༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༢ ཕྱེད་ཡོལ་ཆུ་ཚོད་ ༣ པའི་ཐོག་བོད་མིའི་མང་གཙོའི་དུས་ཆེན་གྱི་གཞུང་འབྲེལ་སྐུ་མགྲོན་སུ་ཝི་ཊན་གྲོས་ཚོགས་འཐུས་མི་མར་གྷི་ཊ་ཨི་ལི་ཛི་བཊ་ (Margareta Elisabeth Cederfelt) ལགས་ཀྱིས་སྣེ་ཁྲིད་པའི་གྲོས་ཚོགས་འཐུས་མི་བཅུ་གཅིག་ནས་གངས་སྐྱིད་སྲིད་སྐྱོང་ཚོགས་ཁང་དུ་བོད་དོན་ལ་རྒྱབ་སྐྱོར་གྱི་གསར་འགོད་གསལ་བསྒྲགས་སྤེལ་ཡོད། 

དེ་ཡང་གསར་འགོད་གསལ་བསྒྲགས་ཐོག་སུ་ཝི་ཊན་གྲོས་ཚོགས་འཐུས་མིའི་སྣེ་ཁྲིད་པ་མར་གྷི་ཊ་ཨི་ལི་ཛི་བཊ་ལགས་ཀྱིས་ཁོང་དང་ཕྱག་སྦྲེལ་གྲོས་ཚོགས་འཐུས་མི་གྲངས་བཅུ་གཅིག་ཐེངས་འདིའི་བོད་མིའི་མང་གཙོའི་དུས་ཆེན་གྱི་གཞུང་འབྲེལ་སྐུ་མགྲོན་དུ་ཆེད་བཅར་ཞུ་རྒྱུ་བྱུང་བར་དགའ་ཚོར་ཆེན་བྱུང་སྐོར་དང་། བོད་མིའི་མང་གཙོའི་ལམ་སྲོལ་དེ་བཞིན་རྒན་གཞོན་ཕོ་མོ་དབྱེར་མེད་ལ་འོས་བླུགས་རྒྱུ་དང་འོས་མིར་ལང་རྒྱུའི་ཐོབ་ཐང་འདྲ་མཉམ་ཡོད་པ་ནི་བསྔགས་བརྗོད་འོས་པ་ཞིག་ཡིན་ཞེས་གསུངས་པའི་ཐོག། ཁོང་མོས་རྒྱ་ནག་གཞུང་གིས་མི་སེར་སྤེལ་ཡུལ་གཏན་འཇགས་སློབ་གྲྭ་བརྒྱུད་བོད་ཀྱི་རིག་གཞུང་རྩ་མེད་གཏོང་ཐབས་རྩོམ་བཞིན་པ་ནི་རྒྱལ་སྤྱིའི་མི་མང་ནས་ངོས་ལེན་གནང་ཐབས་མེད་གཤིས། རྒྱ་གཞུང་ནས་བོད་མི་རྣམས་ལ་རང་གི་ཆོས་དང་རིག་གཞུང་། སྐད་ཡིག ངོ་བོ་སྲུང་སྐྱོབ་བྱ་རྒྱུའི་ཐོབ་ཐང་སྤྲོད་དགོས་པའི་འབོད་སྐུལ་གནང་ཡོད། དེ་བཞིན་ཁོང་མོས་སུད་ཝི་ཊན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ངོས་ནས་ཀྱང་བོད་དོན་དྲིལ་བསྒྲགས་དང་ཞུ་གཏུག་མུ་མཐུད་གནང་བཞིན་པའི་ཐོག གྲོས་ཚོགས་ནང་དུའང་བོད་དོན་གླེང་སློང་དང་དྲི་རྩད་མུ་མཐུད་གནང་དང་གནང་མུས་ཡིན་སྐོར་འགྲེལ་བརྗོད་གནང་ཡོད་པ་རེད། དེ་རྗེས་གསར་འགོད་པའི་དྲི་བར་ལན་འདེབས་གནང་ཡོད་ཅིང་། སྐབས་དེར་གསར་འགོད་པས་སུད་ཝི་ཊན་གཞུང་ནས་ཆབ་སྲིད་ཐོག་བོད་དོན་ལ་མངོན་གསལ་དོད་པོས་རྒྱབ་སྐྱོང་གནང་མ་ཐུབ་ནའང་། བཙན་བྱོལ་བོད་མིའི་བདེ་དོན་ལ་སྨན་པའི་ལས་གཞི་ལས་འཆར་རིགས་སྤེལ་ཐུབ་མིན་སྐོར་དྲི་བ་ཞུས་པར། སུད་ཝི་ཊན་གཞུང་ནས་ཨ་རི་ལྟར་བོད་མི་རྣམས་ལ་དཔལ་འབྱོར་དང་ཆབ་སྲིད་ཐོག་ནས་རྒྱབ་སྐྱོར་ཤུགས་ཆེ་གནང་ཐུབ་ཀྱི་མེད་ནའང་། སླར་མར་ལས་གཞི་ལས་འཆར་རིགས་བརྒྱུད་རྒྱབ་སྐྱོར་གནང་ཐབས་སུ་གྲོས་མོལ་གནང་རྒྱུ་ཡིན་ཞེས་དང་།

