༄༅། །ཕྱི་ལོ་ ༢༠༢༣ ཟླ་བ་ ༠༢ ཚེས་ ༠༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་བ་རཱ་ཛིལ་གྱི་ས་ཧུ་པ་ཧུ་ལོ་མངའ་སྡེའི་གྲོས་ཚོགས་ཀྱི་ཚོགས་གཙོ་ཨན་གྲྀ་ཊོ་པྲ་ཊོ་ (Andre do Prado) མཆོག་དང་། ཚོགས་གཞོན་གྷིལ་ཊི་ནུ་སི་ (Gil Dinuz) མཆོག་གིས་གྲོས་ཚོགས་སུ་ཕེབས་བསུ་ཞུས་ཡོད། སྐབས་དེར་གྲོས་ཚོགས་འཐུས་མི་དང་གྲོས་ཚོགས་ཀྱི་རྒྱལ་སྤྱིའི་འབྲེལ་ལམ་ཚོགས་ཆུང་གི་ཚོགས་མི་པ་ཧུ་ལ་ཕི་ཧོ་རི་ལོ་ (Paula Fiorilo) ལགས་དང་། རུ་ཧི་ཨལ་བ་སི་ (Rui Alves) ལགས་རྣམ་གཉིས་ཀྱང་ཕེབས་བཅར་ཞུས་ཡོད་པ་རེད།
ཆུ་ཚོད་གཅིག་ལྷག་གི་མཇལ་མོལ་སྐབས་དཔལ་ལྡན་སྲིད་སྐྱོང་མཆོག་གིས་འཛམ་བུ་གླིང་གི་ས་ཁམས་ཆབ་སྲིད་དང་ཁོར་ཡུག་ཆེད་བོད་གལ་གནད་ཆེ་ཚུལ་མཚོན་པའི་བོད་ཀྱི་ཆོས་དང་རིག་གཞུང་གི་དོན་སྙིང་ངོ་སྤྲོད་གནང་ཞིང་། ནུབ་ཕྱོགས་པས་བོད་ནི་འཛམ་བུ་གླིང་གི་མཐོ་སྒང་ཡིན་ཞེས་ཟེར། ཨེ་ཤི་ཡའི་རྒྱལ་ཁབ་ཚོས་བོད་དེ་ཨེ་ཤི་ཡའི་ཆུ་མཛོད་དུ་ལྟ་གི་ཡོད། རྒྱ་རིགས་ཚན་རིག་པ་ཐེ་བའི་ཕྱི་རྒྱལ་ཚན་རིག་པ་མང་པོས་བོད་དེ་འཛམ་བུ་གླིང་གི་སྣེ་གསུམ་པ་རེད་ཅེས་ཟེར་གྱི་ཡོད། ཅེས་བོད་ནི་ཆབ་སྲིད་ཁོ་ན་མ་ཡིན་པར་འཛམ་བུ་གླིང་གི་ཁོར་ཡུག་ལ་གལ་གནད་ཆེན་པོ་ཆགས་ཚུལ་འགྲེལ་བརྗོད་གནང་ཡོད།
དེ་བཞིན་ཁོང་གིས་བ་རཱ་ཛིལ་ནང་དུ་གནམ་གཤིས་འགྱུར་ལྡོག་ལ་བརྟེན་ནས་ནགས་ཚལ་མེར་ཚིག་གི་དཀའ་ངལ་སོགས་འཕྲད་བཞིན་ཡོད་པས་བ་རཱ་ཛིལ་ནས་རྒྱལ་སྤྱིའི་སྡིངས་ཆའི་སྟེང་དུ་གནམ་གཤིས་འགྱུར་ལྡོག་གི་དཀའ་ངལ་སྐོར་བཤད་འོས་ཤིང་། དམིགས་བསལ་ཨ་མེ་ཛོན་ནགས་ཚལ་དང་བོད་མཐོ་སྒང་གི་ཁོར་ཡུག་གི་དམིགས་བསལ་གྱི་གལ་གནད་སྐོར་གསལ་སྟོན་གནང་རྗེས་བ་རཱ་ཛིལ་གཞུང་ངོས་ནས་རྒྱ་ནག་དང་འབྲེལ་བ་བྱེད་ཕྱོགས་སྐོར་གསུངས སྐབས་དེར་དཔལ་ལྡན་སྲིད་སྐྱོང་མཆོག་གིས་བ་རཱ་ཛིལ་གཞུང་ནས་རྒྱ་ནག་ཐོག་སྲིད་བྱུས་བཟུང་རྒྱུ་དང་། ཚོང་འབྲེལ་བྱེད་སྐབས་གཟབ་ནན་བྱེད་དགོས་པ་དང་། བ་རཱ་ཛིལ་ལྟ་བུའི་མང་གཙོའི་རྒྱལ་ཁབ་ཅིག་ནས་རྒྱ་ནག་ལྷན་དུ་འབྲེལ་བ་བྱེད་སྐབས་གོ་ལའི་ཁོར་ཡུག་དང་། འགྲོ་བ་མིའི་ཐོབ་ཐང་། རང་དབང་སོགས་ཀྱི་སྐོར་གླེང་སློང་གནང་དགོས་པའི་རེ་སྐུལ་ཞུས།
