༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༡ ནས་ ༠༣ བར་རྒྱ་གར་གྱི་གྷོ་ཝ་མངའ་སྡེར་འཚོགས་པའི་རྒྱལ་ཡོངས་འབྲེལ་ཡོད་ཚོགས་མིའི་འདུ་འཛོམས་ (National Associate Member Mixer) ཞེས་པའི་ཐོག་ཨིན་ཊོས་ཚོང་ལས་ཁང་ (The Indus Entrepreneurs) གི་ཚོགས་གཙོ་ཇི་ཏེནྡྲ་ན་ཡག་ (Jitendra Nayak) ལགས་ཀྱིས་མགྲོན་འབོད་ལྟར་རྒྱ་གར་བོད་དོན་རྒྱབ་སྐྱོར་ཚོགས་པའི་ལྷོ་ཕྱོགས་ཁུལ་གྱི་ཟུང་སྦྲེལ་ཚོགས་གཙོ་ཨམ་རུཊ་ཇོ་ཤི་ (Amrut Joshi) ལགས་དང་། ལྷོ་སྤྱི་འཇིགས་མེད་ཚུལ་ཁྲིམས་ལགས། མོན་གྷོ་འདོད་རྒུ་གླིང་གི་ཆུའི་ཚོགས་ཆུང་གི་ཚོགས་གཙོ་བསྟན་འཛིན་དྭགས་པོ་ལགས་ལྷན་ཞུགས་གནང་ཡོད། སྐབས་དེར་སྐུ་ཞབས་ཨམ་རུཊ་ཇོ་ཤི་ལགས་ཀྱིས་ཧུབ་ལི་གྲོང་སྡེའི་ལོ་རྒྱུས་དང་། ཁོང་དང་བོད་མིའི་བར་གྱི་འབྲེལ་བའི་སྐོར་གསུངས་པ་མ་ཟད། ཚོགས་བཅར་བ་རྣམས་ནས་བོད་དོན་དང་བོད་མིའི་སྐོར་དོ་སྣང་གནང་དགོས་པའི་འབོད་སྐུལ་ཞུས་གྲུབ་མཚམས་ལྷོ་སྤྱི་འཇིགས་མེད་ཚུལ་ཁྲིམས་ལགས་ནས་བོད་དང་། བོད་ཀྱི་ས་བབ་ཆགས་ཡུལ་གྱི་གལ་གནད། རྒྱ་ནག་གིས་བོད་བཙན་བཟུང་བྱས་རྗེས་བོད་མི་རྣམས་ནས་དཀའ་སྡུག་མྱངས་ཚུལ། རྒྱ་གར་གཞུང་གིས་རོགས་སྐྱོར་འོག་གཞིས་ཆགས་དང་སློབ་གྲྭ་གསར་འཛུགས་གནང་བའི་བརྒྱུད་རིམ་སྐོར་གསུངས་ཡོད།

བསྟན་འཛིན་དྭགས་པོ་ལགས་ཀྱིས་མོན་གྷོ་འདོད་རྒུ་གླིང་དུ་ཆུའི་ཚོགས་ཆུང་ངོས་ནས་གནམ་གཤིས་འགྱུར་ལྡོག་གི་དཀའ་ངལ་ལ་གདོང་ལེན་ཆེད་ལས་གཞི་ཇི་སྤེལ་སྐོར་གསལ་བཤད་གནང་། ཚོགས་འདུའི་ཟུར་དུ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། སྐུ་ཞབས་ཨམ་རུཊ་ཇོ་ཤི་ལགས་ནས་བོད་མི་ཚོང་པ་ཁག་ཅིག་དང་ཐུག་འཕྲད་ཀྱིས་དཀའ་ངལ་ཇི་ཡོད་གསན་ཏེ། དེ་དོན་དཀའ་སེལ་ཡོང་ཐབས་འབད་རྩོལ་ཞུ་རྒྱུ་ཡིན་སྐོར་གསུངས་ཡོད་པ་བཅས།།