༄༅། །ལྷོ་ཀ་ཕི་རི་ཀའི་རྒྱལ་སྲས་མང་གོ་སུ་ཐུ་བུ་ཐེ་ལེ་ཛི་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་གི་ཤུལ་ལུས་ནང་མི་ལྷན་རྒྱས་དང་རྒྱབ་སྐྱོར་བ་རྣམས་ལ་ཐུགས་གསོ་མཛད་ཡོད་པ་རེད།

དེ་ཡང་ཐུགས་གསོའི་གསུང་འཕྲིན་ནང་མགོན་པོ་མཆོག་གིས། ངོས་ཀྱིས་ཁོང་རང་ཐེངས་འགའ་མཇལ་རྒྱུའི་གོ་སྐབས་བྱུང་། ཁོང་ལ་མཚོན་ན་ང་དང་བོད་མི་རྣམས་ཀྱི་གྲོགས་པོ་བཟང་པོ་ཞིག་ཡིན་ལ། དགུང་ལོ་ ༩༥ བར་དུ་སྐུ་ཚེ་དོན་དང་ལྡན་པ་སྐྱལ་གནང་ཡོད།

ཞིང་གཤེགས་རྒྱལ་སྲས་མང་གོ་སུ་ཐུ་མཆོག་གིས་བོད་མིའི་རང་དབང་འཐབ་རྩོད་ལ་དོ་སྣང་དང་རྒྱབ་སྐྱོར་གཡོ་མེད་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན། ཞེས་བཀའ་སྩལ་ཡོད་པ་བཅས།།