༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༢ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལྷོ་ཀེ་ལོ་ཕོ་ནི་ཡར་ཆེད་ཕེབས་ཀྱིས་ས་གནས་བོད་མི་རྣམས་ལ་བོད་འཐབ་རྩོད་སྤྱི་དང་ཡང་སྒོས་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སྐོར་གསུང་བཤད་གནང་ཡོད་པ་རེད།
དེ་ཡང་དཔལ་ལྡན་སྲིད་སྐྱོང་མཆོག་གི་ལྷོ་དབུས་ཨ་མི་རི་ཀའི་གཞུང་འབྲེལ་འཚམས་གཟིགས་ལེགས་པར་གྲུབ་རྗེས་ཕྱི་ཚེས་ ༡༢ ཉིན་ཨ་རིའི་ལོ་སི་ཨན་ཇི་ལི་སིར་ཕེབས་སྐབས་ལྷོ་ཀེ་ལོ་ཕོ་ནི་ཡའི་ས་གནས་བོད་རིགས་སྤྱི་མཐུན་ཚོགས་པའི་སྣེ་ཁྲིད་འོག་ས་གནས་བོད་མི་རྣམས་ནས་ཕེབས་བསུ་གཟབ་རྒྱས་ཞུས་ཡོད་པ་དང་། དེ་ཉིན་ཕྱི་དྲོ་དཔལ་ལྡན་སྲིད་སྐྱོང་མཆོག་ནས་ས་གནས་བོད་མི་རྣམས་ལ་གསུང་བཤད་གནང་ཡོད།
སྐབས་དེར་སྲིད་སྐྱོང་སྤེན་པ་ཚེ་རིང་མཆོག་ནས་བོད་མིའི་སྒྲིག་འཛུགས་ངོས་ནས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་གྲོས་ཆོད་དགོངས་དོན་ལྟར་དེ་སྔོན་དང་བླངས་དཔྱ་དངུལ་དུས་ཐོག་འབུལ་ཐུབ་མེད་པ་རྣམས་ལ་ཆག་ཡང་དང་། གསར་བཟོ་གནང་འདོད་ཡོད་རིགས་ལ་དེ་ལྟར་གསར་བཟོ་གནང་ཕྱོགས་སྟབས་བདེ་རུ་བཏང་ཡོད་སྐོར་གསལ་བཤད་དང་སྦྲགས། དེ་ལྟར་གནང་དགོས་དོན་ཡང་གཙོ་བོ་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་ལྟར་བོད་མིའི་ལས་འགན་སྒྲུབ་ཐུབ་ཐབས་ཆེད་གནང་བ་ཡིན་པ་མ་ཟད། དེ་ལྟ་བུའི་དགོངས་ཡངས་དེ་སྔའི་བཀའ་ཤག་ནས་ཀྱང་གནང་ཡོད་པ་གསུངས་ཡོད། དེ་བཞིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཞུང་འབྲེལ་དབུ་མའི་ལམ་གྱི་སྲིད་བྱུས་གཞིར་བཞག་ཐོག་བཀའ་ཤག་སྐབས་བཅུ་དྲུག་པའི་ལངས་ཕྱོགས་དང་། ལས་དོན་གནང་སྟངས་སྤྱི་དང་། ཡང་སྒོས་བཀའ་ཤག་སྐབས་བཅུ་དྲུག་པའི་ངོས་ནས་དབུ་མའི་ལམ་གྱི་ཐབས་བྱུས་ལ་འགྱུར་བ་ཕྲན་བུ་བཏང་སྟེ་ལོ་རྒྱུས་ཐོག་བོད་དེ་རང་བཙན་ཡོད་པའི་རྒྱལ་ཁབ་ཅིག་ཡིན་པ་ནན་བརྗོད་གནང་བཞིན་པའི་སྐོར་དང་། མ་འོངས་ལས་འཆར་སོགས་ལག་བསྟར་སྟབས་བདེ་ཡོང་སླད་བཙན་བྱོལ་བོད་མིའི་གྲངས་ཐོ་ཚད་ལྡན་བཟོ་ཐབས་གནང་བཞིན་པ། བོད་མིའི་སྒྲིག་འཛུགས་ཀྱི་འཛིན་སྐྱོང་སྒྲོམ་གཞི་ཚད་ལྡན་བཟོ་སྒྲིག་གནང་བཞིན་པའི་སྐོར་འགྲེལ་བརྗོད་གནང་ཡོད།
དེ་ལྟར་ཁོང་གིས་ཏོག་དབྱིབས་གཉན་རིམས་ཁྱབ་གདལ་རྗེས་སུ་བོད་མིའི་དགོས་མཁོ་རྟོགས་ཞིབ་སླད་བོད་མི་གནས་སྡོད་གཞིས་ཆགས་དང་ས་གནས་ཁག་ཏུ་གཟིགས་སྐོར་དུ་ཕེབས་ཡོད་པའི་སྐོར་གསལ་བཤད་དང་། དེ་ལས་འཕྲོས་ཏེ་ཁོང་གིས་ཉིན་ཤས་སྔོན་དུ་ལྷོ་དབུས་ཨ་མི་རི་ཀར་གཞུང་འབྲེལ་འཚམས་གཟིགས་བསྐྱངས་ཏེ་གྲོས་ཚོགས་འཐུས་མི་དང་། གནད་ཡོད་མི་སྣ་སོགས་དང་མཇལ་འཕྲད་ཀྱིས་བོད་དོན་རྒྱབ་སྐྱོར་སྲ་བརྟན་དང་ཞུ་གཏུག་གནང་ཡོད་སྐོར་གསུངས་པ་མ་ཟད། དེ་དང་འབྲེལ་ཏེ་རྒྱལ་སྤྱི་དང་རྒྱ་ནག་གི་ཆབ་སྲིད་ཀྱི་འགྱུར་ལྡོག་སྐོར་དང་དེའི་ཁྲོད་ནས་བོད་དོན་ཆེད་གོ་སྐབས་སྟངས་འཛིན་གནང་ཕྱོགས་སྐོར་གསུང་བཤད་གནང་ཡོད་པ་བཅས།། 
