༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༡༧ ནས་ ༡༩ བར་འཚོག་པའི་ཨོསྟྲེ་ལི་ཡཱ་ངལ་རྩོལ་སྲིད་དོན་ཚོགས་པའི་རྒྱལ་ཡོངས་ཚོགས་ཆེན་ཐེངས་ ༤༩ པའི་ཐོག་རྒྱ་ནག་གཞུང་གིས་བོད་མིའི་རང་དབང་དང་ཐོབ་ཐང་རྡོག་རོལ་གཏོང་བཞིན་པར་སྐྱོན་བརྗོད་ཀྱི་སྤྱི་མོས་གྲོས་ཆོད་ཅིག་བཞག་འདུག

དེ་ཡང་ངལ་རྩོལ་སྲིད་དོན་ཚོགས་པའི་གྲོས་ཚོགས་འཐུས་མི་ཇུ་ལེན་ཧིལ་(Julian Hill)ལགས་ཀྱིས་གྲོས་ཆོད་ངོ་སྤྲོད་གནང་སྟེ། ངལ་རྩོལ་སྲིད་དོན་ཚོགས་པ་ངོས་ནས་རྒྱ་ནག་ནང་གི་ཡུ་གུར་མི་རིགས་དང་། ཤར་ཏུར་ཀིསྠན་གྱི་གྲངས་ཉུང་ཆོས་ལུགས་ཚོགས་ཁག་གི་འགྲོ་བ་མིའི་ཐོབ་ཐང་རྡོག་རོལ་བརྩིས་མེད་གཏོང་བཞིན་པར་སྐྱོན་བརྗོད་བྱ་རྒྱུ་མ་ཟད། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྙན་ཐོ་ནང་གསལ་སྡུག་སྦྱོང་མནར་གཅོད་དང་། འཁྲིག་སྤྱོད། ཕོ་མོའི་རྟགས་ལ་དམིགས་ཏེ་སྡུག་རྩུབ་གཏང་རྒྱུ་སོགས་ནི་འགྲོ་བ་མི་རིགས་ལ་དམིགས་པའི་ནག་ཉེས་ཡིན། བོད་ནང་རྒྱ་ནག་གཞུང་གིས་ཤེས་ཡོན་དང་། ཆོས་ལུགས། རིག་གཞུང་། སྐད་ཡིག་བཅས་པ་རྩ་མེད་གཏོང་བཞིན་པར་ངལ་རྩོལ་སྲིད་དོན་ཚོགས་པ་བློ་འཚབ་ཆེ་ཞིང་། གཞན་ཡང་ང་ཚོས་བོད་ཕྲུག་ས་ཡ་གཅིག་ལྷག་ཕ་མ་དང་ཁ་བྲལ་ཏེ་གཞུང་གཉེར་གཏན་འཇགས་སློབ་གྲྭ་ཁག་ཏུ་བཙན་འཇུག་བྱེད་བཞིན་པ་དང་། ཆབ་སྲིད་ཀྱི་གནད་དོན་གླེང་བར་འཛིན་བཟུང། ཆོས་དད་དམ་བསྒྲགས། ཚད་མཐོའི་དོགས་སྲུང་བྱ་ར། ཕྱིར་བསྐྱོད་དམ་བསྒྲགས། རྒྱ་གཞུང་གིས་བོད་ཀྱི་སྲོལ་རྒྱུན་རིག་གཞུང་ཐོག་འཛིན་པའི་སྲིད་བྱུས་སྐོར་ཤེས་རྟོགས་བྱུང་། ཞེས་སོགས་བོད་ཐེ་བའི་རྒྱ་ནག་གི་བཙན་འོག་ཏུ་ཡོད་པའི་མི་རིགས་ཐོག་དྲང་བདེན་མིན་པའི་སྲིད་བྱུས་ལག་བསྟར་དང་། འགྲོ་བ་མིའི་ཐོབ་ཐང་རྡོག་རོལ། དྲག་རྩུབ་བཀོལ་སྤྱོད་བྱེད་བཞིན་པར་སྐྱོན་བརྗོད་གནང་ཡོད་པ་རེད།

ངལ་རྩོལ་སྲིད་དོན་ཚོགས་པ་ནི་ཨོསྟྲེ་ལི་ཡའི་སྲིད་དོན་ཚོགས་པ་ཆེ་གྲས་ཤིག་ཡིན་ཞིང་། ཕྱི་ལོ ༢༠༢༢ ཟླ་བ་ ༠༥ ནས་བཟུང་སྲིད་དོན་ཚོགས་པ་དེ་སྲིད་བློན་ཨན་ཊོ་ནི་ཨལ་བྷ་ནིས་(Anthony Albanese) ལགས་ཀྱི་དབུ་ཁྲིད་འོག་ཨོསྟྲེ་ལི་ཡའི་གཞུང་འཛིན་ཚོགས་པ་ཆགས་ཡོད་པ་བཅས།།