༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༡༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་ན་རེནྡྲ་མོ་དཱི་མཆོག་དགུང་ལོ་ ༧༣ ཕེབས་པའི་འཁྲུངས་སྐར་ལ་འཚམས་འདྲི་མཛད་འདུག
དེ་ཡང་འཚམས་འཕྲིན་ནང་མགོན་པོ་མཆོག་གིས། ངས་གོ་སྐབས་འདི་བརྒྱུད་རྒྱ་གར་གྱིས་འཛམ་གླིང་གཅིག ཁྱིམ་ཚང་གཅིག མདུན་ལམ་གཅིག་ཅེས་པའི་བརྗོད་སྙིང་ལྡན་པའི་འཛམ་གླིང་སྟོབས་ཆེན་རྒྱལ་ཁབ་ཉི་ཤུའི་ཚོགས་འདུ་གཙོ་སྐྱོང་གོ་སྒྲིག་འཐུས་ཚང་གནང་ཐུབ་པར་ལེགས་གསོལ་བསྔགས་བརྗོད་ཞུ། ཚོགས་འདུའི་བརྗོད་སྙིང་དེ་ངོས་ཀྱི་ཡིད་ལ་འཐད་པོ་བྱུང་། ངོས་ཀྱིས་འགྲོ་བ་མི་རིགས་གཅིག་གྱུར་ལ་ཡིད་ཆེས་བརྟན་པོ་འཆང་གི་ཡོད་པ་མ་ཟད། དུས་ཚོད་ནམ་བྱུང་ལ་དེའི་གལ་གནད་ལ་བསྔགས་བརྗོད་དགོས་པའི་སེམས་འགུལ་གཏོང་གི་ཡོད།
ངོས་རང་རྒྱ་གར་དུ་དུས་ཡུན་རིང་ཤོས་གནས་སྡོད་བྱེད་མཁན་གྱི་མགྲོན་པོ་ཡིན་པའི་ཆ་ནས་རྒྱ་གར་གྱིས་འཛམ་གླིང་སྟོབས་ཆེན་རྒྱལ་ཁབ་ཉི་ཤུའི་ཚོགས་འདུ་གཙོ་སྐྱོང་གནང་རྒྱུ་མཚོན་པའི་རྒྱལ་སྤྱིའི་སྡིངས་ཆའི་སྟེང་གཟེངས་སུ་ཐོན་བཞིན་པར་དགའ་བ་སྒོམ་གྱི་ཡོད། ཚོགས་འདུ་དེ་ནི་ང་ཚོ་སའི་གོ་ལ་འདིར་ཕན་ཚུན་གཅིག་ལ་གཅིག་བརྟེན་གྱི་ཚུལ་དུ་གནས་ཡོད་པ་གསལ་སྟོན་བྱ་རྒྱུའི་གོ་སྐབས་ཤིག་ཀྱང་ཡིན།
རྒྱ་གར་ནས་བྱུང་བའི་འཚེ་བ་མེད་པ་དང་སྙིང་རྗེའི་སྲོལ་རྒྱུན་ལ་མཚོན་ན་ལོ་ངོ་སྟོང་ཕྲག་གི་ལོ་རྒྱུས་ཡོད་པ་ཞིག་ཡིན་པ་མ་ཟད། རྒྱ་གར་ནི་མང་གཙོའི་རྒྱལ་ཁབ་ཆེ་ཤོས་དང་གོ་ལའི་སྟེང་གི་མི་འབོར་མང་ཤོས་ཀྱི་རྒྱལ་ཁབ་ཅིག་ཡིན་པའི་ཆ་ནས་ཆོས་ལུགས་མཐུན་འབྲེལ་གྱི་ལམ་སྲོལ་ཐོག་ནས་རྒྱ་གར་གྱིས་འཛམ་བུ་གླིང་ལ་དཔེ་མཚོན་བསྟན་ཐུབ། དེ་དང་ཆབས་ཅིག་རྒྱ་གར་གྱི་ཚན་རིག་འཕྲུག་ཆས་ཡར་ཐོན་གྱི་ནུས་པས་རྒྱ་གར་གྱི་འགོ་ཁྲིད་ནུས་རྩལ་གོང་མཐོར་གཏོང་ངེས་རེད།
ངོས་ཀྱིས་བོད་མི་ཡོངས་ཀྱི་ཚབ་ཞུས་ཏེ་རྒྱ་གར་གཞུང་དམངས་གཉིས་ནས་བོད་མི་རྣམས་ལ་འདས་པའི་ལོ་ངོ་ ༦༤ རིང་རྒྱབ་སྐྱོར་ཕན་གྲོགས་རླབས་ཆེ་གནང་བར་བཀའ་དྲིན་རྗེས་དྲན་ཞུ། ཞེས་དང་།
མཐར་མགོན་པོ་མཆོག་གིས་སྲིད་བློན་མོ་དཱི་མཆོག་སྐུ་ཁམས་གསལ་ཐང་དང་། རྒྱ་གར་མི་མང་གི་རེ་བ་དང་མངོན་འདོད་བསྒྲུབ་རྒྱུ་མཚོན་པའི་བྱམས་བརྩེ་དང་ཞི་བདེ་ལྡན་པའི་འཛམ་གླིང་ཞིག་བསྐྲུན་པར་བྱ་བ་ལམ་ལྷོངས་ཡོང་བའི་ཐུགས་སྨོན་མཛད་འདུག་པ་བཅས།།
