༄༅། །ཤེས་རིག་ལས་ཁུངས་ཀྱིས་མ་སུ་རི་བོད་ཁྱིམ་དུ་གོ་སྒྲིག་ཞུས་པའི་ཕྱི་ལོ་ ༢༠༢༣ ཟླ་ ༨ ཚེས་ ༢༣ ནས་ ༣༠ བར་གྱི་དྷ་ས་དང་མ་སུ་རི་ཁུལ་གྱི་གཏན་ཉིན་སློབ་གྲྭ་ཁག་གི་རིགས་ལམ་འདུ་འཛོམས་ལེགས་པར་མཇུག་བསྒྲིལ་ཡོད།
དེ་ཡང་མཇུག་བསྡོམས་མཛད་སྒོའི་སྐུ་མགྲོན་གཙོ་བོར་ལྡེ་ར་ལྡུན་དུ་རྟེན་གཞི་བྱས་པའི་འབྲི་གུང་བཤད་གྲྭའི་སློབ་སྤྱི་གཞོན་པ་མཁན་པོ་ཤེས་རབ་རྡོ་རྗེ་མཆོག་ཆེད་ཕེབས་གནང་ཡོད། མཛད་སྒོའི་ཐོག་མར་ཤེས་རིག་ཤེས་ཡོན་འགན་འཛིན་དངོས་གྲུབ་བསྟན་པ་ལགས་ནས་ཉིན་གྲངས་བརྒྱད་ཀྱི་རིགས་ལམ་འདུ་འཛོམས་ཀྱི་ལས་བསྡོམས་མདོར་བསྡུས་སྙན་སྒྲོན་ཞུས་པའི་ནང་། ཉིན་རེར་སློབ་ཕྲུག་རྣམས་ལ་ཆུ་ཚོད་བཞི་ནས་ལྔ་བར་རྩོད་ཟླ་དང་དེ་མིན་འཛིན་གྲྭ་སོ་སོའི་དམ་བཅའ། ཝཎཱ་མཐོ་སློབ་ནས་པར་འགྲེམས་གནང་བའི་རིགས་ལམ་བརྒྱུད་སུམ་རྟགས་འཁྲིད་ཐབས་དང་། རིགས་ལམ་བློ་གསལ་འཇུག་སྒོ་ཞེས་པའི་དཔེ་དེབ་གཉིས་ཀྱི་ནང་དོན་ངོ་སྤྲོད་སོགས་རྟགས་གསལ་གྱི་སྦྱོང་བརྡར་གང་མང་བྱུང་ཡོད་སྟབས་སློབ་ཕྲུག་རྣམས་ཀྱི་རིགས་ལམ་གོང་འཕེལ་སོང་ཡོད་པའི་རེ་བ་ཞུ་བཞིན་ཡོད་པ་དང་། དེ་མིན་ཕྱི་ཟླ་ ༨ ཚེས་ ༢༨ ཉིན་ལྟ་གྲུབ་དགེ་རྒན་དང་སློབ་ཕྲུག་གྲངས་ ༡༢༠ ལྷག་ལ་འཁོན་རིགས་བསྟན་པའི་གཙུག་རྒྱན་༸དཔལ་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་གི་མཇལ་ཁའི་སྐལ་བཟང་བྱུང་ཞིང་། རིན་པོ་ཆེ་མཆོག་ནས་སློབ་ཕྲུག་རྣམས་ལ་བདེ་སྐྱིད་ནི་ཕྱིའི་དངོས་པོ་ལས་ནང་སེམས་ལ་ལྟོས་ཆེ་བས་སློབ་ཕྲུག་ཚོས་ལོ་ན་གཞོན་དུས་བསམ་བློའི་ཡར་རྒྱས་གཏོང་རྒྱུར་འབད་བརྩོན་དགོས་པ་དང་། ལྷག་པར་དུ་སློབ་སྦྱོང་བྱེད་དུས་དཀའ་ལས་ཡོད་ཀྱང་ནམ་ཞིག་དེའི་འབྲས་བུ་བཟང་པོ་འཐོབ་ངེས་ཡིན་པ་བཅས་ཀྱི་བླང་དོར་བཀའ་སློབ་ཟབ་མོ་དང་ཆབས་ཅིག་ལྟ་གྲུབ་དགེ་རྒན་གྱིས་གསོལ་འདེབས་ལྟར་རྗེ་བཙུན་སྒྲོལ་མའི་ལུང་འབོག་པ་དང་། ཉིན་རྒྱབ་སྲོང་བཙན་དཔེ་མཛོད་དུ་ལྟ་བསྐོར་བྱས་པ་བཅས་ཀྱི་ལས་བསྡོམས་མདོར་བསྡུས་སྙན་སྒྲོན་ཞུས།
རིགས་ལམ་འདུ་འཛོམས་ཀྱི་སློབ་ཕྲུག་སྐུ་ཚབ་དྷ་སྟེང་བོད་ཁྱིམ་གྱི་སློབ་མ་བསྟན་འཛིན་སྐལ་བཟང་ལགས་ཀྱིས་ཐོག་མར་རིགས་ལམ་འདུ་འཛོམས་འདིར་ཡོང་སྐབས་རང་ཉིད་ཀྱི་རིགས་པ་ཕྲན་བུ་ཡར་རྒྱས་འགྲོ་རྒྱུར་དམིགས་ཀྱང་། མཐར་འདུ་འཛོམས་གྲོལ་སྐབས་རིགས་ལམ་གྱི་འགྲོ་སྟངས་ཐོག་བློ་བསྐྱེད་ཆེན་པོ་དང་སློབ་གྲོགས་མང་པོའི་མཉམ་དུ་འབྲེལ་ལམ་བཟང་དུ་ཕྱིན་པ་སོགས་ཀྱི་ཕན་ཐོགས་ཆེན་པོ་བྱུང་། རིགས་ལམ་སྦྱངས་པ་ལ་བརྟེན་ནས་ཚན་རྩིས་སོགས་སློབ་ཚན་གཞན་གྱི་ནང་དོན་ཤེས་རྟོགས་ལ་ཕན་ཐོགས་ཆེན་པོ་ཡོང་གི་ཡོད་པ་མ་ཟད། ང་ཚོ་རིགས་ལམ་སྦྱོང་མཁན་ཞིག་ལ་ཆ་བཞག་ན་སློབ་ཕྲུག་གཞན་དང་མི་འདྲ་བ་ཞིག་ཏན་ཏན་ཆགས་ཡོད་ཚུལ་གྱི་མྱོང་ཚོར་གསུངས།
དེ་ནས་ཝཎཱ་དགེ་འོས་སྡེ་ཚན་གྱི་ལྟ་གྲུབ་སློབ་དཔོན་དགེ་བཤེས་བློ་བཟང་རྒྱ་མཚོ་ལགས་ཀྱིས་སློབ་ཕྲུག་རྣམས་ལ་ང་ཚོར་སློབ་སྦྱོང་གི་ཐབས་ལམ་ཕུན་སུམ་ཚོགས་པ་ཞིག་ཡོད་པ་ནི་རིགས་ལམ་གྱི་ལམ་ནས་དཔྱད་པ་བྱ་རྒྱུ་དེ་ཡིན། དཔེར་ན། ཁ་དོག་ཡིན་ན་དམར་པོ་ཡིན་པའི་ཁྱབ་པའི་ཕྱིར་ཞེས་པའི་སྐབས་ཁ་དོག་ཡིན་ཚད་ཚང་མར་བསམ་བློ་གཏོང་དགོས་ཀྱི་ཡོད་སྟབས་དྲི་བ་འདི་ལྟ་བུ་ཧ་ཅང་རྒྱ་ཆེན་པོ་ཞིག་ཡིན་པ་དང་། ང་ཚོའི་སྲོལ་རྒྱུན་གྱི་སློབ་སྦྱོང་ཐུན་མོང་མ་ཡིན་པ་ཞིག་ཡིན། དེང་རབས་ཀྱི་སྐད་ཡིག་ཐབས་ལམ་ནང་འཆད་རྩལ་དང་ཉན་རྩལ་ཡར་རྒྱས་ཆེད་ཚོགས་ཐུན་ཟུར་བཙུགས་ཀྱིས་ཆེད་མངགས་སྦྱོང་བརྡར་སྤྲོད་ཀྱི་ཡོད་ཀྱང་། ང་ཚོའི་ཐུན་མོང་མ་ཡིན་པའི་རིགས་ལམ་འདི་ཡག་པོ་ཞིག་སྦྱངས་པ་ཡིན་ན་སྐད་ཡིག་ཡར་རྒྱས་ཀྱི་རྩལ་བཞི་ལས་འཆད་རྩལ་དང་ཉན་རྩལ་གྱི་ནུས་པ་གོང་མཐོར་གཏོང་རྒྱུའི་ཁྱད་ཆོས་ལྡན་ཡོད། ཤེས་རིག་ལས་ཁུངས་སམ་ཡང་ན་སློབ་སྡེ་སོ་སོས་གོ་སྒྲིག་ཞུ་བཞིན་པའི་རིགས་ལམ་འདུ་འཛོམས་འདིས་སློབ་ཕྲུག་ཚོའི་ཁྲོད་དུ་རིགས་ལམ་གྱི་གལ་གནད་གསོན་པོར་གནས་ཐུབ་པ་མ་ཟད། སློབ་ཕྲུག་ཚོའི་རྒྱུད་ལ་དཔྱད་ཞིབ་དང་རང་འགུལ་གྱི་བསམ་བློ་གོང་མཐོར་གཏོང་རྒྱུར་ཕན་ཐོགས་ཆེན་པོ་ཡོང་གི་ཡོད་པས། སློབ་གྲྭ་ཁག་ནང་རིགས་ལམ་གྱི་ཚོགས་ཐུན་གཅིག་མང་དུ་གཏང་བ་དེས་ཕན་ཐོགས་ཇི་ཙམ་ཡོང་མིན་བློ་དོགས་ཡོད་ན། ༸རྒྱལ་བ་རིན་པོ་ཆེར་མིག་བཙུམས་ནས་ཡིད་ཆེས་བྱོས་དང་དུས་ནམ་ཡང་གྱོང་གུད་མི་བྱུང་ཞིང་། ཡང་ན་རིགས་ལམ་ཤེས་པ་དང་མི་ཤེས་པའི་སློབ་ཕྲུག་ལ་ཞིབ་འཇུག་བྱས་ཏེ་གྲུབ་དོན་གཞིར་བཞག་གིས་རིགས་ལམ་ཚོགས་ཐུན་འཕར་མ་སྤྲོད་དགོས་མིན་བསམ་གཞིག་དགོས་གལ་ཆེ་བ་སོགས་ཀྱི་མྱོང་ཚོར་གསུངས།
དེ་ནས་སྐུ་མགྲོན་གཙོ་བོ་འབྲི་གུང་བཤད་གྲྭའི་སློབ་སྤྱི་གཞོན་པ་མཁན་པོ་ཤེས་རབ་རྡོ་རྗེ་མཆོག་ནས་ང་རང་མཛད་སྒོ་འདིར་ཡོང་ཐུབ་པ་འདི་སྒེར་གྱི་ངོས་ནས་དགའ་ཚོར་ཆེན་པོ་ཞིག་དང་བསོད་བདེ་ཆེན་པོ་ཞིག་ཡིན་བསམ་གྱི་ཡོད། གང་ཡིན་ཞེ་ན་རིགས་ལམ་འདི་དུས་རབས་དང་མཐུན་པར་དར་ཁྱབ་ཆེན་པོ་ཞིག་དང་། སློབ་གྲྭ་ཚང་མའི་ནང་སློབ་ཚན་གྱི་ཚུལ་དུ་འགོ་འཛུགས་ཐུབ་པ་ཡིན་ན་ཕན་ཐོགས་ཆེན་པོ་ཡོང་རྒྱུའི་༸རྒྱལ་བ་རིན་པོ་ཆེའི་དགོངས་གཞི་བླ་ན་མེད་པ་ཞིག་ཡིན་པས། ཁྱེད་རང་ཚོས་དགོངས་གཞི་བླ་ན་མེད་པ་དེ་སྒྲུབ་ཀྱི་ཡོད་སྟབས་མཛད་སྒོ་འདི་ལྟ་བུར་འགྲོ་དགོས་སམ་མི་དགོས་ཞེས་བློ་ཐེ་ཚོམ་ཙམ་ཡང་མེད་པར་ཡོང་བ་ཞིག་ཡིན་གསུངས། རིགས་ལམ་ཟེར་བ་འདི་གནད་འགག་ཆེན་པོ་ཞིག་རེད། རྒྱུ་མཚན་ནི་ང་རང་སྒེར་ལ་མཚོན་ན་མི་ལོ་བཅོ་ལྔ་ཙམ་གྱི་རིང་རིགས་ལམ་དང་ཁ་མ་བྲལ་བར་གནས་མཁན་གྱི་སྤྱི་ཚོགས་ཤིག་ནང་སྡོད་ཀྱི་ཡོད་པ་མ་ཟད། ལོ་ངོ་ཁ་ཤས་ཀྱི་རིང་ཆོས་རའི་ནང་ཕྱིན་ནས་རྩོད་པ་རྩོད་རྒྱུའི་གོ་སྐབས་བྱུང་ཡོད་པའི་ཉམས་མྱོང་ལ་གཞིགས་ཏེ་སློབ་ཕྲུག་ཚོར་ཚིག་ཁ་ཤས་ཞུ་གི་ཡིན། སྔོན་མ་ཡིན་ན་རིགས་ལམ་འདི་དགེ་འདུན་པ་དང་བཙུན་མའི་སྤྱི་ཚོགས་མ་གཏོགས་མི་སྐྱའི་ནང་དར་ཁྱབ་མེད་ཀྱང་། ༸རྒྱལ་བ་རིན་པོ་ཆེའི་བཀའ་དྲིན་ཉག་ཅིག་ལ་བརྟེན་ནས་ད་ཆ་སློབ་གྲྭ་ཁག་གི་ནང་རིགས་ལམ་གང་འཚམ་གྱི་དར་ཁྱབ་འབྱུང་བཞིན་ཡོད་པ་རེད། ང་རང་ཡོང་སའི་ལ་དྭགས་ལྟ་བུར་མཚོན་ནའང་འཇམ་དབྱངས་སློབ་གྲྭའི་ནང་༸སྐུ་མདུན་གྱི་བཀའ་བཞིན་རིགས་ལམ་སློབ་སྤེལ་འགོ་བཙུགས་ནས་མི་ལོ་བཅུ་ལྷག་ཕྱིན་ཡོད་ལ། དེ་མིན་ལ་དྭགས་ཀྱི་སློབ་གྲྭ་གཞན་དག་ནང་ལའང་རིགས་ལམ་རྐང་ཚུགས་ཐུབ་པ་ཞིག་བྱུང་ཡོད། དེས་ན་རིགས་ལམ་འདི་གནད་འགགས་ཆེན་པོ་ཞིག་ཡིན་པ་ང་རང་སྒེར་གྱི་ཚོར་སྣང་ཞིག་ཞུ་ན། རིགས་ལམ་གྱི་འགྲོ་སྟངས་ཡག་པོ་ཞིག་ཤེས་སོང་ན། སློབ་ཚན་གཞན་གྱི་ནང་དོན་ལ་བསམ་བློ་བཏང་སྟེ་གོ་བ་ལེན་སྟངས་རྩ་བ་ནས་འདྲ་ཡི་མེད་པའི་ཚོར་སྣང་ཞིག་བྱུང་སོང་། ང་རང་གཙོ་བོ་གཞུང་ཆེན་ཁག་ལ་སློབ་སྦྱོང་བྱེད་མཁན་ཞིག་ཡིན་སྟབས། ཐོག་མར་དཔལ་བཀའ་བརྒྱུད་ནང་བསྟན་མཐོ་རིམ་སློབ་གཉེར་ཁང་འདིར་ཞུགས་སྐབས་རིགས་ལམ་དེ་ཙམ་དར་ཁྱབ་ཆེན་པོ་མེད་ཀྱང་། རྗེས་སུ་མཁན་པོ་རྣམ་པའི་ཐུགས་