༄༅། །ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།  བྱང་ཨ་རིའི་ནང་བོད་རིགས་སྤྱི་མཐུན་ཚོགས་པ་བསྡོམས་ ༢༦ ཙམ་ཡོད་པ་དང་།  སྐུ་ཚབ་དོན་གཅོད་ལས་ཁུངས་ནས་ལོ་རེར་བོད་རིགས་སྤྱི་མཐུན་ཚོགས་པའི་ཚོགས་ཆེན་རེ་བསྐོང་གི་ཡོད།  འདི་ལོའི་ཚོགས་ཆེན་ཐེངས་ ༢༡ པ་དེ་སྔ་ལོའི་ཚོགས་ཆེན་གྱི་ཐག་གཅོད་ལྟར།  ཟླ་བ་འདིའི་བདུན་ཕྲག་དང་པོར་ཁེ་ན་ཌའི་གྲོང་ཁྱེར་ཀྲོ་རོན་ཊོར་བསྐོང་པ་དང་།  ཚོགས་ཆེན་གྲ་སྒྲིག་བྱེད་མཁན་ནི་ཨོན་ཀྲ་རེ་ཝོ་ (Ontario) བོད་རིགས་སྤྱི་མཐུན་ཚོགས་པ་དང་།  བྱང་ཨ་རི་སྐུ་ཚབ་དོན་གཅོད་ཁང་ཡིན་ཞིང་།  སྐུ་ཚབ་དོན་གཅོད་མཆོག་ནས་ཚོགས་འདུའི་སྟངས་འཛིན་དང་གཙོ་སྐྱོང་གནང་།  ཐེངས་འདིའི་ཚོགས་ཆེན་ལ་བྱང་ཨ་རིའི་ས་གནས་ཁག་ ༡༩ ནས་ཚོགས་བཅར་བ་ ༤༠ སྐོར་མཉམ་ཞུགས་གནང་ཡོད་ཅིང་།  བྱང་ཨ་རིའི་སྤྱི་འཐུས་བསྟན་འཛིན་འཇིགས་མེད་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་ (ICT) གི་འགན་འཛིན་བསྟན་ཆོས་རྒྱ་མཚོ་ལགས། ཁེ་ན་ཌ་བོད་དོན་རྒྱབ་ལྷན་ཚོགས་ (CTC) ཀྱི་སྤྱི་ཁྱབ་འགན་འཛིན་བསམ་འཕེལ་ལྷ་ལུང་པ་ལགས། རྒྱུན་ལས་འགན་འཛིན་ཤེས་རབ་མཐར་ཕྱིན་ལགས། བོད་ཀྱི་ཐེབས་རྩའི་འགན་འཛིན་སྦོབ་ཨན་ཀར་སིན་ལགས་བཅས་དོན་གཅོད་ལས་ཁུངས་ནས་གདན་ཞུས་ལྟར་ཚོགས་ཆེན་ལ་མཉམ་ཞུགས་གནང་ཡོད།  ཚོགས་ཆེན་གྱི་ཐོག་མར་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ཀྱིས་ཚོགས་ཆེན་དབུ་འཛུགས་ཀྱི་གསལ་བསྒྲགས་གནང་རྗེས།  སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ཀྱིས་དབུ་འབྱེད་གསུང་བཤད་དང་།  སྤྱི་འཐུས་བསྟན་འཛིན་འཇིགས་མེད་ལགས་ཀྱིས་བྱང་ཨ་རིའི་སྤྱི་འཐུས་ཀྱི་ངོ་བོའི་ཐོག་ནས་གསུང་བཤད།  བསྟན་ཆོས་རྒྱ་མཚོ་ལགས་དང་། བསམ་འཕེལ་ལྷ་ལུང་པ་ལགས་ཀྱིས་ཁག་སོ་སོར་ཨ་རི་དང་།  ཁེ་ན་ཌའི་ནང་བོད་དོན་ཞུ་གཏུག་ལས་འགུལ་སྤེལ་རྒྱུའི་གལ་ཆེའི་རང་བཞིན་དང་།  ལས་འགུལ་སྤེལ་ཕྱོགས་དང་འབྲེལ་བའི་གནད་འགག་སྐོར་གསུང་བཤད།  སྦོབ་ཨན་ཀར་སིན་ལགས་ནས་བོད་ཀྱི་ཐེབས་རྩས་བཙན་བྱོལ་བོད་མིའི་སྤྱི་ཚོགས་ནང་བོད་ཀྱི་ཐེབས་རྩའི་ལས་དོན་བྱེད་ཕྱོགས་ངོ་སྤྲོད་གནང་རྗེས།  ཀྲོ་རོན་ཊོ་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཕུན་ཚོགས་ལགས་ནས་ཚོགས་བཅར་བ་ཡོངས་ལ་དགའ་བསུའི་གསུང་བཤད་གནང་སྟེ་ཚོགས་ཆེན་དབུ་འཛུགས་ཀྱི་ལས་རིམ་གྲུབ། 

དུས་ཡུན་ཉིན་གསུམ་གྱི་ཚོགས་འདུའི་ཐོག་བོད་ཀྱི་ཆོས་དང་རིག་གཞུང་སྐད་ཡིག་བཅས་པ་མི་ཉམས་རྒྱུན་འཛིན་གནང་ཕྱོགས།  བོད་དོན་གཞུ་གཏུག་ལས་འགུལ་སྔར་ལས་ནུས་པ་ལྡན་པ་བཟོ་ཐབས་སྐོར།  སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་རླབས་ཆེན་དགོངས་གཞི་ཐུགས་སྐྱེད་དམ་བཅའ་བཞིའི་གོ་རྟོགས་སྤེལ་ཕྱོགས།  རང་རིགས་གཞོན་སྐྱེས་རྣམས་ཀྱིས་བོད་པའི་སྤྱི་ཚོགས་ནང་ཆ་ཤས་ལེན་རྒྱུ་སྔར་ལས་ཤུགས་ཆེ་རུ་གཏོང་ཐབས།  དང་བླངས་དཔྱ་དངུལ་དང་།  བོད་དོན་གདུང་སེམས་མཉམ་བསྐྱེད་ཀྱི་ལས་འགུལ་སྟེ།  ལག་དེབ་སྔོན་པོ་འབུལ་མཁན་མང་དུ་གཏོང་ཕྱོགས་ཀྱི་གནད་དོན་སོགས་གྲོས་གཞི་དོན་ཚན་བཅུ་ཙམ་གྱི་ཐོག་ལ་གྲོས་བསྡུར་ལྷུག་པོ་གནང་ཐར།  དེ་འབྲེལ་གྱི་གྲོས་ཆོད་མང་པོ་ཞིག་བཞག་ཐུབ་པ་བྱུང་ནས་འབྱུང་འགྱུར་ལོ་གཅིག་ནང་སྤྱི་མཐུན་ཚོགས་པའི་ལས་དོན་གྱི་ཁ་ཕྱོགས་གསལ་པོ་ཆགས།  

གྲོས་ཆོད་དོན་ཚན་རེ་ཟུང་གི་ནང་དོན་སྙིང་བསྡུས་ཙམ་ཞུས་ན།  བོད་རིགས་སྤྱི་མཐུན་ཚོགས་པ་ཁག་གིས་བོད་དོན་ཞུ་གཏུག་ལས་འགུལ་ཁོ་ནའི་ཆེད་དུ་འགན་འཁུར་བྱེད་མཁན་མི་སྣ་ཟུར་འཛུགས་གནང་རྒྱུ་དང་། ཆ་རྐྱེན་དང་ནུས་པ་ཡོད་མཁན་བོད་རིགས་སྤྱི་མཐུན་ཚོགས་པ་ཁག་གིས་བོད་མིའི་སྒྲིག་འཛུགས་ཀྱི་དཔལ་འབྱོར་ལ་ཕན་པའི་སླད་ལོ་གཅིག་ནང་ཞལ་འདེབས་བསྡུ་རུབ་ཀྱི་བྱེད་སྒོ་ཐེངས་གཅིག་སྤེལ་རྒྱུ།  