༄༅། །མོ་རོ་ཀོ་རྒྱལ་ཁབ་ནང་དུ་ས་འགུལ་གོད་ཆགས་ཀྱིས་རྐྱེན་བྱས་ཏེ་མི་རྒྱུ་ཟོག་གསུམ་ལ་གནོད་སྐྱོན་ཚབས་ཆེ་ཕོག་པའི་ཡིད་སྐྱོའི་གནས་ཚུལ་ཐོན་པར་ཕྱི་ལོ་ ༢༠༢༣ ཟླ་བ་ ༠༩ ཚེས་ ༡༡ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མོ་རོ་ཀོའི་སྲིད་བློན་མཆོག་ལ་ཐུགས་གསོ་མཛད་ཡོད།

དེ་ཡང་ཐུགས་གསོའི་གསུང་འཕྲིན་ནང་མགོན་པོ་མཆོག་གིས། ངོས་ཀྱི་དཔལ་ལྡན་སྲིད་བློན་མཆོག་དང་། གོད་ཆགས་ལ་བརྟེན་ནས་སྲོག་སྐྱོན་ཕོག་མཁན་རྣམས་ཀྱི་ལྟོས་བཅས་ནང་མི་ལྷན་རྒྱས་ལ་སེམས་གསོ་དང་། གནོད་སྐྱོན་འཕོག་མཁན་ཡོངས་ཀྱི་ཆེད་སྨོན་ལམ་འདེབས་ཀྱི་ཡོད།

སྐུ་ཉིད་ཀྱི་སྲིད་གཞུང་ངོས་ནས་ས་འགུལ་རྒྱག་ཡུལ་དུ་ངལ་སེལ་སྐྱོབས་གསོ་གནང་གི་ཡོད་པ་ཤེས་ཀྱི་ཡོད་ལ། དེའི་ཐོག་རྒྱལ་སྤྱིའི་མི་མང་ནས་སྐྱོབས་གསོ་གནང་བཞིན་པ་ནི་སྙིང་སྟོབས་འཕེལ་འོས་པ་ཞིག་ཡིན། ངོས་ནས་མོ་རོ་ཀོ་མི་མང་ལ་གདུང་སེམས་མཉམ་སྐྱེ་མཚོན་ཆེད་དགའ་ལྡན་ཕོ་བྲང་གི་ཐེབས་རྩ་བརྒྱུད་ངལ་སེལ་སྐྱོབས་གསོའི་ཆེད་ཞལ་འདེབས་འབུལ་གྱི་ཡོད། ཅེས་བཀའ་སྩལ་ཡོད་པ་བཅས།།