༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༡ ཐོག་གལ་ཆེའི་གྲོས་ཆོད་མང་པོ་ཞིག་བཞག་ཡོད་པའི་ནང་།  བོད་རིགས་སྤྱི་མཐུན་ཚོགས་པ་ཁག་གིས་སོ་སོའི་ས་གནས་ཀྱི་གནས་བབ་ལ་གཞིགས་ནས་མུ་མཐུད་བོད་དོན་ཞུ་གཏུགས་ཀྱི་ལས་འགུལ་སྤེལ་དགོས། ཞེས་གསལ་ཡོད་པ་བཞིན།  ཨ་རིའི་ནུབ་ཕྱོགས་ཡུ་ཊ་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་འབྲེལ་ཡོད་རྒྱུན་ལས་ཚོས་ཉེ་ཆར་རེས་གཟའ་ཕུར་བུའི་ཉིན་གྲོས་ཚོགས་འོག་མའི་འཐུས་མི་ (Christ Stewart) ལགས་མཇལ་འཕྲད་ཞུས་ནས་བོད་དོན་སྐོར་ཞུ་སྐུལ་དང་།  ལྷག་པར་དུ་ལོ་རྒྱུས་རང་བཞིན་ལྡན་པའི་བོད་དོན་ཁྲིམས་འཆར་ལ་རྒྱབ་སྐྱོར་ཡོང་བའི་རེ་སྐུལ་བསྐྱར་དུ་ཞུས་འདུག  

སྐུ་ཚབ་དོན་གཅོད་ལས་ཁུངས་ལ་ས་གནས་ནས་གནས་ཚུལ་འབྱོར་བར་གཞིགས་ན།  ཐོག་མར་བྱས་ན་རྒྱུན་ལས་རྣམས་གྲོས་ཚོགས་འཐུས་མི་ (Christ Stewart) ལགས་ཀྱི་ལས་ཁུངས་སུ་བཅར་འཆར་ཡང་།   Christ Stewart ལགས་ཀྱིས་སེམས་ཐག་ཉེ་པོའི་སྒོ་ནས་སྤྱི་མཐུན་ཚོགས་པའི་ཚོགས་ཁང་དུ་མར་ཕེབས་ནས་མཇལ་མོལ་གནང་འདུག  

ཐེངས་འདིའི་མཇལ་མོལ་སྐབས་སྤྱི་མཐུན་ཚོགས་པའི་ཕྱོགས་ནས་ཚོགས་གཙོ་བློ་བཟང་ཚེ་རིང་ལགས་དང་།  ཚོགས་གཞོན་བསྟན་འཛིན་ཆོས་དར་ལགས།  དྲུང་ཆེ་བསམ་ཕོ་བསྟན་འཛིན་ཐོགས་མེད་ལགས།  རིག་གཞུང་འགན་འཛིན་ཀརྨ་འཕྲིན་ལས་ལགས།  བོད་དོན་ཞུ་གཏུགས་ལས་འགུལ་གྱི་འབྲེལ་མཐུད་པ་སྤྱི་ཟུར་ཕྱག་མཛོད་ཚང་པད་མ་ལགས་བཅས་མཉམ་དུ་ཕེབས་ཡོད།  གྲོས་ཚོགས་འཐུས་མི་ (Christ Stewart) ལགས་ཀྱིས་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་པ་མ་ཟད།  ཁོང་གི་ལས་ཁུངས་ཀྱི་འབྲེལ་མཐུད་འགན་འཛིན་གཙོ་བོ་ལྕམ་ (Rhonda Perks) ལགས་སུ་སྤྱི་མཐུན་ཚོགས་པའི་ཞུ་དོན་རྣམས་མཇུག་སྐྱོང་དགོས་པའི་བཀའ་མངགས་ནན་པོ་ཡང་གནང་བཞག

གྲོས་ཚོགས་འོག་མའི་འཐུས་མི་  Christ Stewart ལགས་ནི་སྤྱི་ཚོགས་ཀྱི་འབྲེལ་བ་རྒྱ་ཆེ་ཞིང་།  གཞུང་འཛིན་མང་གཙོ་དང་ཕྱོགས་འགལ་སྤྱི་མཐུན་ཚོགས་པ་གཉིས་ཀའི་འཐུས་མི་དང་འབྲེལ་བ་བཟང་པོ་ཡོད་མཁན་གྱི་གྲོས་ཚོགས་འཐུས་མི་ཞིག་རེད།  