སྤྱི་སེམས་བཟང་གསུམ་ (SEE Learning) གྱི་ཤེས་ཡོན་སློབ་གསོའི་སྐོར་ཤར་ནུབ་ཀྱི་ས་གནས་ཆེ་ཁག་གཉིས་ལ་ཟབ་སྦྱོང་ཚོགས་རྒྱུ་བཅས་ཐག་གཅོད་བྱུང་ཡོད་པ་མ་ཟད།  ༧གོང་ས་མཆོག་དགུང་གྲངས་དགུ་བཅུར་ཕེབས་པའི་གོ་སྟོན་དང་བསྟུན་ནས་བྱང་ཨ་རིའི་ནང་ལོ་འཁོར་མོ་གཅིག་ལ་ལས་འགུལ་སྣ་མང་སྤེལ་རྒྱུའི་ཆེད་ཚོགས་ཆུང་ཡང་ཟུར་གནང་ཐུབ་པ་བྱུང་ཡོད།  ད་དུང་།  ཕྱི་ལོ་ ༢༠༡༡ ལོར་༧གོང་ས་མཆོག་གིས་སྐུའི་ཡང་སྲིད་དང་འབྲེལ་བའི་ཡོངས་ཁྱབ་གསལ་བསྒྲགས་ནང་བཀའ་གསལ་ཕེབས་ཡོད་པ་གཞིར་བཟུང་།  བྱང་ཨ་རིའི་ཁྱབ་ཁོངས་བོད་རིགས་སྤྱི་མཐུན་ཚོགས་པ་ཚང་མས་༧རྒྱལ་དབང་སྐུ་ཕྲེང་རིམ་བྱོན་རྒྱུན་མཐུད་ཡོང་བའི་གསལ་བསྒྲགས་སྐྱོང་གནང་ཡོང་བའི་མཚན་འཁོད་གསོལ་འདེབས་སྙན་ཞུ་འབུལ་རྒྱུ་བཅས་ཐག་གཅོད་བྱུང་ཡོད།  

ཟླ་བ་ ༩ ཚེས་ ༢ ཉིན་ཨོན་ཀྲ་རེ་ཝོ་བོད་རིགས་སྤྱི་མཐུན་ཚོགས་པས་གཞུང་འབྲེལ་མང་གཙོའི་དུས་ཆེན་ཐེངས་ ༦༣ སྲུང་བརྩིའི་མཛད་སྒོ་གནང་སྐབས།  ཚོགས་ཆེན་གྱི་དུས་ཚོད་དང་སྐབས་འཁེལ་བར་བརྟེན།  ཚོགས་བཅར་བ་ཡོངས་རྫོགས་མཛད་སྒོའི་སྐུ་མགྲོན་དུ་གདན་ཞུ་གནང་བ་ལྟར་མཉམ་ཞུགས་གནང་ཞིང་།  སྐུ་ཚབ་དོན་གཅོད་དང་།  སྤྱི་འཐུས་བསྟན་འཛིན་འཇིགས་མེད་ལགས་ནས་མཛད་སྒོའི་ཐོག་དུས་ཆེན་དང་འབྲེལ་བའི་གསུང་བཤད་གནང་། ཚེས་ ༤ ཉིན་དེ་སྔ་བོད་ནང་སྤྱི་ཚོགས་རིག་པ་བ་དང་།  སློབ་གསོའི་ཕྱག་ལས་གནང་མྱོང་མཁན་འབུམ་རམས་པ་རྒྱལ་བློ་ལགས་ནས་ཚོགས་བཅར་བ་ཡོངས་ལ་ << རྒྱ་ནག་གཞུང་གིས་བོད་ནང་དུ་བོད་ཀྱི་སྐད་ཡིག་རྩ་མེད་གཏོང་བའི་སྲིད་བྱུས་ལག་བསྟར་བྱེད་ཚུལ་དང་།  བོད་ཕྱི་ལ་ཡོད་པའི་བོད་མི་ཚོས་དེ་ལ་གདོང་ལེན་བྱེད་ཕྱོགས། >> ཞེས་པའི་བརྗོད་གཞིའི་ཐོག་གསུང་བཤད་གནང་བར།  