༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་རྒྱལ་ས་ཝ་ཤིང་ཀྲོན་ཊི་སི་གནས་སྡོད་བོད་མི་རྣམས་ལ་བོད་མིའི་སྒྲིག་འཛུགས་ཀྱི་གནས་སྟངས་དང་། བཀའ་ཤག་སྐབས་བཅུ་དྲུག་པའི་ལས་དོན་གནང་ཕྱོགས། བོད་ཀྱི་ལོ་རྒྱུས་ཀྱི་གལ་གནད་སྐོར་གསུང་བཤད་གནང་ཡོད།
སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་སྐབས་བཅུ་དྲུག་པའི་ལས་ཁུར་དབུ་བཙུགས་གནང་རྗེས་བོད་མིའི་གཞིས་ཆགས་ཁག་གཙོ་བོར་གྱུར་པའི་ཕྱི་རྒྱལ་ཁག་ཏུ་གཟིགས་སྐོར་དུ་ཕེབས་ཏེ་བོད་མིའི་གནས་སྟངས་དང་དགོས་མཁོ་རྟོག་ཞིབ་གནང་ཚུལ་དང་། རྡ་རམ་ས་ལར་བོད་མིའི་སྒྲིག་འཛུགས་ཀྱི་སྤྱི་ཡོངས་སྒྲོམ་གཞིར་ལེགས་བཅོས་ཇི་འོས་དང་ཁྲིམས་སྒྲིག་ལམ་སྟོན་སོགས་དུས་བསྟུན་བསྒྱུར་བཅོས་གནང་སྟེ་ལས་དོན་ཕུགས་འཕེར་ཡོང་ཐབས་ཇི་དགེའི་ཐད་དུས་ཚོད་གང་འཚམ་བཏང་ཚུལ་གསལ་བཤད་དང་འབྲེལ། ལྷག་པར་བོད་མིའི་དང་བླངས་དཔྱ་དངུལ་ལག་དེབ་དང་འབྲེལ་བའི་སྒྲིག་གཞི་བསྐྱར་བཅོས་གནང་སྟེ་དེ་སྔོན་དཔྱ་དངུལ་ཕུལ་ཐུབ་མེད་པ་ཚོར་ཆག་ཡང་དང་། གསར་བཟོ་དང་ནོར་བཅོས་གནང་འདོད་ཡོད་རིགས་ལ་གོ་སྐབས་ཕུལ་བ་ལྟར། ལག་དེབ་གསར་བཟོའི་ཆེད་འཚང་སྙན་འབུལ་མཁན་མི་གྲངས་ ༣༠༠༠ ལྷག་ཙམ་བྱུང་བས་དཔལ་འབྱོར་ལས་ཁུངས་ཀྱི་འབྲེལ་ཡོད་ལས་བྱེད་རྣམས་ས་གནས་སོ་སོར་ཆེད་བཅར་གྱིས་གསར་བཟོ་དང་ནོར་བཅོས་ཇི་འོས་གང་མྱུར་གནང་བཞིན་ཡོད་སྐོར་གསལ་བཤད་དང་། དང་བླངས་དཔྱ་དངུལ་དབུལ་རྒྱུ་ནི་བཙན་བྱོལ་བོད་མིའི་བཅའ་ཁྲིམས་དགོངས་དོན་བོད་མིའི་ལས་འགན་ཡིན་པ་མ་ཟད། ལག་དེབ་དེ་ཉིད་རང་ཉིད་བོད་མི་ཡིན་པའི་ངོ་སྤྲོད་ལག་ཁྱེར་ཡང་ཡིན་པ་འགྲེལ་བརྗོད་གནང་ཡོད། 
དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ལས་འགན་གཙོ་བོ་ནི་བོད་རྒྱའི་དཀའ་རྙོག་བསལ་རྒྱུ་ཡིན་པ་ལྟར། བཀའ་ཤག་སྐབས་བཅུ་དྲུག་པའི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་བཞེད་མཛད་ཅིང་བོད་མི་མང་སྤྱི་འཐུས་ལྷན་ཚོགས་ནས་གཏན་ལ་ཕབ་པའི་གཞུང་འབྲེལ་དབུ་མའི་ལམ་གྱི་སྲིད་བྱུས་གཞི་ལ་བཞག་ནས་ཤར་སྐྱོད་གནང་རྒྱུའི་དམ་བཅའ་བརྟན་བཅངས་ཀྱིས་ལས་དོན་སྒྲུབ་བཞིན་ཡོད་པ་དང་། དབུ་མའི་ལམ་གྱི་སྲིད་བྱུས་ལག་བསྟར་བྱེད་སྐབས་ཐབས་བྱུས་གང་བསྟེན་དགོས་མིན་ནི་བཀའ་ཤག་སྐབས་སོ་སོའི་རྣམ་དཔྱོད་ལ་རག་ལུས་ཀྱི་ཡོད་སྟབས། བཀའ་ཤག་སྐབས་བཅུ་དྲུག་པའི་ངོས་ནས་དབུ་མའི་ལམ་གྱི་སྲིད་བྱུས་ལ་གདེང་འཇོག་ཡོང་ཐབས་སུ་ལོ་རྒྱུས་ཐོག་ནས་བོད་རང་བཙན་ཡིན་པ་རྒྱལ་ཁབ་གཞན་ཚོས་ངོས་འཛིན་ཡོང་ཐབས་ལ་འབད་རྩོལ་ཞུ་གཏུག་གནང་གི་ཡོད་པ་ནན་བརྗོད་དང་སྦྲགས། བོད་མི་རྣམས་ནས་ཀྱང་རང་འགན་རང་ཁུར་གྱིས་བོད་ཀྱི་ལོ་རྒྱུས་ལ་སློབ་གཉེར་བྱས་ཏེ་འདས་པའི་བྱུང་རབས་བདག་པོ་རྒྱག་དགོས་པ་དང་། ད་ལྟའི་མི་རབས་ཀྱིས་ལོ་རྒྱུས་བདག་པོ་མ་བརྒྱབ་ན་མི་རབས་ཕྱི་མར་བདག་སྤྲོད་བྱེད་ཐབས་མེད་པས་མ་འོངས་པར་བོད་ཀྱི་གནས་སྟངས་འཛམ་བུ་གླིང་ལ་འགྲེལ་བརྗོད་བྱེད་མི་ཐུབ་པའི་གནས་སྟངས་སུ་ལྷུང་ཉེན་ཡོད་སྐོར་འགྲེལ་བརྗོད་གནང་ཡོད།
བོད་རྒྱ་འབྲེལ་མོལ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས་ད་ལྟའི་ཆར་རྒྱ་ནག་གཞུང་ལྷན་དུ་རྒྱབ་ཕྱོགས་ནས་འབྲེལ་བ་ཡོང་གི་ཡོད་པ་གསལ་བཤད་གནང་བ་དང་ཆབས་ཅིག བོད་རྒྱའི་དཀའ་རྙོག་སེལ་དགོས་ན་རྒྱ་ནག་ལྷན་དུ་འབྲེལ་བ་མ་བྱས་པར་འགྲོ་ས་མེད་པ་དང་། བོད་རྒྱའི་དཀའ་རྙོག་མ་བསལ་བར་དུ་རྒྱལ་སྤྱིའི་སྤྱི་ཚོགས་ནང་དུ་བོད་དོན་དྲིལ་བསྒྲགས་དང་། བོད་ནང་གི་གནས་སྟངས་རྟོག་ཞིབ་བྱ་རྒྱུ་བོད་མིའི་ལས་འགན་ཡིན་པ་ནན་བརྗོད་གནང་། དེ་ལས་འཕྲོས་ཏེ་རྒྱལ་སྤྱིའི་སྤྱི་ཚོགས་ཁྲོད་ནས་རྒྱ་གར་ཕུད་བོད་དོན་ལ་རྒྱབ་སྐྱོར་ཚད་མཐོ་ཤོས་གནང་མཁན་ཞིག་ཨ་རི་ཡིན་པས་ཨ་རིའི་ནང་དུ་བོད་ཀྱི་སྐུ་ཚབ་དོན་ཁང་དང་རྒྱལ་སྤྱིའི་བོད་དོན་ལས་འགུལ་ཁང་མཉམ་རུབ་ཀྱིས་བོད་དོན་ཞུ་གཏུག་ལས་འགུལ་སྤེལ་དགོས་པའི་ལམ་སྟོན་གནང་ཡོད།
