༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ལིབ་ཡ་རྒྱལ་ཁབ་ནང་དུ་ཆུ་ལོག་གིས་རྐྱེན་བྱས་ཏེ་མི་ཤི་སྐྱོན་ཚབས་ཆེ་བྱུང་བར་ཐུགས་གསོའི་གསུང་འཕྲིན་སྩལ་གནང་ཡོད།

དེ་ཡང་གསུང་འཕྲིན་ནང་མགོན་པོ་མཆོག་གིས། ངོས་ཀྱིས་རྐྱེན་ངན་གོད་ཆགས་ཁྲོད་འདས་གྲོངས་སུ་འགྲོ་མཁན་རྣམས་ལ་བསྔོ་སྨོན་དང་། ཁོང་ཅག་གི་ཤུལ་ལུས་ནང་མི་རྣམས་དང་གནོད་སྐྱོན་འཕོག་མཁན་ཡོངས་ལ་སེམས་གསོ་ཞུ་རྒྱུ་ཡིན།

གནོད་སྐྱོན་འཕོག་ཡུལ་དུ་ལིབ་ཡ་གཞུང་དང་རྒྱལ་སྤྱིའི་ཚོགས་སྡེ་ཁག་གིས་ངལ་སེལ་སྐྱོབ་གསོ་གནང་བཞིན་ཡོད་པ་ངོས་ཀྱིས་ཤེས་ཀྱི་ཡོད། དེ་ལྟ་བུའི་རྒྱལ་སྤྱིའི་སྤྱི་ཚོགས་ངོས་ནས་བློ་འཚབ་དང་རྒྱབ་སྐྱོར་གནང་བཞིན་པ་དེས་གོད་ཆགས་ཀྱི་ངན་འབྲས་ཚབས་ཆུང་དུ་གཏོང་བར་ཕན་ཐོགས་ཤིང་། ངོས་ཀྱིས་ལིབ་ཡ་མི་མང་ལ་གདུང་སེམས་མཉམ་སྐྱེ་མཚོན་ཆེད་དགའ་ལྡན་ཕོ་བྲང་ཐེབས་རྩ་ནས་ངལ་སེལ་སྐྱོབ་གསོའི་ཆེད་ཞལ་འདེབས་འབུལ་གྱི་ཡོད་ཅེས་བཀའ་སྩལ་ཡོད་པ་བཅས།།