༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༠༨ ཉིན་ཉི་འོང་བོད་ཁང་གི་ལོ་འཁོར་ཚོགས་འདུ་དྲྭ་ཐོག་ནས་བསྐོང་ཚོགས་གནང་ཡོད།
དེ་ཡང་དྲྭ་ཐོག་ཚོགས་འདུའི་ཐོག་མར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཚོགས་མི་རྣམས་ལ་ཕེབས་བསུ་དང་སྦྲགས། ཚོགས་འདུའི་དམིགས་ཡུལ་གཙོ་བོ་ནི་ཉི་འོང་བོད་ཁང་གི་ཚོགས་མི་ཕན་ཚུན་བར་འབྲེལ་བ་བཟང་དུ་གཏང་རྒྱུ་མཚོན་པའི་བོད་དོན་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས། སྐུ་གཟུགས་འཕྲོད་བཞེས་གནས་སྟངས། བོད་ཁང་གི་ལས་དོན་བྱེད་ཕྱོགས་སོགས་ཀྱི་སྐོར་སྙན་སེང་ཞུ་རྒྱུ་ཡིན་སྐོར་གསུངས། དེ་བཞིན་ཁོང་གིས་མཉམ་འབྲེལ་རྒྱལ་ཚོགས་ཀྱིས་ཤེས་ཡོན་དང་། ཚན་རིག རིག་གཞུང་ལྷན་ཚོགས་ནས་ཕྱི་ཟླ་ ༡༠ ཚེས་ ༠༥ འཛམ་གླིང་དགེ་རྒན་ཉིན་མོར་གསལ་བསྒྲགས་བསྐྱངས་པ་ལྟར། བོད་ཁང་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ང་ཚོའི་དགེ་རྒན་རྩ་ཆེ་ཤོས་སུ་ངོས་འཛིན་ཞུས་ཐོག་བོད་ཁང་གི་ལོ་འཁོར་ཚོགས་འདུ་ཟླ་དེའི་ནང་བསྐོང་ཚོགས་གནང་རྒྱུ་ཡིན་སྐོར་གསལ་བསྒྲགས་གནང་ཡོད་པ་རེད།
ཕྱོགས་མཚུངས་སྐུ་ཚབ་དོན་གཅོད་ནས་ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་གཟུགས་འཕྲོད་བཞེས་བཟང་པོ་ཡོད་པ་མ་ཟད། གསུང་ཆོས་རིམ་པ་གནང་བཞིན་ཡོད་སྐོར་སྙན་སེང་དང་འབྲེལ། མགོན་པོ་གང་ཉིད་མཆོག་གིས་ཐུགས་སྐྱེད་དམ་བཅའ་བཞི་དང་། བྱེ་བྲག་ཏུ་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་ངོ་སྤྲོད་གནང་རྗེས་བོད་ནང་གི་ཛ་དྲག་གནས་སྟངས་སྤྱི་དང་། ཡང་སྒོས་རྒྱ་ནག་གཞུང་གིས་དྲག་གནོན་ཆེ་བའི་རྒྱ་སྒྱུར་སྲིད་བྱུས་ལག་བསྟར་གྱིས་ནང་པའི་སྐུ་འདྲ་གཏོར་བཅོམ་དང་། བོད་མིའི་སློབ་གྲྭ་ཕྱིར་བསྡུ། མི་སེར་སྤེལ་ཡུལ་གཏན་འཇགས་སློབ་གྲྭར་བོད་ཕྲུག་བཙན་འཇུག བཀའ་ཁྱབ་ཨང་ ༡༩ ཞེས་པ་ལག་བསྟར་གྱིས་བོད་མིའི་ཆོས་དད་རང་དབང་ལ་ཐེ་གཏོགས་བྱེད་བཞིན་པའི་གནས་སྟངས་གསལ་བཤད་གནང་ཡོད།
དེ་རྗེས་ཚོགས་མི་རྣམས་ཀྱི་དྲི་བ་ཁག་ལ་ལན་འདེབས་གསལ་བཤད་གནང་བ་མ་ཟད། ཚོགས་མི་འགའ་ཤས་ཀྱིས་ཚོགས་འདུ་འདི་ལྟ་བུ་ཕན་ཐོགས་ཆེན་པོ་འདུག་པས་སླད་མར་ཡང་བསྐོང་ཚོགས་གནང་སྐྱོང་ཡོང་བའི་རེ་སྐུལ་ཞུས། མཐའ་དོན་སྐུ་ཚབ་དོན་གཅོད་ནས་ཚོགས་མི་རྣམས་ཀྱིས་བོད་ཁང་གི་ཚོགས་མིའི་གྲངས་འབོར་སྤར་རྒྱུ་དང་། ས་གནས་དང་དབུས་ཀྱི་གྲོས་ཚོགས་འཐུས་མི་རྣམས་ལ་བོད་དོན་སྐོར་གླེང་སློང་གནང་རྒྱུ་མཚོན་པའི་བོད་དོན་གཏམ་བཤད་གོ་སྒྲིག གཞུང་འབྲེལ་དཔེ་དེབ་བགོ་འགྲེམས་གནང་ཕྱོགས་ཐད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་ཡོད་པ་བཅས།།