དེ་བཞིན་གསར་འགོད་པས་བོད་ནང་གི་བོད་མི་རྣམས་ལ་དམིགས་བསལ་བརྡ་ལན་ཡོད་མེད་སྐོར་ཞུས་པར། བོད་ནང་གི་བོད་མི་རྣམས་ལ་དཀའ་ངལ་ཇི་ཙམ་ཡོད་པ་ཤེས་ཀྱི་ཡོད་ལ། རང་དབང་གི་འཐབ་རྩོད་འདིའི་ནང་བོད་མི་ཙམ་མ་ཡིན་པར་ང་ཚོའང་མཉམ་དུ་ཡོད་ཅེས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་མུ་མཐུད་ཞུ་རྒྱུ་མ་ཟད། ལྷག་པར་བོད་ནང་གི་བོད་མི་རྣམས་ལ་གདུང་སེམས་མཉམ་སྐྱེ་ཡོད་ཅེས་གསུངས་ཡོད། 

བོད་མིའི་མང་གཙོའི་དུས་ཆེན་ཐེངས་ ༦༣ པའི་གཞུང་འབྲེལ་སྐུ་མགྲོན་དུ་ཕེབས་པའི་སུད་ཝི་ཊན་གྲོས་ཚོགས་འཐུས་མི་རྣམ་པ་ནི། མོ་ཊི་རེཊ་(Moderate) སྲིད་དོན་ཚོགས་པའི་གྲོས་ཚོགས་འཐུས་མི་མར་གྷེ་ཊ་ཨི་ལི་སི་བཊ་ (Margareta Elisabeth Cederfelt) ལགས་དང་། ཇོ་ཧ་ན་ཧོམ་བྷར་གར་ (Johanna Hornberger) ལགས། མེ་རི་ཅར་ལོ་ཊི་ནི་ཀོལ་སོན་ (Marie Charlotte Nicholson) ལགས། མེ་རི་ཝིག་ཀྲོ་རི་ཡ་ཨིས་ཀྲོག་ཧོས་ (Marie Viktoria Stockhaus) ལགས། ཨེ་ལེག་སེན་ཊར་ཨན་ཨིས་ཀྲེལ་ (Alexandra Anstrell) ལགས། ཨན་སོ་ཕི་ལི་ཝན་ཧེ་ཇ་ (Ann-Sofie Lifvenhage) ལགས། ཇོན་ཝེ་ནིར་ཧལ་ (John E Weinerhall) ལགས། སུད་ཝི་ཊན་མང་གཙོ་ཚོགས་པའི་གྲོས་ཚོགས་འཐུས་མི་རི་ཅཊ་ཇོ་ན་སི་ཇོམ་ཤོབ་ (Richard Johannes Jomshof) ལགས། བོ་ཇོན་སོ་ཊར་ (Bjorn Soder) ལགས། ཡེ་ཤུའི་མང་གཙོ་ཚོགས་པའི་གྲོས་ཚོགས་འཐུས་མི་གུ་གྲུམ་མར་གྷེ་ཊ་བུ་རུ་ནེ་གཊ་ (Gudrun Margareta Brunegard) ལགས། གྷི་རིན་སྲིད་དོན་ཚོགས་པའི་གྲོས་ཚོགས་འཐུས་མི་ཇེ་ནི་སོ་ཕི་ཨམ་ཨི་རིག་སོན་(Janine Sofie Alm Ericson) ལགས་བཅས་ཡིན་ཞིང་། ཁོང་རྣམ་པ་ལྷན་དུ་སུད་ཝི་ཊན་བོད་དོན་རྒྱབ་སྐྱོར་ཚོགས་པའི་ (Swedish Tibet Committee) ཚོགས་གཙོ་ཀལ་མི་ཊི་ (Carl Mattias Bjornerstedt) ལགས་དང་། ཚོགས་མི་ཀྲྀས་ཊི་ན་ (Kristina Eva Marie Bjornerstedt) ལགས། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་དྲུང་ཆེ་བློ་བཟང་ཆོས་སྒྲོན་ལགས་ཕེབས་ཞུགས་གནང་ཡོད་པ་བཅས།།