༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་སུད་སི་སྐུ་ཚབ་དོན་གཅོད་ལས་ཁུངས་གཉིས་ཀྱིས་སུད་སིའི་གྲོང་ཁྱེར་ཇི་ནི་ཝར་གོ་སྒྲིག་གནང་བའི་ཇི་ནི་ཝ་བོད་དོན་གླེང་སྟེགས་ལེགས་པར་མཇུག་སྒྲིལ་ཡོད་པ་རེད།

དེ་ཡང་གླེང་སྟེགས་མཇུག་སྡོམ་མཛད་སྒོར་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། སུད་སི་ཇི་ནི་ཝར་གནས་འཁོད་ཐའེ་ཝན་གཞུང་ཚབ་ཆེན་མོ་ལྕམ་སྐུ་ནེ་ཀོལ་སུ་ (Nicole Su) ལགས་གཙོ་བཞུགས་གནང་ཡོད། གཞན་ཡང་མཛད་སྒོའིཐོག་བོད་མི་མང་ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་དང་རྣམ་རྒྱལ་ཚེ་དབང་ལགས། གསུང་བཤད་གནང་མཁན་རྣམ་པ། བོད་དོན་རྒྱབ་སྐྱོར་བ། ས་གནས་བོད་རིགས་ཚོགས་པའི་ལས་སྣེ་རྣམ་པ། ཚོགས་བཅར་བ་བཅས་ལྷན་ཞུགས་གནང་ཡོད་པ་རེད།འདི་ལོའི་ཇི་ནི་ཝ་བོད་དོན་གླེང་སྟེགས་ཀྱི་བརྗོད་གཞི་འདི་བཞིན་རྒྱ་ནག་གཞུང་གི་དབང་སྒྱུར་འོག་ཡོད་པའི་ས་ཁུལ་ཁག་ཏུ་འགྲོ་བ་མིའི་ཐོབ་ཐང་ཉམས་རྒུད་དུ་འགྲོ་བཞིན་པའི་སྐོར་ཡིན་པ་དང་། གླེང་སྟེགས་ཉིན་དང་པོའི་ཚོགས་ཐུན་དང་པོར་ཡུ་གུར་ལས་འགུལ་ཚོགས་པ་གསར་འཛུགས་གནང་མཁན་དང་འགན་འཛིན་ལྕམ་སྐུ་རུ་ཞན་ཨ་བྷ་སི་ (Rushan Abbas) ལགས་དང་། ཨ་རིར་རྟེན་གཞི་བྱས་པའི་ (Inter Mongol Network) ཞེས་པའི་ཚོགས་པའི་འགན་འཛིན་སྐུ་ཞབས་དུ་གཱར་ཇབ་ (Dugarjab L. hotala) ལགས། China Digital Times ཞེས་པའི་གསར་ལས་ཁང་གི་གཙོ་འཛིན་སྐུ་ཞབས་ (Dr. Xiao Qiang) ལགས། བཞུགས་སྒར་རྡ་སར་རྟེན་གཞི་བྱས་པའི་བོད་ཀྱི་འགྲོ་བ་མིའིི་ཐོབ་ཐང་དང་མང་གཙོ་འཕེལ་རྒྱལ་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་བཅས་ནས་ <<རྒྱ་ནག་གཞུང་གི་དབང་སྒྱུར་འོག་ཡོད་པའི་ས་ཁུལ་ཁག་གི་འགྲོ་བ་མིའི་ཐོབ་ཐང་གནས་སྟངས་སྐོར་>> གླེང་གནང་ཡོད།ཚོགས་ཐུན་གཉིས་པར་ Hong Kong Watch ཚོགས་པའི་སྤྱི་ཁྱབ་འགན་འཛིན་བྷན་ནེ་ཌིག་ཊི་ (Benedict Rogers) ལགས་དང་། ཊོ་རོན་ཊོ་གཙུག་ལག་སློབ་གཉེར་ཁང་གི་ (Citizen Lab) ཞེས་ཉམས་ཞིབ་ཁང་གི་འབྲེལ་ཡོད་སྐུ་ཞབས་ (Dr. Emile Dirks) ལགས། བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲས་མཐོང་ལྷ་སྒྲོན་ལགས་བཅས་ནས་ <<རྒྱ་ནག་གཞུང་གིས་མི་རིགས་སིམ་ཡལ་གྱི་སྲིད་བྱུས་དང་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་ལ་དྲག་གནོན་སྐོར་>> གསུང་བཤད་གནང་ཡོད།ཕྱི་ཚེས་ ༢༧ ཉིན་གླེང་སྟེགས་ཉིན་གཉིས་པའི་ཚོགས་ཐུན་དང་པོར་ཨིན་ཡུལ་ཝེ་སི་མིན་སི་ཊར་མཐོ་སློབ་གཙུག་ལག་སློབ་གཉེར་ཁང་གི་སྤྱི་ཚོགས་ཚན་རིག་སྡེ་ཚན་གྱི་འགན་འཛིན་སློབ་དཔོན་སྐུ་ཞབས་དིབ་ཡེཤ་ཨ་ནནྡ་ (Dibyesh Anand) ལགས་དང་། ཨ་བྷེར་ཊིན་གཙུག་ལག་སློབ་གྲྭ་ཆེན་མོའི་སློབ་དཔོན་ Dr. Martin A. Mills ལགས། འབུམ་རམས་པ་དགེ་རྒྱལ་ལོ་ལགས་བཅས་ནས་ <<བོད་གཙོས་པའི་རྒྱ་ནག་གཞུང་གི་དབང་སྒྱུར་འོག་ཡོད་པའི་ས་ཁུལ་ཁག་གི་ནང་འཛུགས་སྐྲུན་ཡར་རྒྱས་མིང་ཐོག་ནས་མི་སེར་སྤེལ་ཡུལ་གྱི་སྲིད་བྱུས་སྐོར་>> གསུང་བཤད་གནང་ཡོད། ཕྱོགས་མཚུངས་ཚོགས་ཐུན་གཉིས་པར་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་རང་དབང་ཁང་པའི་རྒྱ་ནག་དང་ཧོང་ཀོང་། ཐའེ་ཝན་བཅས་ཀྱི་ཐོག་ཉམས་ཞིབ་གནང་མཁན་ལྕམ་སྐུ་ Yaqiu Wang ལགས་དང་། ཨ་རིའི་ Washington Post གསར་ཤོག་གི་རྩོམ་སྒྲིག་པ་སྐུ་ཞབས་ Josh Rogin ལགས། ཕྱི་དྲིལ་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་ལྷ་སྒྲོན་ལགས་བཅས་ནས་ <<རྒྱལ་མཚམས་ལས་བརྒལ་བའི་དྲག་གནོན་དང་རྒྱལ་སྤྱིའི་སྤྱི་ཚོགས་ནང་ལྟ་སྲུང་བྱ་རའི་སྐོར་>> གསུང་བཤད་གནང་ཡོད་པ་རེད།

འདི་ལོའི་ཇི་ནི་ཝ་བོད་དོན་གླེང་སྟེགས་ཐེངས་ལྔ་པ་འདི་བཞིན་ཕྱི་ལོ་ ༢༠༢༣ ཟླ་ ༡༠ ཚེས་ ༢༦ དང་ ༢༧ ཉིན་གྲངས་གཉིས་རིང་ཚོགས་ཡོད་པ་བཅས། །