འགན་བཞེས་ཏེ་སེ་འབྲས་དགའ་གསུམ་གྱི་འཇང་དགུན་ཆོས་ནང་འཛིན་རིམ་བཞིན་ལོ་མང་རིང་བཏང་བར་བརྟེན། ད་ཆ་དཔལ་བཀའ་བརྒྱུད་ནང་བསྟན་མཐོ་རིམ་སློབ་གྲྭར་རིགས་ལམ་གཞི་རྐང་ཚུགས་པ་ཞིག་བྱུང་ཡོད། ད་ལྟའང་ང་ཚོར་དབྱར་ཁའི་གུང་སེང་དང་སྟབས་བསྟུན་སློབ་གཉེར་བ་ལོ་གཞོན་པ་བཅོ་ལྔ་ཉི་ཤུ་བསྡུས་ཏེ་ལྷོ་ཕྱོགས་སེ་འབྲས་དགའ་གསུམ་ནང་རིགས་ལམ་ཆགས་པའི་ཆེད་དུ་གཏོང་བའི་ལམ་སྲོལ་ཡོད་པ་རེད། དེ་དག་ཐམས་ཅད་རིགས་ལམ་གནད་འགག་ཆེན་པོ་ཡིན་པ་ཤེས་ཤིང་རྟོགས་ནས་བྱེད་པ་མ་གཏོགས་རི་བོང་ཅལ་འདྲོགས་ལྟར་བྱས་པ་ཞིག་མ་རེད་གསུངས།
ང་རང་སྒེར་ལྟ་བུར་མཚོན་ན་རྒྱུན་དུ་ཆོས་རར་རྩོད་པ་ཤུགས་ཆེན་པོ་རྒྱག་མཁན་ཞིག་ཡིན་སྟབས་རིགས་ལམ་ལ་ཧ་ཅང་དགའ་པོ་ཡོད། དེར་བརྟེན་དེང་སང་གཞུང་ཆེན་མོ་ལྟ་སྐབས་དེའི་ནང་དོན་ལས་སླ་པོར་ཤེས་ཐུབ་པ་ཡོང་གི་འདུག རིགས་ལམ་ཤེས་པའི་མི་དེའི་སྐད་ཆ་ཤོད་སྟངས་དང་བསམ་བློ་གཏོང་སྟངས་ཀྱང་མི་འདྲ་བ་ཞིག་འདུག ཡིན་ནའང་སློབ་ཕྲུག་ཁྱེད་ཚོ་རིགས་ལམ་གྱི་གནས་ཚད་མཐོན་པོར་སླེབས་མེད་སྟབས་དེའི་ཕན་ཐོགས་ཇི་བཞིན་ཤེས་ཐུབ་ཀྱི་མེད་ཀྱང་། དེ་ལྟར་མུ་མཐུད་འབད་བརྩོན་བྱེད་ན་ཉིན་ཞིག་གྲུབ་འབྲས་ཡག་པོ་ཞིག་ཡོང་ངེས་ཅན་རེད། སློབ་ཕྲུག་ཁྱེད་ཚོ་ལོ་ཆུང་ཆུང་ཡིན་སྟབས་རིག་པ་དྭངས་བའི་དུས་ཚོད་འདིར་རིགས་ལམ་སྦྱོང་རྒྱུ་བྱུང་བ་ནི་རྗེས་མ་ཆེན་པོ་ཆགས་སྐབས་༸རྒྱལ་བ་རིན་པོ་ཆེའི་དགོངས་གཞི་བསྒྲུབ་རྒྱུའི་ས་བོན་འདེབས་ཀྱི་ཡོད་པར་དགའ་བ་སྒོམ་འོས་པ་ཞིག་རེད། སྔོན་མ་༸རྒྱལ་བ་རིན་པོ་ཆེས་ཚན་རིག་དང་ནང་ཆོས་ཀྱི་ཟབ་སྦྱོང་ཞིག་གི་ཐོག་བཀའ་སློབ་ནང་རིགས་ལམ་གྱི་སྦྱངས་པ་ཕུན་སུམ་ཚོགས་པ་ཡོད་པའི་དགེ་བཤེས་སམ་མཁན་པོ་སུ་ཞིག་ཡིན་ཡང་དངོས་ཡོད་གནས་ཚུལ་ལ་ཚན་རིག་དང་མཐུན་པར་ཞིབ་འཇུག་བྱེད་སྐབས་བསྡུར་ཡ་མི་འདུག་གསུངས་པ་དེ་གཙོ་བོ་རིགས་ལམ་གྱི་སྦྱངས་པ་ཡག་པོ་ཡོད་པའི་གནད་འགག་ལ་ཐུག་ཡོད། ང་ཚོས་རིགས་ལམ་སྦྱོང་བ་དེ་དངོས་ཡོད་ཀྱི་གནས་ཚུལ་ལ་ཞིབ་འཇུག་གི་ལམ་ནས་གྲུབ་དོན་རྙེད་རྒྱུ་དེ་རེད། ང་ཚོས་རྒྱུན་དུ་ཆོས་ཀྱི་ནང་དབང་པོ་རྟུལ་པོ་དད་པའི་རྗེས་འབྲང་དང་དབང་པོ་རྣོན་པོ་ཆོས་ཀྱི་རྗེས་འབྲང་ཞེས་གཉིས་ཡོད། དབང་རྟུལ་དད་པའི་རྗེས་འབྲང་བ་བླ་མས་ཇི་གསུངས་ངོས་ལེན་བྱེད་ནས་འགྲོ་གི་ཡོད། དབང་རྣོན་ཆོས་ཀྱི་རྗེས་འབྲང་ཟེར་ན་སོ་སོའི་རིག་པ་བེད་སྤྱད་ནས་རིགས་ལམ་གྱི་ཐོག་ནས་དཔྱད་པ་བྱེད་ཐུབ་པ་ཞིག་ལ་ཆོས་ཀྱི་རྗེས་འབྲང་ཟེར། དེ་ལྟར་བྱུང་ན་སོ་སོའི་མི་ཚེ་སྐྱེལ་སྟངས་དེ་རང་དབང་ཡོད་པའི་ཐོག་ནས་འཚོ་བ་སྐྱེལ་ཐུབ་པ་ཞིག་ཡོང་གི་རེད། དེ་མིན་ཐམ་མེ་ཐོམ་མེར་འགྲོ་བསྡད་ན་སོ་སོའི་མི་ཚེ་སྐྱེལ་སྟངས་རང་དབང་མེད་པ་ཞིག་ཆགས་ཀྱི་ཡོད། སོ་སོར་རྣམ་དཔྱོད་ཡོད་པ་དེ་བེད་སྤྱོད་བྱས་ནས་ཞིབ་འཇུག་གི་ལམ་ནས་གྲུབ་དོན་རྙེད་ཐུབ་པ་དེ་མི་ཚེ་དོན་དང་ལྡན་པ་ཡོང་གི་རེད། 
ད་ལྟ་ཁྱེད་རང་ཚོས་རིགས་ལམ་སྦྱོང་བཞིན་པ་འདིས་མ་འོངས་པར་ནང་ཆོས་ཙམ་མ་ཡིན་པར་རིགས་ལམ་འདིས་རིགས་འགྲེ་ནས་སློབ་ཚན་གཞན་དང་གཞན་ལ་སྟབས་བདེ་པོའི་ངང་བློ་ལ་འཆར་བ་དང་སེམས་སུ་ངེས་པར་ཕན་ཐོགས་ཆེན་པོ་ཡོད་པ་རེད། ངས་སྔོན་མ་ལོ་བཅུ་དང་བཅོ་ལྔའི་གོང་ལ་ཆོས་རའི་ནང་རྩོད་པའི་སློབ་ཚན་རྣམས་ད་ལྟའང་བློ་ལ་འདོན་རྒྱུ་ཡོད། ང་ཚོས་ཆོས་རའི་ནང་རྐང་ལག་བརྡབས་དཀའ་ལས་བརྒྱབ་བཞག་པ་དེ་ཚོ་ནམ་ཡང་བརྗེད་ཀྱི་མེད་པ་དེ་ཉམས་མྱོང་གི་ཐོག་ནས་སྒྲུབ་ཐུབ་ཀྱི་འདུག