༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨེཊ་ལན་ཊ་ནས་ཕེབས་ཐོན་གྱིས་ཤར་ལོཊ་ལྦིལ་ཕེབས་འབྱོར་བྱུང་ཞིང་། གནམ་ཐང་དུ་ཤར་ལོཊ་ལྦིལ་ས་གནས་ཆོས་ཚོགས་ཀྱི་སྐུ་ཚབ། བོད་རིགས་སྤྱི་འཐུན་ཚོགས་པའི་ཚོགས་གཙོ་དང་རྒྱུན་ལས་གཙོས་ས་གནས་མི་མང་ནས་ཕེབས་བསུའི་སྣེ་ལེན་ཞུས་ཡོད།
ཕྱི་དྲོ་དཔལ་ལྡན་སྲིད་སྐྱོང་མཆོག་ནས་ཤར་ལོཊ་ལྦིལ་གནས་སྡོད་བོད་རིགས་མང་ཚོགས་དང་། དམིགས་བསལ་གཞོན་སྐྱེས་རྣམས་དང་མཇལ་འཕྲད་ཀྱིས་བོད་རིགས་གཞོན་ནུ་རྣམས་ནས་བོད་དོན་འཐབ་རྩོད་ལ་འགན་ཁུར་ཕྱོགས་སྐོར་གསུང་བཤད་གནང་ཡོད་པ་རེད།
དེ་ཡང་དཔལ་ལྡན་སྲིད་སྐྱོང་མཆོག་གིས་བོད་རིགས་གཞོན་སྐྱེས་རྣམས་ལ་གསུང་བཤད་གནང་སྐབས་བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པའི་ལས་དོན་གནང་ཕྱོགས་སྤྱི་དང་། ཡང་སྒོས་ད་ལྟ་བར་དུ་བཀའ་ཤག་ངོས་ནས་ལས་དོན་ཇི་བྱས་དང་། ཡོང་འགྱུར་ལས་གཞི་ཁག་གི་སྐོར་གསལ་བཤད་གནང་བ་དང་ཆབས་ཅིག གཞུང་འབྲེལ་ཕྱོགས་ཕེབས་སྐབས་དཔལ་ལྡན་སྲིད་སྐྱོང་མཆོག་ནས་དམིགས་བསལ་བོད་རིགས་གཞོན་སྐྱེས་རྣམས་དང་ཐུག་འཕྲད་ཀྱིས་གཞོན་སྐྱེས་ལྷན་དུ་དགོངས་ཚུལ་བརྗེ་ལེན་གནང་གི་ཡོད་སྐོར་གསུངས།
དེ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས་ཉེ་སྔོན་ལྷོ་དབུས་ཨ་མི་རི་ཀར་ཕྱོགས་ཕེབས་ཀྱིས་ས་གནས་ཆབ་སྲིད་པ་དང་། གྲོས་ཚོགས་འཐུས་མི། མཐོ་སློབ་ཀྱི་སློབ་གཉེར་བ་སོགས་དང་མཇལ་འཕྲད་ཀྱིས་བོད་དོན་དྲིལ་བསྒྲགས་གང་ལེགས་བྱུང་སྐོར་དང་། སླད་མར་ལྷོ་དབུས་ཨ་མི་རི་ཀར་བོད་དོན་དྲིལ་བསྒྲགས་དང་ཞུ་གཏུག་སྔར་ལྷག་ཤུགས་ཆེ་རུ་གཏོང་འཆར་ཡོད་སྐོར་གསུངས། དེ་བཞིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཡུལ་དེ་འཛམ་བུ་གླིང་གི་ས་ཁམས་ཆབ་སྲིད་དང་། གོ་ལའི་ཁོར་ཡུག་སོགས་ལ་གལ་གནད་ཆེན་པོ་ཆགས་ཡོད་པ་དང་། ད་ལྟ་རྒྱ་ནག་གཞུང་གིས་ཁྲིམས་འགལ་ཐོག་བོད་བཙན་བཟུང་བྱས་ཡོད་ནའང་། བོད་མིའི་ངོས་ནས་རང་བཙན་རྩོད་ཀྱི་མེད་ལ། བོད་རྒྱའི་དཀའ་རྙོག་སེལ་ཐབས་ཀྱི་བོད་མིའི་སྒྲིག་འཛུགས་ཀྱི་གཞུང་འབྲེལ་སྲིད་བྱུས་དབུ་མའི་ལམ་ཡིན་སྐོར་དྲན་སྐུལ་གནང་ཞིང་། གལ་ཏེ་སླད་མར་བོད་མིའི་སྒྲིག་འཛུགས་ཀྱི་སྲིད་བྱུས་ལ་འགྱུར་བ་གཏོང་དགོས་ཡོད་ན། མང་ཚོགས་ཀྱི་བསམ་ཚུལ་བསྡུ་ལེན་བརྒྱུད་གནང་དགོས་ལ། ད་ལྟའི་བཀའ་ཤག་ངོས་ནས་དབུ་མའི་ལམ་གྱི་སྲིད་བྱུས་གཞི་