གཞན་ཡང་སྲིད་སྐྱོང་མཆོག་ནས་འདི་ལོའི་ཕྱི་ཟླ་བཞི་པའི་ནང་བོད་མིའི་སྒྲིག་འཛུགས་ཀྱི་ཕུགས་དམིགས་ཡིག་ཆ་བོད་ཀྱི་མ་འོངས་འགན་སྲུང་ཞེས་པ་ཞིག་བཏོན་སྟེ། བོད་དོན་བདེན་མཐའ་སེལ་ཐབས་དང་། བཙན་བྱོལ་བོད་མིའི་སྤྱི་ཚོགས་བདེ་དོན་ལྟ་སྐྱོང་། བོད་མིའི་སྒྲིག་འཛུགས་ཀྱི་ནུས་ཤུགས་གོང་སྤེལ་གཏོང་ཕྱོགས་ཇི་དགེའི་ཐད་ལམ་སྟོན་གསལ་གཏོད་གནང་ཡོད་པ་དང་། ཡིག་ཆ་དེའི་ནང་དུ་བཀའ་ཤག་སྐབས་བཅུ་དྲུག་པའི་བཞེངས་ཕྱོགས་དང་མ་འོངས་ཕུགས་དམིགས་སྐོར་གསལ་བས་མང་ཚོགས་ནས་དེ་ལྟར་མཁྱེན་རྟོགས་སླད་ཡིག་ཆ་དེར་གཟིགས་ཞིབ་གནང་གལ་ཆེ་བའི་སྐོར་གསལ་བཤད་གནང་ཡོད། དེ་མ་ཟད་དཔལ་ལྡན་སྲིད་སྐྱོང་མཆོག་ནས་གཞིས་ཆགས་སྲ་བརྟན་དང་འབྲེལ་ཏེ། ད་ལྟ་བར་དུ་བཙན་བྱོལ་ནང་བོད་ཀྱི་ཆོས་དང་རིག་གཞུང་ངོ་བོ་གསོན་གནས་ཐུབ་པ་ནི་བོད་མིའི་རུབ་སྡོད་གཞིས་ཆགས་ལ་བརྟེན་ནས་བྱུང་ཞིང་། ད་ལམ་གཞིས་ཆགས་ཁག་ཏུ་གཞིས་མི་ཉུང་དུ་འགྲོ་བཞིན་པའི་དཀའ་ངལ་ཡོད་པ་དང་། དཀའ་ངལ་དེ་ལ་གདོང་ལེན་ཆེད་བཀའ་ཤག་ངོས་ནས་བོད་ནས་ཕྱིས་སུ་འབྱོར་བ་རྣམས་ལ་གཞིས་ཆགས་ཁག་སོ་སོར་ས་ཁང་མཁོ་སྤྲོད་གནང་རྒྱུའི་ལས་གཞི་སྤེལ་ཡོད་སྐོར་ངོ་སྤྲོད་གནང་ཡོད།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་སྤྱི་ཡོངས་འགྲོ་གྲོན་ཆེད་བོད་མིའི་དཔྱ་དངུལ་འབུལ་འབབ་ཀྱིས་བརྒྱ་ཆ་བརྒྱད་ཙམ་མ་གཏོགས་ལོན་གྱི་མེད་པས་ད་ལྟའང་འགྲོ་གྲོན་ཕལ་མོ་ཆེ་བ་ཕྱིའི་རོགས་ཚོགས་ལ་བརྟེན་བཞིན་ཡོད་པས། མ་འོངས་པར་བོད་མིའི་སྒྲིག་འཛུགས་རང་ཁ་རང་གསོ་ཡོང་ཕྱིར་བོད་མི་འབྱོར་ལྡན་རྣམས་ནས་བོད་མིའི་བདེ་དོན་དང་ཤེས་རིག འཕྲོད་བསྟེན་དང་འབྲེལ་བའི་ལས་གཞི་ཁག་ལ་དཔལ་འབྱོར་གྱི་རོགས་སྐྱོར་གནང་རྒྱུའི་དགོངས་བཞེས་གནང་དགོས་པའི་འབོད་སྐུལ་གནང་ཡོད་པ་བཅས།།
