༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༡༣ ཉིན་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཨོསྟྲེ་ལི་ཡཱའི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་ཇེ་ནེཊ་ར་ཧི་སི་ལགས་དང་མཇལ་འཕྲད་ཀྱིས་ཁོང་མོས་བོད་དོན་ལ་རྒྱབ་སྐྱོར་མུ་མཐུད་གནང་དང་གནང་མུས་ལ་ཐུགས་རྗེ་ལེགས་འབུལ་ཞུས་ཡོད།
དེ་ཡང་གྲོས་ཚོགས་འཐུས་མི་ཇེ་ནེཊ་ར་ཧི་རི་ལགས་ཀྱིས་ཨོསྟྲེ་ལི་ཡཱའི་གྲོས་ཚོགས་གོང་མའི་ནང་དུ་བོད་དོན་ཐེངས་མང་གླེང་སློང་གནང་གི་ཡོད་པ་མ་ཟད། ཉེ་ལམ་གྲོས་ཚོགས་ནང་དུ་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་སྡུག་འགྲོ་བཞིན་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་སྒོ་སོགས་ཀྱི་ཐད་གླེང་སློང་ཤུགས་ཆེ་གནང་ཡོད། མཇལ་མོལ་སྐབས་ཁོང་རྣམ་གཉིས་ནས་འབྱུང་འགྱུར་བོད་དོན་ཞུ་གཏུག་གནང་སྒོ་དང་། གྲོས་ཚོགས་འཐུས་མི་རྣམས་ནས་བོད་དོན་ལ་རྒྱབ་སྐྱོར་མུ་མཐུད་གནང་ཕྱོགས་སྐོར་གྲོས་བསྡུར་གནང་ཡོད། མཇལ་འཕྲད་སྐབས་སྐུ་ཚབ་དོན་གཅོད་ལྷན་དུ་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ལྷན་བཅར་ཞུས་ཡོད་པ་བཅས།།