ལ་བཟུང་ནས་ཐབས་བྱུས་ལ་འགྱུར་བ་ཕྲན་བུ་བཏང་སྟེ་ལོ་རྒྱུས་ཐོག་བོད་དེ་རང་བཙན་རྒྱལ་ཁབ་ཅིག་ཡིན་པ་ནན་བརྗོད་གནང་གི་ཡོད་པ་དང་། དེ་ལྟར་གནང་དོན་ཡང་དབུ་མའི་ལམ་གྱི་སྲིད་བྱུས་ལ་གདེང་འཇོག་ཐོབ་ཐབས་དང་རྒྱ་གཞུང་གིས་བོད་ཀྱི་ལོ་རྒྱུས་འཁྱོག་བཤད་ཤུགས་ཆེ་བྱེད་བཞིན་པར་གདོང་ལེན་གནང་ཆེད་ཡིན་པ་གསུངས་ཡོད།
བོད་མི་གཞོན་སྐྱེས་རྣམས་ནས་བོད་ཀྱི་ལོ་རྒྱུས་ལ་དོ་སྣང་དང་སློབ་གཉེར་གནང་གལ་ཆེ་བའི་སྐོར་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས་གཞོན་སྐྱེས་རྣམས་ལ་ཕྱི་ལོའི་དུས་རབས་བདུན་པ་ནས་བཟུང་བོད་བཙན་པོའི་དུས་སྐབས་སུ་བོད་ཀྱི་ཆོས་རྒྱལ་རྣམས་ནས་བོད་ཀྱི་མངའ་ཐང་རྒྱ་བསྐྱེད་ཀྱིས་རྒྱ་ནག་གི་རྒྱལ་ས་དང་། དབུས་ཨེ་ཤི་ཡའི་ས་ཁུལ་བར་དབང་བསྒྱུར་བྱས་ཏེ་ཨེ་ཤི་ཡའི་སྟོབས་ཆེན་རྒྱལ་ཁབ་ཅིག་ཏུ་གྱུར་ཚུལ་དང་། དེ་རྗེས་བོད་སིལ་བུར་ཐོར་ནས་སོག་པོའི་རྒྱབ་སྐྱོར་འོག་ས་སྐྱས་བོད་ཀྱི་སྲིད་དབང་བཟུང་ཚུལ་སོགས་བོད་ཀྱི་ལོ་རྒྱུས་ཀྱི་འཕེལ་རིམ་སྤྱི་བཤད་གནང་བ་དང་ཆབས་ཅིག གཞོན་སྐྱེས་རྣམས་ནས་བོད་ཀྱི་ལོ་རྒྱུས་ཀྱི་བཤད་འགྲོས་སྐོར་གོ་རྟོགས་ལེགས་པ་ལོན་ཆེད་བོད་དོན་མཁས་པ་མ་ཧི་ཀལ་ཝན་ཝལཊ་ཝན་པ་རག་ (Michael van Walt van Praag) ལགས་དང་། རྒྱ་རིགས་གཙུག་ལག་སློབ་དཔོན་ལའུ་ལགས་ཀྱིས་བརྩམས་པའི་དཔེ་དེབ་གཉིས་ཀློག་དགོས་པའི་ལམ་སྟོན་གནང་ཡོད་པ་རེད།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བོད་ཀྱི་ཆོས་དང་རིག་གཞུང་གི་གལ་གནད་སྤྱི་དང་། ལྷག་པར་བོད་བརྒྱུད་ནང་བསྟན་གྱི་བྱམས་པ་དང་འཚེ་བ་མེད་པའི་ལྟ་སྤྱོད་རྣམས་དེང་གི་འཁྲུགས་རྩོད་ཆེ་བའི་དུས་སྐབས་སུ་དགོས་གལ་ཆེན་པོ་ཆགས་ཡོད་སྐོར་ངོ་སྤྲོད་དང་སྦྲགས། འཛམ་བུ་གླིང་གི་སྣོད་བཅུད་རྟེན་འབྲེལ་ཆེད་བོད་གལ་ཆེན་པོ་ཆགས་ཀྱི་ཡོད་ཅིང་། དེ་ཡང་གཙོ་བོ་ཨེ་ཤི་ཡའི་གཙང་ཆུ་ཆེ་ཁག་ཕལ་མོ་ཆེ་བོད་མཐོ་སྒང་ནས་ཐོན་གྱི་ཡོད་པ་དང་། དེ་ལ་བརྟེན་ནས་འཛམ་གླིང་ནང་དུ་བོད་ལ་ཨེ་ཤི་ཡའི་ཆུ་མཛོད་དང་། འཛམ་བུ་གླིང་གི་སྣེ་གསུམ་པ་ཞེས་གྲགས་ཡོད་ཅེས་གསུངས།
མཐའ་དོན་དཔལ་ལྡན་སྲིད་སྐྱོང་མཆོག་གིས་བོད་ལ་རང་དབང་མ་འཐོབ་བར་དུ་བོད་ཀྱི་འཐབ་རྩོད་གསོན་པོར་གནས་དགོས་ཤིང་། དེའི་ཆེད་བོད་རིགས་གཞོན་སྐྱེས་རྣམས་ནས་མ་འོངས་བོད་དོན་འཐབ་རྩོད་ཀྱི་འགན་ཁུར་དགོས་པའི་ལམ་སྟོན་གནང་ཡོད་པ་བཅས།།
