༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༢༤ ནས་ ༢༧ བར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་ལས་ཁུངས་ཀྱི་གོ་སྒྲིག་འོག་རྒྱ་གར་གྱི་ཕྱི་འབྲེལ་གསར་འགོད་ལྷན་ཚོགས་ཀྱི་ཚོགས་མི་སྐུ་ཚབ་བཞི་བཞུགས་སྒར་རྡ་རམ་ས་ལར་ཕེབས་ཏེ་བོད་ཀྱི་གནད་དོན་དང་། བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས། བཙན་བྱོལ་བོད་མིའི་གནས་སྟངས་སོགས་ཀྱི་སྐོར་རྒྱུས་ལོན་ཞུས་ཡོད་པ་རེད།

ཚོགས་མི་སྐུ་ཚབ་རྣམ་པ་བཞི་ནི་ (StratNews Global) ཞེས་པའི་གསར་ཁང་གི་ཕྱི་འབྲེལ་རྩོམ་སྒྲིག་པ་སཱུརྱཱ་གཾགཱདྷ་རན་ (Surya Gangadharan) ལགས་དང་། ཧིནྡུ་གསར་ཁང་གི་ཕྱི་འབྲེལ་རྩོམ་སྒྲིག་པ་སུ་ཧཱ་སི་ནཱི་ཧཻདར་ (Suhasini Haider) ལགས། (ABP Live) ཞེས་པའི་གསར་ཁང་གི་རྩོམ་སྒྲིག་པ་ན་ཡ་ནི་མཱ་བཱ་སུ་(Nayanima Basu) ལགས། (United News of India) ཞེས་པའི་གསར་ཁང་གི་དམིགས་བསལ་གསར་འགོད་པ་ས་ཅིན་བུ་དྷཻལི་ཡཱ་ (Sachin Budhauliya) ལགས་བཅས་ཡིན་ཞིང་། ཁོང་རྣམས་བཞུགས་སྒར་དུ་བོད་མིའི་སྒྲིག་འཛུགས་དང་བོད་ཀྱི་འགྲེམས་སྟོན་ཁང་དུ་གཟིགས་སྐོར་ལ་ཕེབས་པ་མ་ཟད། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་མཆོག་སོགས་གནད་ཡོད་མི་སྣ་ཁག་དང་མཇལ་མོལ་གནང་ཡོད། ཕྱི་ཚེས་ ༢༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྩོམ་སྒྲིག་པ་རྣམས་ལ་མཇལ་ཁ་སྩལ་ཞིང་། སྐབས་དེར་མགོན་པོ་མཆོག་གིས་རྒྱ་གར་གྱི་གནའ་བོའི་རིག་གཞུང་སླར་གསོའི་དགོངས་བཞེད་སྐོར་བཀའ་སློབ་སྩལ་ཡོད། དེ་བཞིན་ཁོང་རྣམས་ནས་བཞུགས་སྒར་དུ་ཆགས་པའི་བོད་ཀྱི་དཔེ་མཛོད་ཁང་དང་། འགྲོ་ཕན་སྨན་རྩིས་ཁང་། བོད་ཀྱི་གཞོན་ནུ་ལྷན་ཚོགས། བོད་རང་བཙན་སློབ་ཕྲུག་ཚོགས་པ། བོད་རྒྱལ་ཡོངས་མང་གཙོ་ཚོགས་པ། རྡ་སྟེང་བོད་ཁྱིམ་བཅས་སུ་ཕེབས་ཏེ་བཙན་བྱོལ་བོད་མིའི་རང་དབང་འཐབ་རྩོད་དང་། སྤྱི་ཚོགས་འཚོ་བའི་གནས་སྟངས་སྐོར་རྒྱུས་ལོན་གང་ལེགས་ཞུས་ཡོད་པ་རེད།

རྩོམ་སྒྲིག་པའི་སྐུ་ཚབ་ཚོགས་ཆུང་ལྷན་དུ་འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་ཐུབ་བསྟན་རིག་འཛིན་ལགས་དང་། ལས་འཆར་འགན་འཛིན་ཆོས་ཉིད་ཚེ་རིང་ལགས་ལྷན་བཅར་ཞུས་ཡོད་པ་བཅས།།