༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༥ ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བོད་ཀྱི་སྲིད་བྱུས་ཉམས་ཞིབ་ཁང་གིས་དཔར་འགྲེམས་ཞུས་པའི་རྒྱ་ནག་དང་རྒྱལ་སྤྱིའི་ཆབ་སྲིད་འགྱུར་ལྡོག་ཁྲོད་རེ་བ་དང་གདོང་ལེན་ཚོགས་འདུའི་དཔྱད་རྩོམ་ཕྱོགས་བསྒྲིགས་དཔེ་དེབ་དབུ་འབྱེད་གནང་ཡོད། སྐབས་དེར་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། ཉམས་ཞིབ་པ་རིག་སྨོན་ཚེ་རིང་བསམ་གྲུབ་ལགས་སོགས་ཕེབས་ཡོད།
དཔེ་དེབ་དབུ་འབྱེད་དང་འབྲེལ་ཏེ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། རྒྱ་ནག་གི་དབང་བསྒྱུར་འོག་སྡུག་སྦྱོང་མྱོང་མཁན་མི་རིགས་དང་། རྒྱལ་ཁབ་ཀྱི་ཚོགས་འདུ་གལ་ཆེན་པོ་ཞིག་འཚོགས་ཏེ་དེའི་ནང་བགྲོ་གླེང་དང་། གཏམ་བཤད་གནང་བ་ཁག་ཕྱོགས་བསྒྲིགས་ཞུས་ཡོད། སྤྱིར་ཚོགས་འདུ་འཚོག་རྒྱུ་གལ་ཆེན་པོ་རེད་ཡིན་ནའང་མཇུག་འཁྱོངས་བྱ་རྒྱུ་གལ་ཆེན་པོ་ཡིན། ད་རེས་ཚོགས་འདུ་བསྐོང་ཚོགས་གནང་བ་ལྟར་མ་འོངས་པར་མུ་མཐུད་འཚོགས་ཐུབ་དགོས་རྒྱུ་དང་། ང་ཚོའི་མཐར་ཐུག་གི་དམིགས་ཡུལ་མི་འདྲ་བ་ཡོད་ནའང་ཐབས་རྩོད་བྱ་ཡུལ་གཅིག་པ་ཡིན་སྟབས། མཉམ་རུབ་ཀྱི་ནུས་པ་གལ་ཆེན་པོ་ཡིན་པར་བརྟེན་ཚོགས་ཆེན་དང་། རྩོམ་སོགས་གལ་ཆེན་པོ་ཆགས་ཀྱི་ཡོད། དེར་བརྟེན་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གྱིས་གཙོས་པའི་ལས་བྱེད་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་ཡོད་པ་བཅས། །
