༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༧ པའི་བོད་མི་མང་སྤྱི་འཐུས་རྣམས་ཕྱི་ནང་ཡུལ་གྲུ་ཁག་ཏུ་གྲོས་ཚོགས་འཐུས་མི་སོགས་གནད་ཡོད་མི་སྣ་མཇལ་འཕྲད་དང་། བོད་དོན་རྒྱབ་སྐྱོར་སྔར་ལྷག་ཐོབ་ཐབས་ཆེད་ཕྱོགས་བསྐྱོད་གནང་རྒྱུའི་ལས་རིམ་ཡོད་པ་བཞིན། ཕྱི་ལོ་ ༢༠༢༣ ཟླ་ ༩ ཚེས་ ༦ ནས་ ༧ བར་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས། སྤྱི་འཐུས་ཙ་ནེ་ཚང་དོན་གྲུབ་བཀྲ་ཤིས་ལགས། སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཡུ་རོབ་རྒྱལ་ཁབ་ཨི་སོ་ཊོ་ན་ཡའི་ (Estonia) རྒྱལ་ས་ཏ་ལིན་ (Tallinn) ནང་འཛམ་གླིང་རྒྱལ་ཁབ་ཁག་འདྲ་མིན་གྱི་གཞུང་གི་དཔོན་རིགས་དང་། གྲོས་ཚོགས་འཐུས་མི། ལས་འགུལ་བ་སོགས་འདུ་འཛོམས་ཐོག རྒྱལ་སྤྱིའི་ལྷན་ཚོགས་ (2023 Open Government Partnership Global Summit) ཞེས་པའི་ཐོག་མཉམ་ཞུགས་དང་། ཕྱི་ཚེས་ ༨ ཉིན་ས་གནས་དཔོན་རིགས་མཇལ་འཕྲད་གནང་རྒྱུ་བཅས་ཀྱི་ཆེད་གཞུང་འབྲེལ་ཕྱོགས་ཕེབས་གནང་གཏན་ཁེལ་ཡོད།

དེ་ཡང་སྤྱི་འཐུས་རྣམ་པ་ཕྱི་ཚེས་ ༤ ཉིན་རྒྱལ་ས་ལྡི་ལི་ནས་ཨི་སོ་ཊོ་ན་ཡའི་རྒྱལ་ས་ཏ་ལིན་ལ་ཕེབས་ཐོན་གནང་རྒྱུ་དང་། ཕྱི་ཚེས་ ༥ ནས་ ༨ བར་ས་གནས་ལས་རིམ་བསྐྱང་རྒྱུ་ཡིན་པ་བཅས། །