༄༅། །ཕྱི་ལོ་ ༢༠༢༣ ཟླ་བ་ ༩ ཚེས་ ༡༥ དང་ ༡༦ ཉིན་གཉིས་རིང་དྷ་ས་འགྲོ་ཕན་སྨན་རྩིས་ཁང་གི་ལྷན་ཚོགས་ཁང་དུ་བོད་ལུགས་གསོ་བ་རིག་པ་དང་དེང་རབས་སྨན་ལུགས་ཟུང་འབྲེལ་ཆེད་ཚོགས་འདུ་བསྐོང་ཚོགས་ཞུས་ཡོད།
དེ་ཡང་ཚོགས་འདུའི་དབུ་འབྱེད་མཛད་སྒོའི་ཐོག་འབྲེལ་ལས་ནས་ཚོགས་འདུའི་ངོ་སྤྲོད་དང་གྲོས་གཞི་ཁག་གསལ་འགྲེལ་ཞུས་པ་དང་། སྐུ་མགྲོན་ངོ་བོར་ཆེད་ཕེབས་འཕྲོད་བསྟེན་དྲུང་འཕར་ནས་ཟུང་འབྲེལ་ཆེད་ལས་ཚོགས་འདུའི་དམིགས་ཡུལ་དང་གལ་གནད་ཐོག་གསུང་བཤད་གནང་བ་སྦྲགས་ཚོགས་འདུའི་གྲོས་གཞི་ཁག་ལ་གྲོས་བསྡུར་ལྷུག་པོ་ཡོང་བ་དང་། ཚོགས་འདུ་དོན་འབྲས་སོན་པའི་རེ་འདུན་ཞུས་གནང་ཡོད།
བོད་མི་འདུ་སྡོད་གཞིས་ཆགས་ཆེ་ཁག་བཅུའི་ནང་ས་གནང་ཟུང་འབྲེལ་ཚོགས་ཅུང་བསྐོས་འཛུགས་ཞུས་པ་ནས་སྐུ་ཚབ་ཚོགས་མི་གཉིས་རེ་ཚོགས་འདུར་གདན་ཞུས་ཐོག་ས་གནས་སོ་སོར་ཁྱབ་གདལ་ཆེ་བའི་ནད་གཞི་དང་དེར་སྔོན་འགོག་ཐབས་ལམ། དེ་བཞིན་ཟས་སྤྱོད་ཉེས་པའི་རྐྱེན་གྱིས་འགོས་ནད་མ་ཡིན་པའི་ནད་གཞི་སྔོན་འགོག བོད་མིའི་སྤྱི་ཚོགས་ཁྲོད་འཕྲོད་བསྟེན་དཀའ་ངལ་དང་དེར་གདོང་ལེན། ཟུང་འབྲེལ་ཆེད་ལས་པའི་ཤེས་ནུས་གོང་མཐོར་གཏོང་ཐབས་དང་ཟུང་འབྲེལ་ལས་གཞི་དང་འབྲེལ་སྤྱི་སྨན་དགོངས་འཆར་དང་མདུན་བསྐྱོད་ཅེས་གྲོས་གཞི་ལྔའི་ཐོག་གྲོས་བསྡུར་ཐག་གཅོད་གནང་ཡོད།
ཚོགས་འདུའི་མཇུག་སྡོམ་མཛད་སྒོའི་ཐོག་ཟུང་འབྲེལ་ལས་གཞིའི་སློབ་སྟོན་པ་༸སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཆེད་ཕེབས་ཀྱིས་ཚོགས་བཅར་བ་རྣམས་ལ་རྒྱུན་མཁོའི་གསོ་བཅོས་ལམ་སྟོན་ཐོག་གསུང་བཤད་དང་དྲི་བ་བགྲོ་གླེང་གནང་། མཇུག་སྡོམ་གྱི་ལམ་རིམ་ཐོག་སྐུ་མགྲོན་ངོ་བོར་དྲུང་ཆེ་ཆེད་ཕེབས་ཀྱིས་ཟུང་འབྲེལ་ལས་གཞིའི་གལ་གནད་དང་མུ་མཐུད་མཇུག་སྐྱོང་གནང་དགོས་ཐད་བཀའ་སློབ་དང་། དབུས་ནས་སྤྱི་ཚོགས་འཕྲོད་བསྟེན་དང་འབྲེལ་བའི་ལས་གཞི་དང་། དེ་བཞིན་ད་ལན་ཚོགས་འདུའི་ཐོག་གྲོས་ཆོད་བྱུང་བ་རྣམས་ས་གནས་སུ་དོན་དངོས་ལག་བསྟར་གནང་དགོས་པའི་གསུང་བཤད་གནང་ཡོད།
ཚོགས་འདུ་འདིའི་གྲོས་གཞི་དང་འབྲེལ་འཕྲོད་བསྟེན་ལས་ཁུངས་ཀྱི་ཟུང་འབྲེལ་དྲུང་ཆེ་དང་འབྲེལ་ཡོད་འགན་འཛིན་ཁག་བཅས་མཉམ་བཞུགས་གནང་ཡོད་པ་དང་ཚོགས་བཅར་བ་རྣམས་བོད་ཀྱི་སྨན་རྩིས་ཁང་དང་བདེ་ལེགས་སྨན་ཁང་། འཕྲོད་བསྟེན་ལས་ཁུངས་བཅས་ལ་གཟིགས་སྐོར་གནང་ཡོད། །
