༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༢ ཉིན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཟུང་སྦྲེལ་ཚོགས་གཙོ་སྐུ་ཞབས་སུ་རེནྡྲ་ཀུ་མཱར་ (Surendra Kumar) ལགས་དང་། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ས་གནས་ཡན་ལག་གི་ཚོགས་གཙོ་སོམ་ཡ་དིབ་དཏྟ་ (Soumyadeep Dutta) ལགས། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་ཐུབ་བསྟན་རིག་འཛིན་ལགས་དང་འབྲེལ་མཐུད་པ་གཞོན་པ་བསྟན་འཛིན་འབྱོར་ལྡན་ལགས་སྒང་ཏོག་ཏུ་བོད་མིའི་མང་གཙོའི་དུས་ཆེན་གྱི་མཛད་སྒོར་ལྷན་ཞུགས་གནང་ཡོད།
མང་གཙོའི་དུས་ཆེན་གྱི་སྐུ་མགྲོན་གཙོ་བོར་འབྲས་ལྗོངས་མངའ་སྡེ་གཞུང་གི་ཆོས་རིག་དང་། གྲོང་གསེབ་ཡར་རྒྱས། མཉམ་ལས་ལྷན་ཁང་གི་བློན་ཆེན་བསོད་ནམས་བླ་མ་མཆོག་དང་། མངའ་སྡེའི་གྲོས་ཚོགས་འཐུས་མི། ཕྱོགས་བཞུགས་སྤྱི་འཐུས་དབུ་དཀར་ཚང་གཡུ་སྒྲོན་ལགས། ས་གནས་འགོ་འཛིན་ལྷག་པ་ཚེ་རིང་ལགས་ལྷན་ཞུགས་ཐོག་ས་གནས་འགོ་འཛིན་ལྷག་པ་ཚེ་རིང་ལགས་དང་། ཕྱོགས་བཞུགས་སྤྱི་འཐུས་དབུ་དཀར་ཚང་གཡུ་སྒྲོན་ལགས་ཀྱིས་བཀའ་ཤག་དང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་རྗེས་ཆེ་བསྟོད་སྐུ་མགྲོན་སུ་རེནྡྲ་ཀུ་མཱར་ལགས་ཀྱིས་མངའ་སྡེའི་བློན་ཆེན་བསོད་ནམས་བླ་མ་ལགས་སུ་ཧི་མ་ལ་ཡའི་མངའ་སྡེའི་འགོ་ཁྲིད་ལྷན་ཚོགས་ཀྱི་ཚོགས་འདུ་བསྐོང་ཚོགས་ཀྱིས་རྒྱ་གར་དབུས་གཞུང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བ་རཏ་རཏྣ་དབུལ་རྒྱུ་མཚོན་པའི་རྒྱ་གར་གྱི་བདེ་འཇགས་དང་འབྲེལ་བའི་སྐོར་སྙན་སེང་གྲོས་མོལ་གནང་བའི་འབོད་སྐུལ་ཞུས་ཐོག རྒྱ་གར་གཞུང་གིས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་གནང་གལ་དང་། ཧིན་བོད་མཛའ་འབྲེལ་ཚོགས་པས་རྒྱ་གར་རྒྱལ་ཡོངས་སུ་ཡན་ལག་ཚོགས་པ་གསུམ་བརྒྱ་འཛུགས་རྒྱུའི་འཆར་གཞིའི་སྐོར་གསུངས་ཡོད།
དེ་བཞིན་མཛད་སྒོའི་ཐོག་སོམ་ཡ་དིབ་དཏྟ་ལགས་ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་ཐུབ་བསྟན་རིག་འཛིན་ལགས་ནས་ཀྱང་འཕགས་བོད་ཀྱི་འབྲེལ་བ་དང་། བོད་ནང་གི་ཛ་དྲག་གནས་སྟངས། རྒྱ་གར་ནང་དུ་བོད་དོན་གོ་རྟོགས་སྤེལ་རྒྱུ་སོགས་ཀྱི་སྐོར་གསུང་བཤད་གནང་ཡོད་པ་བཅས།།
