༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་གསར་པ་མ་ཧིག་ཇོན་སོན་མཆོག་ལ་འཚམས་འདྲི་མཛད་ཡོད། 

དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། སྐུ་ཉིད་ཨ་རིའི་གྲོས་ཚོགས་འོག་མའི་ཚོགས་གཙོ་སྐབས་ ༥༦ པར་འོས་འདེམས་བྱུང་བར་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། 

འདས་པའི་ལོ་ངོ་བཅུ་ཕྲག་དུ་མའི་རིང་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པི་ལོ་སི་མཆོག་གིས་གཙོས་པའི་སྲིད་དོན་ཚོགས་པ་ཟུང་སྦྲེལ་གྱིས་བོད་དོན་ལ་རྒྱབ་སྐྱོར་གཡོ་བ་མེད་པ་གནང་བར་ང་ཚོས་བཀའ་དྲིན་རྗེས་སུ་དྲན་བཞིན་ཡོད། ད་ལྟའི་ཆར་བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་པའི་སྐབས་འདིར་ཨ་རིའི་གྲོས་ཚོགས་ནི་བོད་དོན་ཞུ་གཏུག་གནང་མཁན་གལ་ཆེ་ཤོས་ཤིག་ཡིན་སྟབས། དེས་ང་ཚོར་མུ་མཐུད་སེམས་འགུལ་ཐེབས་འཇུག་གི་འདུག 

སྐུ་ཉིད་ཀྱི་དབུ་ཁྲིད་འོག་བོད་དོན་ལ་དོ་སྣང་དང་རྒྱབ་སྐྱོར་སྔར་ལྷག་ཐོབ་པའི་རེ་བ་བཟང་ས་ནས་རྒྱག་གི་ཡོད། དེ་ཡིས་ང་ཚོར་རེ་བ་དང་སེམས་ཤུགས་སྤར་ངེས་རེད། ཅེས་དང་། 

མཐར་དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་ཀྱི་ཚོགས་གཙོ་མཆོག་གི་བསམ་དོན་ཡིད་བཞིན་གྲུབ་པ་དང་། སླད་མར་དངོས་སུ་མཇལ་རྒྱུའི་རེ་བ་ཡོད་ཅེས་གསུངས་འདུག་པ་བཅས།།