༄༅། །བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ནས་རྒྱ་གར་ལྷོ་ཕྱོགས་སྦེང་ལོར་དང་། མེ་སོར་ཁུལ་གྱི་མཐོ་སློབ་ཁག་ཏུ་ཡོད་པའི་བོད་པའི་སློབ་ཕྲུག་རྣམས་ལ་ནང་པའི་ལྟ་གྲུབ་ངོ་སྤྲོད་ལེགས་པར་གནང་ཡོད།

དེ་ཡང་ཕྱི་ཟླ་ ༩ ཚེས་ ༢༧ ཉིན་མེ་སོར་ཁུལ་གྱི་མཐོ་སློབ་ཁག་ཏུ་ཡོད་པའི་བོད་པའི་སློབ་ཕྲུག་ ༤༠ ཙམ་ལ་དགེ་བཤེས་ལྷག་རྡོར་ལགས་ནས་ནང་པའི་ལྟ་གྲུབ་ངོ་སྤྲོད་དང་འབྲེལ་དོན་སྙིང་ལྡན་པའི་མི་ཚེ་ཞིག་ཡོང་ཐབས་སུ་རྒྱུན་གཏན་ནས་བསམ་བློ་གཏོང་ཆོག་སྐོར། བོད་ཡིག་ཡར་རྒྱས་གཏོང་ཐབས་སྐོར་སོགས་གསུང་བཤད་དང་དེ་རྗེས་དྲི་བ་དྲིས་ལན་གནང་ཡོད།ཕྱི་ཚེས་ ༢༨ ཉིན་ཧུན་སོར་གངས་ཅན་རིག་གནས་སློབ་གྲྭར་ཟླ་དྲུག་ཟབ་ཁྲིད་ནང་ཡོད་པའི་མཐོ་སློབ་ཐོན་པའི་སློབ་ཕྲུག་རྣམས་ལ་ནང་པའི་ལྟ་གྲུབ་ངོ་སྤྲོད་གནང་ཡོད། ཕྱི་ཚེས་ ༢༩ སྔ་དྲོ་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ཆོགས་ཁང་དུ་དེ་གའི་སློབ་ཕྲུག་དང་འགྲོ་ཕན་སྨན་རྩིས་ཁང་མཐོ་སློབ་ཀྱི་སློབ་ཕྲུག་རྣམས་ལ་གསུང་བཤད་དང་དྲི་བ་དྲིས་ལན་གནང་ཡོད། དེ་བཞིན་དགོང་དྲོ་སྦེང་ལོར་བོད་ཁྱིམ་སྡོད་ཁང་དུ་མཐོ་སློབ་སློབ་ཕྲུག་རྣམས་ལ་ནང་པའི་ལྟ་གྲུབ་སྐོར་གསུང་བཤད་གནང་ཡོད། །