༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༤ འཚོག་བཞིན་པའི་སྐབས་འདིར་ཡུ་རོབ་མཐུན་ཚོགས་ཀྱིས་སྤེལ་བའི་བསྒྲགས་གཏམ་ནང་རྒྱ་ནག་གཞུང་གིས་རྒྱ་ནག་ཐེ་བའི་བོད་ནང་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏོང་བཞིན་པར་ཐུགས་འཚབ་བསྟན་ཡོད།
གཞན་ཡང་ཡུ་རོབ་མཐུན་ཚོགས་ངོས་ནས་རྒྱ་ནག་གཞུང་གིས་བཙན་ཤེད་ཀྱིས་བོད་ཕྲུག་ས་ཡ་གཅིག་ལྷག་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་སློབ་འཇུག་བྱེད་བཞིན་པ་མ་ཟད། བོད་མིའི་རིགས་རྫས་དཔེ་མཚོན་བསྡུ་རུབ་བྱེད་བཞིན་པའི་གནས་སྟངས་གསལ་སྟོན་དང་སྦྲགས། བྱེད་སྒོ་འདི་དག་ནི་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་རྟགས་མཚན་གསལ་པོ་ཡིན་པ་གསུངས་ཡོད།
དེ་དང་འབྲེལ་ཏེ་བསྒྲགས་གཏམ་ནང་དུ་ཡུ་རོབ་མཐུན་ཚོགས་ནས་ཆབ་སྲིད་བཙོན་པའི་གནས་སྟངས་ལ་དོ་སྣང་ཆེན་པོ་བྱེད་བཞིན་ཡོད་སྐོར་འགྲེལ་བརྗོད་གནང་བ་མ་ཟད། སྒོ་ཤེས་རབ་རྒྱ་མཚོ་དང་། རིན་ཆེན་ཚུལ་ཁྲིམས། རྡོ་རྗེ་བཀྲ་ཤིས་ཐེ་བའི་བོད་མི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་གནང་ཡོད།
བྷེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཡུ་རོབ་མཐུན་ཚོགས་ཀྱི་བསྒྲགས་གཏམ་ལ་དགའ་བསུ་ཞུས་པ་དང་ཆབས་ཅིག བོད་ནང་གི་ཛ་དྲག་ཆེ་བའི་འགྲོ་བ་མིའི་ཐོབ་ཐང་གི་གནས་བབ་ལ་ཐུགས་འཚབ་ཆེན་པོ་ཡོད་སྐོར་གསུངས་པའི་ཐོག ཡུ་རོབ་མཐུན་ཚོགས་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བརྩིས་མེད་གཏོང་བཞིན་པར་འགན་ཁུར་འཇུག་རྒྱུར་རྒྱལ་སྤྱིའི་སྟེང་གནོན་ཤུགས་སྤྲོད་རྒྱུ་གལ་ཆེན་པོ་ཡིན་སྐོར་གསུངས་ཡོད་པ་བཅས།།