འདི་ཚེས་ ༢༦ ཉིན་རྒྱུན་ལས་རྣམས་དང་།  བོད་དོན་ཞུ་གཏུགས་ལས་འགུལ་གྱི་འབྲེལ་མཐུད་འགན་ཁུར་བ་སྤྱི་ཟུར་ཕྱག་མཛོད་ཚང་པད་མ་ལགས་གྲོང་ཁྱེར་ (Salt Lake City) གྱི་གྲོང་ཁྱེར་སྤྱི་ཁྱབ་ལྕམ་ (Erin Mendenhall) ཀྱི་ལས་ཁུངས་སུ་ཆེད་བཅར་ཞུས་ཏེ།  གྲོང་ཁྱེར་ (Salt Lake City) ནང་གནས་སྡོད་བོད་མི་ཚང་མའི་ཚབ་ཞུས་ནས་འཚམས་འདྲི་དང་འབྲེལ་ས་གནས་བོད་རིགས་སྤྱི་མཐུན་ཚོགས་པའི་ལས་དོན་དང་འབྲེལ་བའི་གནད་དོན་དོན་ཚན་ཁ་ཤས་སྙན་སེང་དང་འབྲེལ་དོན་ཕན་ལྡན་པའི་རྒྱབ་སྐྱོར་ཡོང་བའི་རེ་སྐུལ་གནང་ཡོད།

ཐེངས་འདིར་གྲོང་ཁྱེར་སྤྱི་ཁྱབ་མཇལ་འཛོམས་སྐབས་བཅར་མཁན་གྱི་གྲས་སུ་གོང་ཞུས་རྒྱུན་ལས་རྣམས་དང་།  བོད་དོན་ཞུ་གཏུགས་ལས་འགུལ་གྱི་འབྲེལ་མཐུད་འགན་ཁུར་བ་ཕྱག་མཛོད་ཚང་པད་མ་ལགས་ཕུད།  ད་དུང་བོད་རིགས་སྤྱི་མཐུན་ཚོགས་པར་ཡུན་རིང་ནས་རྒྱབ་སྐྱོར་ཤུགས་ཆེ་གནང་མཁན་དང་། ཚོགས་པའི་སྦྱིན་བདག་གཙོ་བོ་ཡིན་པ་སྐུ་ཞབས་ (Steven Price ) ལགས་ཀྱང་མཉམ་དུ་ཕེབས་ནས་བོད་རིགས་སྤྱི་མཐུན་ཚོགས་པར་རྒྱབ་སྐྱོར་གྱི་རྣམ་འགྱུར་བསྟན་ཡོད་པ་རེད། Steven Price  ལགས་ནི་སྙན་གྲགས་ཆེ་བའི་ཚོང་ལས་གཉེར་མཁན་དང་།  ལས་རིགས་ཚང་མའི་ནང་འབྲེལ་ལམ་བཟང་པོ་ཡོད་མཁན་ཞིག་ཡིན་ཞིང་།  ཤེས་རྟོགས་བྱུང་བར་གཞིགས་ན།  བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་དང་།  གྲོང་ཁྱེར་སྤྱི་ཁྱབ་དབར་གྱི་མཇལ་འཕྲད་འདི་ལ་དུས་ཡིན་ཆུ་ཚོད་གཅིག་ལྷག་ཙམ་འགོར་འདུག

མཇལ་འཕྲད་གྲུབ་རྗེས་གྲོང་ཁྱེར་སྤྱི་ཁྱབ་ཀྱི་ངོ་དེབ་ཐོག་ཡུ་ཊ་བོད་རིགས་སྤྱི་མཐུན་ཚོགས་པའི་རྒྱུན་ལས་མཇལ་བར་དགའ་ཚོར་བྱུང་ལུགས་དང་།  གྲོང་ཁྱེར་ལས་ཁུངས་ནས་གང་འདྲ་བྱས་ཏེ་སྤྱི་མཐུན་ཚོགས་པར་རྒྱབ་སྐྱོར་ཞུ་རྒྱུའི་སྐོར་སྤྱི་མཐུན་ཚོགས་པའི་འགན་ཁུར་བ་དང་མཉམ་དུ་ཕན་ཚུན་གོ་བསྡུར་བྱས་པ་ཡིན་ཅེས་གནས་ཚུལ་སྤེལ་འདུག

བོད་རིགས་སྤྱི་མཐུན་ཚོགས་པའི་ཚོགས་གཙོ་བློ་བཟང་ཚེ་རིང་ལགས་ནས་གྲོས་ཚོགས་འཐུས་མི་དང་།  གྲོང་ཁྱེར་སྤྱི་ཁྱབ་ཀྱི་མཇལ་འཕྲད་ཧ་ཅང་ཡག་པོ་བྱུང་ཞིང་།  ཁོང་ཚོས་རྒྱབ་སྐྱོར་གནང་རྒྱུའི་ཞལ་བཞེས་གནང་བ་ལྟར། ང་ཚོས་མུ་མཐུད་ནས་ནུས་པ་མཉམ་སྤུངས་ཀྱིས་ལས་ཀ་བྱེད་རྒྱུའི་ཆོད་སེམས་བརྟན་པོ་ཡོད་ཅེས་གསུང་གི་འདུག