༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནང་ནང་འཁོད་དོན།  བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་སྐོར་གསར་འགོད་གསལ་བསྒྲགས།

༡།  བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༡ པ་འདི་བཞིན་སང་ཉིན་ཕྱི་ལོ་ ༢༠༢༣ ཟླ་བ་ ༩ ཚེས་ ༢ ཉིན་ཁེ་ན་ཌའི་གྲོང་ཁྱེར་ཀྲོ་རོན་ཊོའི་གངས་ལྗོངས་ཆོས་ལྡན་གླིང་དུ་ཚོགས་ཀྱི་ཡོད་ཅིང་།  ཚེས་ ༤ ཉིན་ཚོགས་འདུ་མཇུག་སྒྲིལ་གྱི་ཡོད།    

༢།  ཀྲོ་རོན་ཊོར་ཚོགས་ཆེན་བསྐོང་དགོས་དོན་ནི།  བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༠ པའི་གྲོས་ཆོད་དགོངས་དོན་ཡིན་པ་དང་།  ཚོགས་ཆེན་གྲ་སྒྲིག་གནང་མཁན་ཀྲོ་རོན་ཊོ་བོད་རིགས་སྤྱི་མཐུན་ཚོགས་པ་དང་སྐུ་ཚབ་དོན་གཅོད་ཁང་ཡིན།

༣།  ཐེངས་འདིའི་ཚོགས་ཆེན་ལ་བོད་རིགས་སྤྱི་མཐུན་ཚོགས་པ་ཁག་ ༡༩ ནས་ཚོགས་བཅར་བ་མི་གྲངས་ ༤༠ སྐོར་མཉམ་ཞུགས་གནང་གི་ཡོད།  བྱང་ཨ་རིའི་སྤྱི་འཐུས་བསྟན་འཛིན་འཇིགས་མེད་ལགས་དང་།  ཁེ་ན་ཊ་བོད་དོན་རྒྱབ་སྐྱོར་ཚོགས་པའི་ (CTC) སྤྱི་ཁྱབ་འགན་འཛིན་བསམ་འཕེལ་ལྷ་ལུང་པ་ལགས་དང་རྒྱུན་ལས་འགན་འཛིན་ཤེས་རབ་མཐར་ཕྱིན་ལགས།  རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས།  བོད་ཀྱི་ཐེབས་རྩའི་འགན་འཛིན་སྦོབ་ཨན་ཁར་སིན་ལགས་ཀྱང་ཚོགས་ཆེན་ལ་གདན་འདྲེན་ཞུས་ཡོད།  

༤།  བྱང་ཨ་རིའི་སྐུ་ཚབ་དོན་གཅོད་ཁང་ནས་སྐུ་ཚབ་དོན་གཅོད་འབུམ་རམས་པ་རྣམ་ཆོས་གྲུབ་ལགས་དང་།  བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ཚོགས་འདུར་ཕེབས་ཀྱི་ཡོད་ཅིང་།  སྐུ་ཚབ་དོན་གཅོད་ནས་ཚོགས་འདུའི་གཙོ་སྐྱོང་གནང་གི་ཡོད། 

༥།  དུས་ཡུན་ཉིན་གསུམ་གྱི་ཚོགས་ཆེན་ཐོག  བོད་དོན་ལས་འགུལ་སྤེལ་ཕྱོགས་དང་།  བོད་ཀྱི་ཆོས་དང་རིག་གཞུང་སྐད་ཡིག་བཅས་མི་ཉམས་རྒྱུན་འཛིན་གནང་ཕྱོགས།  བོད་དོན་ཞུ་གཏུགས་ལས་འགུལ།  བོད་མིའི་ཁྲོད་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་སྐྱེད་དམ་བཅའ་བཞིའི་གལ་གནད་ངོ་སྤྲོད་གནང་ཕྱོགས།  རང་རིགས་གཞོན་སྐྱེས་རྣམས་བོད་པའི་སྤྱི་ཚོགས་ནང་ཆ་ཤས་སྔར་ལས་ཤུགས་ཆེ་བ་ལེན་ཐུབ་ཐབས་སུ་འབད་བརྩོན་གནང་ཕྱོགས། དང་བླངས་དཔྱ་དངུལ་དང་འབྲེལ་བའི་གནད་དོན་སོགས་ཀྱི་ཐད་གྲོས་བསྡུར་གནང་རྒྱུ་རེད།  

༦།  ཚོགས་འདུའི་ཉིན་མཐའ་མར།  རྒྱ་ནག་གཞུང་གིས་བོད་ནང་བོད་ཀྱི་སྐད་ཡིག་རྩ་མེད་གཏོང་བའི་སྲིད་བྱུས་ལག་བསྟར་བྱེད་ཚུལ་དང་།  ཕྱི་ལ་ཡོད་པའི་བོད་མི་ཚོས་དེ་ལ་གདོང་ལེན་བྱེད་ཕྱོགས། ཞེས་པའི་བརྗོད་གཞིའི་ཐོག་སློབ་གསོའི་ལས་རིགས་ཀྱི་ཆེད་ལས་པ་འབུམ་རམས་ལ་རྒྱལ་ལོ་ལགས་ནས་ཚོགས་བཅར་བ་ཡོངས་ལ་གསུང་བཤད་དང་དྲི་བ་དྲི་ལན་གནང་གི་ཡོད།  

ཚོགས་ཚོགས་ཆེན་དང་འབྲེལ་བའི་སྐོར་གསར་འགོད་པས་འབྲེལ་བ་གནང་ཡུལ།

ཀྲོ་རོན་ཊོ་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཕུན་ཚོགས།  ༦༤༧ ༥༦༡ ༧༩༦༧

ཀྲོ་རོན་ཊོ་བོད་རིགས་སྤྱི་མཐུན་ཚོགས་པའི་ཚོགས་གཙོ་གསར་པ་བསོད་ནམས་གླང་དཀར། ༤༡༦ ༦༧༠ ༨༡༨༧ 

བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས།  ༣༤༧ ༨༤༠ ༣༢༨༡