༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་ཆགས་པའི་བོད་ཀྱི་འགྲེམས་སྟོན་ཁང་དུ་ཁྲུང་ཁྲུང་དཀར་མོ་གློག་བརྙན་བཟོ་སྐྲུན་ཁང་དང་ཕྱི་དྲིལ་བོད་ཀྱི་འགྲེམས་སྟོན་ཁང་ཟུང་སྦྲེལ་ཐོག་ཕྱི་ལོ་ ༡༩༥༧ ནས་ ༡༩༧༤ བར་གྱི་བོད་མིའི་བཙན་རྒོལ་རྒྱལ་སྐྱོབ་ཀྱི་ལོ་རྒྱུས་ལས་བརྩམས་པའི་གྲིབ་གཟུགས་ཀྱི་འཁྲབ་སྟོན་ཞེས་པའི་དུས་ཐུང་འགྲེམས་སྟོན་དབུ་འབྱེད་གནང་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བཀའ་ཟུར་བྲོང་ཆུང་དངོས་གྲུབ་མཆོག་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། དམིགས་བསལ་སྐུ་མགྲོན་བསྟན་འཛིན་བསོད་ནམས་ལགས་དང་རི་ཏུ་ས་རིན་ལགས། བོད་མི་མང་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་རྡོ་རྗེ་ཚེ་བརྟན་ལགས། དགའ་ལྡན་ཕོ་བྲང་གི་དྲུང་ཆེ་ཟུར་པ་བཀྲས་མཐོང་བསྟན་འཛིན་དགེ་བྱེད་ལགས། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་དང་རྣམ་རྒྱལ་ཚེ་དབང་ལགས། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། བཞུགས་སྒར་ཁུལ་གྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། གསར་འགོད་པ་སོགས་ཚང་འཛོམས་ཐོག་སྐུ་མགྲོན་གཙོ་བོ་མཆོག་ནས་སྣང་གསལ་མར་མེ་ཞལ་འབྱེད་དང་འབྲེལ་དུས་ཐུང་འགྲེམས་སྟོན་དབུ་འབྱེད་ཀྱིས་འགྲེམས་སྟོན་ལ་གཟིགས་སྐོར་གནང་ཡོད།
དེ་རྗེས་སྐུ་མགྲོན་དང་ཚོགས་བཅར་བ་རྣམས་འགྲེམས་སྟོན་ཁང་གི་ཚོགས་ཁང་དུ་ཚང་འཛོམས་ཀྱི་ཐོག་མར་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ནས་བོད་ཀྱི་འགྲེམས་སྟོན་ཁང་གི་དམིགས་ཡུལ་དང་ལས་དོན་བྱེད་ཕྱོགས་དང་འབྲེལ་ཏེ་ཕེབས་བསུའི་གསུང་བཤད་གནང་རྗེས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ནས་འགྲེམས་སྟོན་དང་འབྲེལ་བའི་གསུང་བཤད་གནང་། སྐབས་དེར་ཕྱི་དྲིལ་དྲུང་ཆེ་མཆོག་ནས་བོད་ཀྱི་འགྲེམས་སྟོན་ཁང་དེ་བཞིན་བོད་ཀྱི་ལོ་རྒྱུས་དང་རིག་གཞུང་འགྲེམས་སྟོན་གནང་ཡུལ་ཙམ་མ་ཡིན་པར་བོད་དོན་ཆབ་སྲིད་ཀྱི་འཐབ་རྩོད་དང་ཐར་ཀར་འབྲེལ་བ་ཡོད་པའི་བསྟི་གནས་ཤིག་ཡིན་སྐོར་ངོ་སྤྲོད་དང་སྦྲགས། ཐེངས་འདིར་བསྟན་འཛིན་བསོད་ནམས་ལགས་དང་རི་ཏུ་ས་རིན་ལགས་གཉིས་ནས་བོད་རྒྱལ་ཁབ་ཤོར་བའི་རྗེས་སུ་ཆོལ་གསུམ་བོད་མི་རྡོག་རྩ་ཆིག་སྒྲིལ་གྱིས་རྒྱ་ནག་ལ་འགོག་རྒོལ་དྲག་པོ་བྱས་པའི་ལོ་རྒྱུས་ཀྱི་དྲན་ཐོ་ཞིག་ཕྱི་རབས་པ་ཚོར་འགྲེམས་སྟོན་གནང་བར་ལེགས་གསོལ་བསྔགས་བརྗོད་དང་ཐུགས་རྗེ་ལེགས་འབུལ་ཞུས་ཡོད།
དེ་ནས་འགྲེམས་སྟོན་གྱི་ཟུང་སྦྲེལ་གོ་སྒྲིག་པ་བསྟན་འཛིན་བསོད་ནམས་ལགས་དང་རི་ཏུ་ས་རིན་ལགས་གཉིས་ནས་བཙན་རྒོལ་རྒྱལ་སྐྱོབ་ཀྱི་ལོ་རྒྱུས་དང་འབྲེལ་བའི་འགྲེམས་སྟོན་གནང་དགོས་པའི་དམིགས་ཡུལ་དང་། ཁོང་གཉིས་ནས་བཙན་རྒོལ་རྒྱབ་སྐྱོབ་ལས་འགུལ་དང་འབྲེལ་བའི་དངོས་བྱུང་གློག་བརྙན་བཟོ་སྐྲུན་གནང་བའི་བརྒྱུད་རིམ་ངོ་སྤྲོད་གནང་། སྐབས་དེར་བསྟན་འཛིན་བསོད་ནམས་ལགས་ཀྱིས་འགྲེམས་སྟོན་གྱི་དམིགས་ཡུལ་གཙོ་བོ་གཉིས་ནི། བོད་མི་ཕྱི་རབས་པ་རྣམས་ལ་བཙན་རྒོལ་རྒྱལ་སྐྱོབ་ཀྱི་ལོ་རྒྱུས་སྐོར་དྲན་གསོ་དང་གོ་རྟོགས་སྤེལ་རྒྱུ་མཚོན་པའི་རྒྱ་ནག་གིས་བོད་ཀྱི་གནད་དོན་ལོག་འགྲེལ་བྱེད་བཞིན་པར་གདོང་ལེན་གྱིས་བོད་ཀྱི་དངོས་ཡོད་གནས་ཚུལ་འགྲེལ་བརྗོད་བྱ་རྒྱུ་ཡིན་པ་གསུངས་ཡོད།
སྐུ་མགྲོན་གཙོ་བོ་བདེ་སྲུང་བཀའ་བློན་ཟུར་པ་བྲོང་ཆུང་དངོས་གྲུབ་མཆོག་ནས་རྒྱ་ནག་དམར་པོ་གཞུང་གིས་བོད་བཙན་བཟུང་བྱས་པའི་རྗེས་སུ་བོད་ཕྱི་ནང་གཉིས་ནས་བོད་མི་མི་ཐོག་རིམ་པས་རྒྱ་མིར་འགོག་རྒོལ་རྣམ་པ་འདྲ་མིན་ཐོག་སྤེལ་ཏེ་བོད་དོན་བདེན་པའི་འཐབ་རྩོད་ཀྱི་མཇུག་མཐུད་ནས་ད་བར་བོད་དོན་གསོན་གནས་ཐུབ་པའི་བརྒྱུད་རིམ་ཞིབ་ཕྲ་ངོ་སྤྲོད་དང་འབྲེལ། ལས་འགུལ་དེ་དག་ཁྲོད་དུ་བོད་མི་དཔའ་བོ་མང་པོས་གཅེས་པའི་ལུས་སྲོག་ལ་མ་འཛེམས་པར་དཀའ་སྤྱད་སྡུག་རུས་ཀྱིས་འཐབ་རྩོད་རྒྱུན་གནས་སླད་ཞི་དྲག་ལས་འགུལ་སྣ་ཚོགས་སྤེལ་བ་ནི་སྤོབས་པ་སྐྱེ་འོས་པ་ཞིག་དང་། ཁོང་རྣམ་པའི་མཛད་རྗེས་དེ་དག་རྗེས་སུ་དྲན་འོས་པ་ཞིག་ཡིན་པ་གསུངས་ཡོད།
དེ་བཞིན་ཁོང་གིས་བསྟན་འཛིན་བསོད་ནམས་ལགས་སུ་བཙན་རྒོལ་རྒྱལ་སྐྱོབ་ཀྱི་ལོ་རྒྱུས་དང་འབྲེལ་བའི་རྒྱུ་ཆ་ཡོད་སྟབས། དེ་དོན་དྲིལ་བསྒྲགས་སླད་ཕྱག་ལས་མུ་མཐུད་གནང་དགོས་པའི་ལམ་སྟོན་དང་སྦྲགས། བཙན་རྒོལ་རྒྱལ་སྐྱོབ་ཀྱི་ལོ་རྒྱུས་ཕྱི་གླིང་བས་ཤེས་རྒྱུ་གལ་ཆེ་མོད། དེ་ལས་ཀྱང་གལ་ཆེ་བ་ནི་བོད་མི་རང་གིས་ཤེས་པ་བྱ་རྒྱུ་དེ་ཡིན་ཞེས་གཞོན་སྐྱེས་གཙོ་བོར་གྱུར་བའི་བོད་མི་རྣམས་ནས་བཙན་རྒོལ་རྒྱལ་སྐྱོབ་ཀྱི་ལོ་རྒྱུས་ལ་དོ་སྣང་དང་རྒྱུས་ལོན་གནང་དགོས་པའི་སྐུལ་དེད་གནང་ཡོད་པ་བཅས།། 
