༄༅།  །འདི་གར་ཨོསྟྲེ་ལི་ཡཱ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༩ ཚེས་ ༡༨ དང་ ༡༩ ཉིན་ཨོསྟྲེ་ལི་ཡཱའི་སྐུ་ཚབ་དོན་གཅོད་ལས་ཁུངས་ནས་ཨོ་གླིང་ཁུལ་གྱི་གཟའ་མཇུག་བོད་ཡིག་སློབ་གྲྭའི་དགེ་རྒན་རྣམས་ལ་དྲྭ་ཐོག་ཟབ་སྦྱོང་ཞིག་གོ་སྒྲིག་གནང་ཡོད།

དེ་ཡང་ཐོག་མ་ཚེས་ ༡༨ ཉིན་ཟབ་སྦྱོང་གི་དབུ་འབྱེད་སྐབས་སུ་སྐུ་ཚབ་དོན་གཅོད་ཀརྨ་སེང་གེ་ལགས་ནས་ཨོ་གླིང་ཁུལ་གྱིས་གཟའ་མཇུག་བོད་ཡིག་སློབ་གྲྭ་ཁག་གི་གནས་སྟངས་སྙིང་བསྡུས་ངོ་སྤྲོད་ཞུས་རྗེས་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཟབ་སྦྱོང་ནང་མཉམ་ཞུགས་གནང་མཁན་དགེ་ལས་ཡོངས་ལ་འཚམས་འདྲི་གནང་བ་དང་འབྲེལ་བོད་ཕྲུག་རྣམས་ལ་བོད་སྐད་སློབ་ཁྲིད་ཐད་ལ་ཁྱིམ་ཚང་མི་རེ་ངོས་ནས་ཐུགས་འགན་བཞེས་གལ་ཆེ་བ་དང་། དེ་བཞིན་བོད་ཀྱི་སྐད་ཡིག་སློབ་ཁྲིད་དང་མཉམ་དུ་བོད་ཕྲུག་རྣམས་བོད་མི་བཟང་པོ་ཞིག་བསྐྲུན་ཐབས་བྱ་རྒྱུ་ཤིན་ཏུ་གལ་ཆེན་པོ་ཡིན་པ་ལམ་སྟོན་གནང་།

ཤེས་ཪིག་ལས་ཁུངས་ནས་གཟའ་མཇུག་བོད་ཡིག་སློབ་གྲྭའི་ཆེད་སློབ་དེབ་དང་། ཁྲིད་ཆས་སོགས་དགོས་མཁོ་རྣམས་གང་ཐུབ་མཐུན་འགྱུར་གནང་རྒྱུ་ཡིན་པ་དང་། ད་དུང་ཡར་རྒྱས་གཏོང་ཕྱོགས་བསམ་འཆར་ཡོད་ན་ཤེས་རིག་ལས་ཁུངས་ལ་ཐད་ཀར་ཞུ་རོགས་གསུངས་ཡོད།

དེ་རྗེས་ཤེས་རིག་ལས་ཁུངས་ཀྱི་ཤེས་ཡོན་ལྷན་ཚོགས་ཀྱི་སྤྱི་ཁྱབ་འགན་འཛིན་བསྟན་འཛིན་པདྨ་ལགས་ཀྱིས་སི་ཤེས་ཡོན་སློབ་གསོ་ངོ་སྤྲོད་དང་། དེ་རྗེས་དྷ་སྟེང་བོད་ཁྱིམ་སློབ་གྲྭའི་བོད་ཡིག་རྒྱུན་སྟོན་པ་རྒན་མིང་ཆུང་ལགས་ཀྱིས་བྱིས་པའི་ཀློག་རྩལ་གོང་མཐོར་གཏོང་ཐབས་སྐོར་ཟབ་ཁྲིད་གནང་ཡོད། ཟབ་སྦྱོང་གི་ཉིན་གཉིས་པའི་ཉིན་དྷ་སྟེང་བོད་ཁྱིམ་སློབ་གྲྭའི་སྔོན་དགེ་བྱམས་པ་པད་མོ་ལགས་དང། མེས་དབོན་གཙུག་ལག་དཔེ་སྟོན་སློབ་གྲྭའི་བོད་དགེ་པ་སངས་ཚེ་རིང་ལགས་ཀྱིས་བྱེད་སྒོ་དང་ཁྲིད་ཆས་ཐོག་ནས་བོད་ཡིག་སློབ་ཁྲིད་གནང་ཕྱོགས་སྐོར་ཟབ་སྦྱོང་གནང་ཡོད། ད་རེས་ཀྱི་ཟབ་སྦྱོང་འདིའི་ཐོག་ཨོ་གླིང་ས་གནས་ཁག་ ༧  ནས་གཟའ་མཇུག་སློབ་གྲྭའི་དགེ་རྒན་ ༥༠ ཙམ་མཉམ་ཞུགས་ཡོད། །