ཚོགས་འདུར་ཕེབས་མཁན་ཚོས་ཕན་ཐོགས་ཆེན་པོ་བྱུང་བའི་དགོངས་ཚུལ་གསུངས།  དེ་བཞིན་ཚེས་ ༤ ཉིན་ཚོགས་འདུ་གྲོལ་རྗེས་ཨོན་ཀྲ་རེ་ཝོ་བོད་རིགས་སྤྱི་མཐུན་ཚོགས་པས་ཚོགས་བཅར་བ་ཡོངས་ལ་དགོང་དྲོའི་གསོན་སྟོན་དང་།  ས་གནས་གཟའ་མཇུག་སློབ་གྲྭའི་སློབ་མ་རྣམས་ནས་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན།  ཚོགས་གཙོ་གསར་པ་བསོད་ནམས་གླང་དཀར་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་རྗེས།  བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༡ པ་མཇུག་སྒྲིལ་ཞིང་།  ཚོགས་ཆེན་ཐེངས་ ༢༢ པ་དེ་བཞིན་ཕྱི་ལོ་ ༢༠༢༤ ལོའི་ཟླ་བ་ ༨ པའི་ནང་ཨ་རིའི་ནུབ་ཕྱོགས་སུ་བྱང་ཀ་ལེ་ཕོ་ནི་ཡ་བོད་རིགས་སྤྱི་མཐུན་ཚོགས་པས་གྲ་སྒྲིག་གནང་རྒྱུའི་ཐག་གཅོད་བྱུང་།  

ཐེངས་འདིའི་ཚོགས་ཆེན་ལ་བརྒྱུད་ལམ་ཁག་ཚང་མས་ཐུགས་སྣང་ཆེན་པོ་གནང་སྟེ།  བརྙན་ཕྲིན་དང་།  རླུང་འཕྲིན།  དྲྭ་རྒྱ་དང་ཚགས་ཤོག་བཅས་པར་ཚོགས་ཆེན་ཐེངས་ ༢༡ པ་དང་འབྲེལ་བའི་སྐོར་གནས་ཚུལ་འགོད་སྤེལ་གནང་འདུག 

བོད་རིགས་སྤྱི་མཐུན་ཚོགས་པའི་རྒྱུན་ལས་ནི་དང་བླངས་ངོ་བོ་ཁོ་ནའི་ལས་ཀ་ཡིན་སྟབས།  སྒེར་དོན་མང་པོ་ཞིག་བློས་གཏོང་མ་བྱས་པར་རྒྱུན་ལས་ཀྱི་ལས་འགན་བླངས་ཐབས་མེད་ཅིང་།  བྱང་ཨ་རི་སྐུ་ཚབ་དོན་གཅོད་ལས་ཁུངས་ཀྱི་ལས་དོན་ལ་རམ་འདེགས་གནང་མཁན་གཙོ་བོ་གཅིག་ནི་བོད་རིགས་སྤྱི་མཐུན་ཚོགས་པ་ཁག་ཡིན་པས་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན།  གལ་སྲིད་ཀློག་པ་པོ་རྣམ་པར་ ངོ་དེབ་ཁ་བྱང་འདི་དང་།  Youtube དྲྭ་ཐག་འདི་གཟིགས་ཁོམ་ཡོད་ཚེ།  བོད་རིགས་སྤྱི་མཐུན་ཚོགས་པ་ཁག་གི་ཆགས་རབས་ལོ་རྒྱུས་རོབ་ཙམ་མཁྱེན་ཐུབ་ཀྱི་རེད་བསམ་པའི་རེ་བ་དང་ཡིད་ཆེས་ཞུ་གི་ཡོད།།