༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༩ ཚེས་ ༨ གཟའ་སྐར་དགེ་བའི་ཉིན་ཨ་རིའི་མངའ་སྡེ་ནིའུ་ཡོག་གི་མཛེས་སྡུག་ལྡན་པའི་གྲོང་ཁྱེར་ཨེ་ཐི་ཁར་༸རྒྱལ་མཆོག་སྐུ་ཕྲེང་ ༡༤ པ་ཆེན་པོའི་མཚན་གནས་རྗེས་འབྲེལ་གྱི་དཔེ་མཛོད་ཁང་ཞིག་དབུ་འབྱེད་གནང་ཞིང་།  དཔེ་མཛོད་ཁང་གི་མཚན་ཆ་ཚང་ལ། ༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གི་དཔེ་མཛོད་ཁང་དང་ཤེས་ཡོན་བསྟི་གནས་ཁང་། ཞེས་ཞུ་གི་ཡོད་པ་དང་།  གསར་བཞེངས་ཀྱི་ཐུགས་འགན་བཞེས་མཁན་གཙོ་བོ་ཨེ་ཐི་ཁ་རྣམ་རྒྱལ་གྲྭ་ཚང་ཆོས་ཚོགས་རེད། ཞྭ་གསེར་བསྟན་པའི་གསལ་འབྱེད་སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་མགྲོན་གྱི་གཙོ་བོ་དང་།  རྣམ་པར་རྒྱལ་བའི་ཕན་བདེ་ལེགས་བཤད་གླིང་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག  བྱང་ཨ་རི་སྐུ་ཚབ་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས།  དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཡིག་ཆེན་མོ་རྣམ་སྤེལ་ཚང་བློ་བཟང་སྦྱིན་པ་ལགས།  བཀའ་ཟུར་བློ་བཟང་སྙན་གྲགས་ལགས་སོགས་ཕྱི་ནང་གི་སྐུ་མགྲོན་ཁག་དང་།  སྦྱིན་བདག་ཆེ་ཆུང་ཁག  ཕྱོགས་མཐའ་ཁག་ནས་ཕེབས་པའི་མང་ཚོགས་བཅས་མི་གྲངས་ ༤༠༠ ཙམ་མཛད་སྒོར་ཕེབས་ཡོད།  ཨེ་ཐི་ཁ་རྣམ་རྒྱལ་གྲྭ་ཚང་ཆོས་ཚོགས་ཀྱི་འགན་འཛིན་བསྟན་འཛིན་ཆོས་བཟང་ལགས་ཀྱིས་དཔེ་མཛོད་དང་ཤེས་ཡོན་བསྟི་གནས་ཁང་བཞེངས་དགོས་པའི་དམིགས་ཡུལ་དང་བརྒྱུད་རིམ་ངོ་སྤྲོད་གནང་ཞིང་།  རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག་གིས་དཔེ་མཛོད་དང་ཤེས་ཡོན་བསྟི་གནས་ཁང་འདིའི་ཐུན་མོང་མ་ཡིན་པའི་ཁྱད་ཆོས་དང་།  བསྟི་གནས་ཁང་འདིའི་ཐོག་མའི་དགོས་དམིགས་ལྟར་ཕྱི་ནང་གི་མི་རིགས་ཀུན་ལ་ཕན་རླབས་ཆེན་པོ་བསྒྲུབ་ཐུབ་པའི་ཐུགས་རེ་ཡོད་པའི་སྐོར་གསུངས།  ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་ནས་དཔེ་མཛོད་དང་ཤེས་ཡོན་བསྟི་གནས་ཁང་གསར་བཞེངས་ལེགས་གྲུབ་ཟིན་པར་བཀྲ་ཤིས་བདེ་ལེགས་ཀྱི་འཚམས་འདྲི་གནང་བ་དང་དུས་མཚུངས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཛམ་གླིང་སྤྱི་ལ་སྨན་པའི་རླབས་ཆེན་མཛད་འཕྲིན་གྱིས་གོ་ལ་འདིའི་སྟེང་གི་ཤེས་ཡོན་སློབ་གསོའི་ཁ་ཕྱོགས་གསར་པ་ཞིག་ཏུ་འཁྲིད་གནང་མཛད་སྟབས།  གང་གི་རླབས་ཆེན་དགོངས་གཞི་མཚོན་ཐུབ་པའི་དཔེ་མཛོད་དང་ཤེས་ཡོན་བསྟི་གནས་ཁང་གསར་བཞེངས་ལས་དོན་ལ་རྒྱབ་སྐྱོར་གནང་མཁན་ཡོང་ལ་ཐུགས་རྗེ་ཆེ་ཞེས་གསུངས།   སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དབུ་འབྱེད་མཛད་སྒོར་དམིགས་བསལ་བཀའ་ཡིག་ཅིག་སྩལ་ཡོད་པ་དེ།  དགའ་ལྡན་ཕོ་བྲང་གི་དྲུང་ཆེ་རྣམ་སྤེལ་ཚང་བློ་བཟང་སྦྱིན་པ་མཆོག་དང་།  བཀའ་ཟུར་བློ་བཟང་སྙན་གྲགས་ལགས་ཀྱིས་ཁག་སོ་སོར་བོད་སྐད་དང་དབྱིན་སྐད་ནང་སྒྲོགས་སྦྱང་གནང་།  བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ནས་མཛད་སྒོར་གསུང་བཤད་གནང་སྐབས་ “རྣམ་རྒྱལ་གྲྭ་ཚང་ཆོས་ཚོགས་ཀྱི་འབྲེལ་ཡོད་ལས་སྣེ་ཡོངས་ཀྱིས་ངལ་བ་སྣ་ཚོགས་ཁྱད་བསད་གནང་སྟེ།  ཨ་རིའི་ནང་བསྟི་གནས་ཁང་འདི་འདྲ་ཞིག་གསར་བཞེང་ལེགས་གྲུབ་ཟིན་པ་ནི།  འཛམ་གླིང་སྐྱེ་འགྲོ་ཀུན་ལ་ཕན་བདེ་ཆེན་པོ་སྐྲུན་ཐུབ་པའི་འཛུགས་སྐྲུན་དོན་སྙིང་ལྡན་པ་ཞིག་ཡིན་པས།  བྱང་ཨ་རི་སྐུ་ཚབ་དོན་གཅོད་ཁང་གིས་སྐུ་ལས་སྐྱོན་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན།  ༸གོང་ས་མཆོག་རྒྱ་གར་དུ་བཙན་བྱོལ་ལ་ཕེབས་ནས་ད་བར་མི་ལོ་ཧྲིལ་པོ་ ༦༤ སོང་རིང་བོད་བསྟན་སྲིད་ཀྱི་དོན་དུ་རླབས་ཆེ་བའི་མཛད་འཕྲིན་བསྐྱངས་དང་སྐྱོང་བཞིན་པ་མ་ཟད།  དེ་ལས་རྒྱ་ཆེ་ཞིང་རླབས་ཆེ་བའི་མཛད་པ་ནི།  གོ་ལ་འདིའི་སྟེང་འགྲོ་བ་མིའི་རིགས་གཅིག་གྱུར་ཡིན་པའི་འདུ་ཤེས་སྐྲུན་རྒྱུར་འབད་བརྩོན་དགོས་པ་དང་།  མ་ཡི་མངལ་ལས་སྐྱེ་དུས་ནས་རང་ཆས་སུ་ཡོད་པའི་མིའི་བྱམས་བརྩེའི་རང་བཞིན་དེ།  ཤེས་ཡོན་སློབ་གསོའི་ལམ་ནས་གོང་འཕེལ་གཏོང་རྒྱུར་ད་ལྟ་ནས་འབད་བརྩོན་བྱས་ན།  འབྱུང་འགྱུར་བདེ་སྐྱིད་ལྡན་ལ་འཚེ་བ་མེད་པའི་ཞི་བདེའི་སྤྱི་ཚོགས་ཤིག་བསྐྲུན་ཐུབ་ངེས་ཡིན་པའི་རླབས་ཆེན་གྱི་དགོངས་པའི་ས་བོན་བཏབ་ཡོད་པ་དེ་ཡིན།   དེར་བརྟེན་༸གོང་ས་༸སྐྱབས་མགོན་སྐུ་ཕྲེང་ ༡༤ པ་ཆེན་པོའི་མཛད་པ་མཚོན་པའི་དཔེ་མཛོད་དང་ཤེས་ཡོན་བསྟི་གནས་ཁང་ཞིག་གསར་བཞེངས་གནང་ཐུབ་པར་སླར་ཡང་བཀྲ་ཤིས་བདེ་ལེགས་ཞུ་རྒྱུ་ཡིན། “ཞེས་གསུངས།  དབུ་འབྱེད་མཛད་སྒོ་གྲུབ་རྗེས།  ཨེ་ཐི་ཁ་བོད་རིགས་སྤྱི་མཐུན་ཚོགས་པའི་གཟའ་མཇུག་སློབ་གྲྭའི་དགེ་ལས་རྣམས་ནས་སྐུ་མགྲོན་ཡོངས་ལ་རིག་གཞུང་འཁྲབ་སྟོན་གཟིགས་འབུལ་ཞུས་ཏེ་ཉིན་དང་པོའི་མཛད་རིམ་མཇུག་སྒྲིལ།  ཉིན་གཉིས་རིང་ཐུགས་བསྐྱེད་དམ་བཅའ་བཞི་དང་།  ཆོས་ལུགས་འཆམ་མཐུན།  ཆོས་ལུགས་ལ་མ་བརྟེན་པའི་བཟང་སྤྱོད་བཅས་ཀྱི་སྐོར་ལ་མུ་མཐུད་ནས་བགྲོ་གླེང་གནང་ཡོད་པ་རེད།།