༄༅། །ཕྱི་ལོ་ ༢༠༢༣ ཟླ་བ་ ༩ པའི་ནང་དཔལ་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་བལ་ཡུལ་དུ་ཆིབས་བསྒྱུར་བསྐྱངས་གནང་མཛད་ཡོད་པ་དང་སྟབས་བསྟུན། ས་གནས་བཟོ་གཞིས་ལས་ཁུངས་ནས་བལ་ཡུལ་འཇོ་ལ་ཁེལ་བསམ་གྲུབ་གླིང་གཞིས་ཆགས་ཀྱི་གཞིས་མི་རྒན་རྒོན་གཙོས་པའི་གཞིས་མི་རྣམས་ལ་མཇལ་ཁ་དང་བཀའ་སློབ་ལམ་སྟོན་གནང་སྐྱོང་ཡོང་བའི་གསོལ་འདེབས་ཞུས་དོན་བཞིན། ཉེ་ལམ་བལ་ཡུལ་གནས་མཆོག་ཡང་ལ་ཤོད་དུ་དཔལ་ས་སྐྱ་ཁྲ་རིགས་བཤད་གྲྭ་བརྩེ་ཆེན་ཐུབ་བསྟན་ཆོས་ཀྱི་དགའ་ཚལ་གྱི་དབུ་འབྱེད་མཛད་སྒོ་ལེགས་གྲུབ་བྱུང་བསྟུན་ཕྱི་ལོ་༢༠༢༣ ཟླ་བ་ ༡༠ ཚེས་ ༡༧ ཉིན་རྒྱབ་༸སྐྱབས་རྗེ་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་འཇོ་ལ་ཁེལ་བསམ་གྲུབ་གླིང་གཞིས་ཆགས་སུ་ཞབས་སོར་འཁོད་གནང་མཛད་དེ་ལས་ཁུངས་ཀྱི་མདུན་ཐང་དུ་གཞིས་མི་རྒན་རྒོན་གཙོ་བོར་གྱུར་པའི་མི་མང་ཡོངས་ལ་བཟང་སྤྱོད་དང་བྱམས་བརྩེའི་སྐོར་བཀའ་སློབ་དང་། ལས་ཁུངས་ཀྱི་ཁང་མིག་གསར་པ་རྣམས་ལ་རབ་གནས་མཛད་ཡོད་པ་བཅས།།