བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ལ་དྭགས་དབུས་འཛིན་མངའ་གཞུང་གི་སྲིད་སྐྱོང་མཆོག་དང་མཇལ་འཕྲད་ཀྱིས་བོད་དོན་ཞུ་སྐུལ་གནང་བ།

གསར་ལས་ཁང་གི་གསར་འགོད་པས།

༢༠༢༣-༠༩-༠༩

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༩ པའི་ཚེས་ ༨ ཉིན་བོད་མི་མང་སྤྱི་འཐུས་ཟླ་བ་ཚེ་རིང་ལགས་དང་། སྤྱི་འཐུས་ཡེ་ཤེས་སྒྲོལ་མ་ལགས། སྤྱི་འཐུས་བསྟན་པ་ཡར་འཕེལ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ལ་དྭགས་དབུས་འཛིན་མངའ་གཞུང་གི་སྲིད་སྐྱོང་རྒྱ་གར་དམག་སྤྱི་ཟུར་པ་སྐུ་ཞབས་བྷི་ཌི་མི་ཤི་རཱ་ (Brig (Dr) B. D Mishra (Retd), Honourable Lieutenant Governor of Ladakh) མཆོག་དང་ལྷན་མཇལ་འཕྲད་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་སྐོར་ངོ་སྤྲོད་དང་། དེ་བཞིན་ས་གནས་སུ་གནས་སྡོད་བོད་མི་ཚོར་གཟིགས་རྟོག་སྔར་ལྷག་གནང་སྐྱོང་ཡོང་བའི་རེ་སྐུལ་ཞུས་པ་དང་ཆབས་ཅིག བོད་མི་མང་སྤྱི་འཐུས་ཚོགས་གཙོ་མཆོག་གི་མཚན་རྟགས་འཁོད་པའི་དོན་ཚན་བཅུ་ཅན་གྱི་བོད་དོན་ཞུ་སྐུལ་གྱི་ཡིག་ཆ་བཅས་ཕུལ་ནས་བོད་དོན་ཐོག་སྔར་ལྷག་རྒྱབ་སྐྱོར་གནང་སྐྱོང་ཡོང་བ་བཅས་ཞུས་གནང་འདུག

མཇལ་འཕྲད་སྐབས་ལ་དྭགས་བསོད་ནམས་གླིང་གཞིས་ཆགས་ཀྱི་ས་འཐུས་ཚོགས་གཙོ་དོན་གྲུབ་ཚེ་རིང་ལགས་དང་། ལ་སྤྱི་ལས་ཁུངས་ཀྱི་རྩིས་དྲུང་ཀརྨ་བསོད་ནམས་དར་རྒྱས་ལགས་རྣམ་གཉིས་ལྷན་བཅར་ཞུས་གནང་ཡོད་པ་བཅས། །