༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༢༤ ཉིན་ཡུ་རོབ་ནང་པའི་མཐུན་ཚོགས་ཀྱི་ལོ་འཁོར་ཚོགས་ཆེན་ཐོག་ཚོགས་མི་རྒྱལ་ཁབ་ཁག་ནས་སྤྱི་མོས་ཀྱི་བསྒྲགས་གཏམ་ཞིག་སྤེལ་ཏེ་རྒྱ་ནག་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་མ་བྱེད་རོགས་ཞེས་འབོད་སྐུལ་གནང་ཡོད།
དེ་ཡང་བསྒྲགས་གཏམ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་རྒྱུའི་དབང་ཚད་བོད་མི་རྣམས་ཡོད་པ་བཞིན་བོད་བརྒྱུད་ནང་བསྟན་གྱི་ལམ་སྲོལ་ལྟར་ངོས་འཛིན་གནང་དགོས་པའི་ནན་བརྗོད་དང་སྦྲགས། རྒྱལ་སྤྱིའི་མི་མང་གིས་རྒྱ་ནག་གཞུང་གི་ཐེ་བྱུས་འོག་ངོས་འཛིན་བྱས་པའི་བླ་སྤྲུལ་རྣམས་ལ་ངོས་འཛིན་གནང་སྐྱོང་མི་ཡོང་བའི་འབོད་སྐུལ་ཞུས་འདུག དེ་དང་ཕྱོགས་མཚུངས་བསྒྲགས་གཏམ་ནང་དུ་ཡུ་རོབ་ནང་པའི་མཐུན་ཚོགས་ཀྱི་ཚོགས་མི་རྣམས་ནས་བོད་རྒྱའི་དཀའ་རྙོག་ཞི་འགྲིག་ཡོང་ཐབས་སུ་རྒྱ་གཞུང་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་ལྷན་དུ་གྲོས་མོལ་གནང་དགོས་པའི་རེ་སྐུལ་གནང་འདུག
ཡུ་རོབ་ནང་པའི་མཐུན་ཚོགས་ཀྱིས་བོད་མིའི་བླ་སྤྲུལ་ངོས་འཛིན་གནང་སྒོ་དང་བོད་རྒྱའི་དཀའ་རྙོག་ཞི་འགྲིག་ཡོང་ཐབས་ཐད་བསྒྲགས་གཏམ་སྤེལ་བར་སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་དགའ་བསུ་ཞུས་ཡོད།
དེ་ཡང་ཉེ་ལམ་ཕྱི་ཟླ་ ༠༩ ཚེས་ ༠༡ ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་ཆོས་ཕྱོགས་བྱེད་སྒོའི་གནས་སྟངས་འཛིན་ཕྱོགས་ཀྱི་ཁྲིམས་གཞིའམ་བཀའ་ཁྱབ་ཨང་ ༡༩ ཞེས་པ་ལག་བསྟར་བྱེད་འགོ་བཙུགས་ཏེ་རྒྱ་ནག་དང་བོད་ནང་ཆོས་ཕྱོགས་ཀྱི་བྱེད་སྒོར་དམ་བསྒྲགས་སྔར་ལྷག་གཏང་རྒྱུའི་འབད་རྩོལ་བྱེད་བཞིན་པའི་དུས་སུ་འདི་ལྟ་བུའི་བསྒྲགས་གཏམ་སྤེལ་བ་ནི་དུས་དང་འཚམས་པ་ཞིག་ཡིན།
ཡུ་རོབ་ནང་པའི་མཐུན་ཚོགས་ནི་ཡུ་རོབ་ནང་གི་ནང་པའི་ཚོགས་སྡེ་དང་རྒྱལ་ཡོངས་ནང་པའི་ཚོགས་ཁག་ཐུན་མོང་གི་ལྷན་ཚོགས་ཤིག་ཡིན་པ་བཅས།།