བོད་ནང་གི་ཛ་དྲག་གནས་སྟངས་དང་འབྲེལ་ཏེ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ད་ལྟའི་ཆར་རྒྱ་ནག་གི་སྲིད་འཛིན་ཞི་ཅིན་ཕིང་གི་དབང་སྒྱུར་འོག་བོད་རིགས་རྒྱ་སྒྱུར་གྱི་སྲིད་བྱུས་ལག་བསྟར་ཤུགས་ཆེ་བྱེད་བཞིན་ཡོད་སྟབས། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྩ་བརླག་འགྲོ་ཉེན་ཆེན་པོ་ཡོད་པ་དང་། རྒྱ་ནག་གཞུང་ནས་བོད་རིགས་རྒྱ་ནག་ཅན་དུ་བསྒྱུར་ཆེད་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་གཅིག་ལྷག་བཙན་འཇུག་བྱས་ཡོད་སྐོར་གསུངས་པའི་ཐོག ད་ལྟ་བར་དུ་བོད་མིའི་རང་དབང་ཆེད་དུ་བོད་མི་གྲངས་ ༡༥༧ ནས་རང་ལུས་མེར་སྲེག་གིས་རྒྱ་ནག་གཞུང་ལ་ངོ་རྒོལ་བྱས་ཡོད་པའི་དངོས་བྱུང་གནས་སྟངས་ངོ་སྤྲོད་གནང་ཡོད།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་མངའ་སྡེའི་གྲོས་ཚོགས་ཀྱི་ཚོགས་གཙོ་དང་ཚོགས་གཞོན་མཆོག་ནས་ཕེབས་བསུ་སྣེ་ལེན་གནང་བར་ཐུགས་རྗེ་ཞུས་པ་དང་འབྲེལ་གནང་སྒོ་དེ་ནི་བོད་ནང་གི་བོད་མི་རྣམས་ལ་མཚོན་ན་རེ་བའི་བརྡ་ལན་ཞིག་ཏུ་གྱུར་ཡོད།
གྲོས་ཚོགས་ཀྱི་ཚོགས་གཙོ་དང་ཚོགས་གཞོན་མཆོག་ནས་དཔལ་ལྡན་སྲིད་སྐྱོང་མཆོག་གི་བ་རཱ་ཛིལ་ཁུལ་དུ་ཐེངས་དང་པོ་ཕེབས་པར་འཚམས་འདྲི་དང་སྦྲགས། བོད་རྒྱའི་དཀའ་རྙོག་ཞི་འགྲིག་ཡོང་བར་རྒྱབ་སྐྱོར་གནང་ཞིང། གྲོས་ཚོགས་འཐུས་མི་ཞིག་ཡིན་པའི་ཆ་ནས་ཞི་བདེ་དང་། གྲོས་མོལ། བཙན་གནོན་མཚམས་འཇོག་ཆེད་ཞུ་གཏུག་མུ་མཐུད་གནང་རྒྱུའི་ཞལ་བཞེས་གནང་། དེ་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཐུགས་རྗེ་ལེགས་འབུལ་ཞུས་པ་མ་ཟད། མངའ་སྡེའི་གྲོས་ཚོགས་ཀྱི་དབུ་ཁྲིད་རྣམ་པ་བཞུགས་སྒར་རྡ་རམ་ས་ལར་མགྲོན་འབོད་གནང་ཡོད།
གྲོས་ཚོགས་ཀྱི་ལས་རིམ་གྲུབ་རྗེས་དཔལ་ལྡན་སྲིད་སྐྱོང་མཆོག་ས་ཧུ་པ་ཧུ་ལོ་གྲོང་ཁྱེར་གྱི་ཚོགས་ཁང་དུ་གྲོང་ཁྱེར་གྱི་འགྲོ་བ་མིའི་ཐོབ་ཐང་ཚོགས་ཆུང་གི་དྲུང་ཆེ་སོ་ནིན་ཧ་ཕ་རན་སིན་(Soninha Francine) ལགས་དང་གྷིལ་བར་ཊོ་ན་ཊ་ལི་ནི་ (Gilberto Natalini) ལགས། གནམ་གཤིས་འགྱུར་ལྡོག་ཚོགས་ཆུང་གི་དྲུང་ཆེ་ལྷན་དུ་བགྲོ་གླེང་གནང་རྗེས་ས་ཧུ་པ་ཧུ་ལོ་གཙུག་ལག་སློབ་གཉེར་ཁང་དུ་ཆེད་ཕེབས་གནང་།
ཐེངས་འདིའི་བ་རཱ་ཛིལ་ཁུལ་གྱི་གཞུང་འབྲེལ་ཕྱོགས་ཕེབས་འདི་ནི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ཁུལ་དེའི་ཕྱོགས་ཕེབས་ཐོག་མ་དེ་ཡིན་པ་དང་། དེ་རྗེས་ཁོང་ཉིད་ཀོ་ལམ་བི་ཡཱ་དང་། མེཀ་སི་ཀོར་ཕེབས་གཏན་འཁེལ་ཡོད་པ་བཅས།། 
