༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༧ ཉིན་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་སམ་བྷོ་ཊ་བོད་སློབ་ཚོགས་པའི་འགན་འཛིན་ལྷན་ཚོགས་ཐེངས་བརྒྱད་པ་དང་བཅུ་དྲུག་པ་གཉིས་བསྐོང་ཚོགས་གནང་ཡོད་པ་རེད།

དེ་ཡང་སམ་བྷོ་ཊ་བོད་སློབ་ཚོགས་པའི་འགན་འཛིན་ལྷན་ཚོགས་ཐེངས་བརྒྱད་པ་ལྡི་ལི་སྐུ་ཚབ་དོན་གཅོད་སྤྱི་ཟུར་བློ་བཟང་ཤཱསྟྲི་ལགས་ཀྱི་གཙོ་སྐྱོང་འོག་ཚོགས་གཞོན་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་དང་། ཚོགས་མི་སྐུ་ཞབས་གྷུ་ལི་ཡ་ (S.N Gulia) ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། རྡ་ས་བོད་ཁྱིམ་སློབ་གྲྭའི་སྤྱི་ཁྱབ་འགན་འཛིན་བསོད་ནམས་སྲི་གཅོད་ལགས། སམ་བྷོ་ཊ་བོད་སློབ་ཚོགས་པའི་ངེས་སྟོན་པ་ཚེ་རིང་དོན་གྲུབ་ལགས་ཕེབས་ཞུགས་ཐོག་དམིགས་བསལ་སྐུ་མགྲོན་དུ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་ཕེབས་ཡོད། སྐབས་དེར་འགན་འཛིན་ལྷན་ཚོགས་ཀྱི་ཚོགས་གཙོ་བསྐོ་བཞག་དང་འབྲེལ་བའི་ཁྲིམས་དོན་སློབ་སྟོན་དང་། འཛིན་སྐྱོང་བཀའ་ཤག་གི་ལམ་སྟོན་ལྟར་འགན་འཛིན་ལྷན་ཚོགས་ནས་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་སམ་བྷོ་ཊ་བོད་སློབ་ཚོགས་པའི་འགན་འཛིན་ལྷན་ཚོགས་ཀྱི་ཚོགས་གཙོར་མོས་མཐུན་བསྐོ་བཞག་དང་། ལས་ཁྱུར་ཚོགས་གཙོ་ལྡི་ལི་སྐུ་ཚབ་དོན་གཅོད་བློ་བཟང་ཤཱསྟྲི་ལགས་སུ་ཐུགས་རྗེ་ལེགས་འབུལ་ཞུས་ཐོག ཚོགས་འདུའི་ནང་སམ་བྷོ་ཊ་བོད་སློབ་ཚོགས་པའི་འཛིན་སྐྱོང་དང་ཤེས་ཡོན་ཐད་ཀྱི་གྲོས་གཞི་ཁག་ཅིག་ཐོག་གྲོས་མོལ་ཞིབ་ལྷུག་གནང་ཡོད། དེ་དང་ཕྱོགས་མཚུངས་གོང་ཚེས་ཉིན་སམ་བྷོ་ཊ་བོད་སློབ་ཚོགས་པའི་འགན་འཛིན་ལྷན་ཚོགས་ཐེངས་བཅུ་དྲུག་པ་བསྐོང་ཚོགས་གནང་ཡོད་ཅིང་། སྐབས་དེར་ཚོགས་འདུའི་གཙོ་སྐྱོང་འགན་འཛིན་ལྷན་ཚོགས་ཀྱི་ཚོགས་གཙོ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་གནང་བའི་ཐོག ཚོགས་གཞོན་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། རྡ་ས་བོད་ཁྱིམ་སློབ་གྲྭའི་སྤྱི་ཁྱབ་འགན་འཛིན་བསོད་ནམས་སྲི་གཅོད་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས། སམ་བྷོ་ཊ་བོད་སློབ་ཚོགས་པའི་ངེས་སྟོན་པ་ཚེ་རིང་དོན་གྲུབ་ལགས་བཅས་ཕེབས་ཞུགས་གནང་སྟེ། གྲོས་གཞི་ཁག་གི་ཐོག་བགྲོ་གླེང་ཞིབ་ཕྲ་གནང་སྟེ་མོས་མཐུན་བཀའ་ཁྲོལ་གནང་ཡོད་པ་བཅས།།