན་པོ་ཆེ་མཆོག་དང་། དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་ལ་མཆོག དེ་བཞིན་སྐུ་མགྲོན་དུ་ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་དཔེ་ཟུར་དབང་འདུས་ཚེ་རིང་མཆོག བོད་མི་མང་སྤྱི་འཐུས་རྒྱུན་ལས་རྣམ་པ། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ། དེ་བཞིན་རྡ་ས་ཁུལ་གྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། སྦྱིན་བདག་དང་སྐུ་མགྲོན་རྣམ་པ། བོད་ཁྱིམ་སློབ་གྲྭ་གཞན་ཁག་ནས་ཕེབས་པའི་དགེ་ལས་སློབ་ཕྲུག་རྣམ་པ། མི་མང་བཅས་ལྷན་འཛོམས་ཀྱི་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་དང་མི་རིགས་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་རྗེས་དྲན་ཆེད་ངག་བཅད་གུས་འདུད་སྐར་མ་གཅིག་ཞུས་བསྟུན་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་བཏང་།
དེ་ནས་བོད་ཁྱིམ་སྤྱི་ཁྱབ་གཙོ་འཛིན་བསོད་ནམས་སྲི་གཅོད་ལགས་ཀྱིས་ཕེབས་བསུའི་གསུང་བཤད་དང་སྦྲགས་ལས་བསྡོམས་སྒྲོགས་སྦྱང་ཞུས་རྗེས་དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། ད་ལྟ་གོང་དུ་བོད་ཁྱིམ་སྤྱི་ཁྱབ་གཙོ་འཛིན་གྱིས་ལས་བསྡོམས་ནང་གསུངས་པ་ནང་ལྟར་ང་ཚོ་འདིར་འཛོམས་དགོས་དོན་ནི། བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༦༣ ཧྲིལ་པོ་འཁོར་བའི་དུས་ཆེན་ཆགས་ཀྱི་ཡོད་པར་བརྟེན། དེ་རིང་གི་སྐལ་བཟང་ཉིན་མོ་འདིའི་ཐོག་ལ་ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་བོད་ཁྱིམ་གྱི་འགན་འཛིན་གྱིས་གཙོས་པའི་སློབ་ཕྲུག་དང་། དགེ་རྒན། ལས་བྱེད་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
དབུ་འབྱེད་ཀྱི་ཉིན་མོ་སྲུང་བརྩི་གནང་བའི་སྐབས་སུ་གལ་ཆེ་ཤོས་ཤིག་ནི་སྒྲིག་འཛུགས་དང་། སློབ་གྲྭ་གང་ཡིན་རུང་ཐོག་མར་བྱུང་བའི་སྐབས་ཀྱི་གནས་སྟངས་གང་ཡིན་པ་དང་། དེའི་ཕན་ཡོན་གང་བྱུང་ཡོད་པ་དེ་གལ་ཆེན་པ་ཡིན། གོང་དུ་སྤྱི་ཁྱབ་གཙོ་འཛིན་གྱིས་གསུངས་པ་ནང་ལྟར། གཙོ་བོ་དེ་རིང་ལོ་ངོ་ ༦༣ འཁོར་བའི་དུས་ཆེན་སྲུང་བརྩི་བྱེད་རྒྱུའི་གནས་སྟངས་ཤིག་ཡོད་པ་དང་། དེ་བཞིན་བཙན་བྱོལ་ནང་ཡོད་པ་ཡིན་ནའང་རང་གི་སྐད་དང་། གོམས་གཤིས། ཆོས། རིག་གཞུང་སོགས་སྲུང་བརྩི་དང་གོང་འཕེལ་གཏོང་ཐུབ་པའི་སློབ་གྲྭ་འདི་ལྟ་བུ་ཡོང་ཐུབ་པ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་པོ་ཆེན་པོ་མཆོག་གི་ཐུགས་རྗེ་ཁོ་ནར་བརྟེན་ནས་བྱུང་བ་རེད། དེ་བཞིན་སྒྲིག་འཛུགས་དང་སློབ་གྲྭ་སོགས་ག་འདྲ་ཞིག་ཡིན་རུང་ལྷག་བསམ་རྣམ་དག་གི་འགན་ཁུར་ནས་དཀའ་ལས་རྒྱག་མཁན་ཚོ་མ་རྗེད་པ་བྱེད་དགོས་རྒྱུ་གལ་ཆེན་པོ་ཡིན་སྟབས། དེ་རིང་གི་ཉིན་མོ་འདིའི་ཐོག་བོད་མིའི་སྒྲིག་འཛུགས་ཀྱི་ངོས་ནས་ཞིང་གཤེགས་སྐུའི་གཅེན་མོ་ཚེ་རིང་སྒྲོལ་མ་མཆོག་དང་། སྐུའི་གཅེན་མོ་གངས་ལྗོངས་བོད་ཀྱི་ཨ་མ་བཀའ་ཟུར་རྗེ་བཙུན་པདྨ་མཆོག་དབུས་པའི་དགེ་རྒན་དང་། ལས་ཟུར་རྣམ་པ་ཐམས་ཅད་ལ་བཀའ་དྲིན་རྗེས་དྲན་ཞུ་བ་དང་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་རྗེས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གསུང་བཤད་གནང་བསྟུན་སྐུ་མགྲོན་གཙོ་བོ་༸སྐྱབས་རྗེ་ཀུན་བདེ་གླིང་རྟ་ཚག་རིན་པོ་ཆེ་མཆོག་གིས་གསུང་བཤད་དང་བོད་ཁྱིམ་ལས་བྱེད་ཞབས་ལོ་ཉི་ཤུ་འཁོར་བའི་ལས་བྱེད་རྣམས་ལ་གཟེངས་བསྟོད་དང་། སྲིད་ཚབ་བདེ་སྲུང་བཀའ་བློན་རྒྱ་རི་སྒྲོན་མ་མཆོག་གིས་ཤེས་ཡོན་གྱི་བྱ་དགའ་གནང་།
དེ་བཞིན་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་རྡ་སྟེང་བོད་ཁྱིམ་གྱི་བུ་དང་བུ་མོའི་སློབ་མ་རྩེ་ཕུད་བུའི་སྤྱི་ཁྱབ་རྒན་བདག་བསྟན་འཛིན་ལུང་རིགས་ལགས་དང་བུ་མོའི་སྤྱི་ཁྱབ་རྒན་བདག་བསྟན་འཛིན་བུ་འཁྲིད་ལགས་རྣམ་གཉིས་ལ་ལེགས་སྐྱེས་གཟེངས་བསྟོད་གནང་ཡོད།
མཐར་སློབ་ཕྲུག་རྣམས་ཀྱིས་གཞས་སྣ་འཁྲབ་སྟོན་དང་ལུས་རྩལ་སོགས་རྩེས་རྗེས་རྡ་སྟེང་བོད་ཁྱིམ་གྱི་ངེས་སྟོན་པ་འཛིན་ཚུལ་ཁྲིམས་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།