དེས་ན་རྟགས་གསལ་བཏང་རྩོད་པ་རྩོད་ཡ་དེ་ཕན་ཐོགས་ཡོད་པ་ཞིག་ལས་ཕན་ཐོགས་མེད་པ་ཞིག་ནམ་ཡང་མིན། ང་ཚོས་སློབ་ཚན་མང་པོ་སྦྱོང་གི་ཡོད་པ་རེད། སྦྱངས་པ་དེ་ཚོ་མ་བརྗེད་པར་སེམས་སུ་ཉར་དགོས་ཀྱི་ཡོད་ན། དེར་ཐབས་ལམ་ཞིག་དགོས་པ་རེད། ཐབས་ལམ་ཡག་ཤོས་དེ་ཆོས་རའི་ནང་རྩོད་པ་རྩོད་རྒྱུ་དེ་རེད། དེ་མིན་པའི་ཐབས་ལམ་གཞན་ཞིག་ནི་བརྡ་སྤྲོད་དང་ཡི་གེའི་ལམ་ནས་རྩོམ་མང་པོ་ཞིག་འབྲི་བའི་ཐབས་ལམ་ཞིག་ཡོད་པ་རེད། དེས་ན་རིགས་ལམ་དེ་གལ་ཆེན་པོ་ཡིན་པའི་སྐོར་ངས་བཤད་པར་ཧང་སང་རྒྱུ་མེད་ཀྱང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དང་རྣམ་པ་ཀུན་ཏུ་གསུང་མུས་རེད། ད་བར་བཀའ་སློབ་བསམ་གྱིས་མི་ཁྱབ་པ་མང་པོ་གསུངས་པའི་ནང་ནས་ཚན་པ་གཅིག་རིགས་ལམ་དེ་ཆགས་ཀྱི་ཡོད། ༸སྐུ་མདུན་གྱི་བཀའ་དྲིན་ལ་བརྟེན་ནས་ད་བར་རིགས་ལམ་དར་ཁྱབ་གང་འཚམ་ཕྱིན་ཡོད་ཀྱང་། ད་དུང་ཡང་དགེ་འདུན་གྱི་སྡེ་ནང་རིགས་ལམ་གྱི་དར་ཁྱབ་ཡོད་པ་བཞིན་སྤྱི་ཚོགས་ཁྱོན་ཡོངས་ལ་དར་ཁྱབ་འགྲོ་བ་ཡིན་ན། རིམ་པས་རིགས་ལམ་གྱི་ཕན་ཡོན་དེ་མངོན་གསལ་དོད་དུ་འགྲོ་གི་རེད། རིགས་ལམ་འཕྲུལ་གྱི་ལྡེ་མིག་ཅེས་པ་ལྟར་ཁང་པའི་ནང་འཛུལ་བར་ལྡེ་མིག་དེ་སོ་སོའི་ལག་ཏུ་ཡོད་པ་ཁང་པའི་ནང་དུ་ག་དུས་ཡིན་ནའང་འཛུལ་ཆོག་ཆོག་ཆགས་ཀྱི་ཡོད། བདེ་གཤེགས་སྙིང་པོ་འགྲོ་ཀུན་ཡོངས་ལ་ཁྱབ་ཅེས་པ་ལྟར་རིགས་ལམ་སྦྱོང་བའི་ནུས་པ་དེ་ཚང་མར་ཡོད་པ་རེད། ང་ཚོས་དགེ་བཤེས་རྩོད་པ་ཡག་པོ་རྩོད་མཁན་ཞིག་མཐོང་དུས་ང་ཡང་དེ་ལྟ་བུར་རྩོད་ཐུབ་ན་བསམ་པ་ཞིག་ཡོང་གི་ཡོད་ན། ཆོས་རའི་ནང་རྩོད་ན་མ་གཏོགས་ཡོང་ཐབས་མེད། དེ་མིན་ཤོག་བུ་དང་སྨྱུ་གུ་ཞིག་འཁྱེར་ཏེ་མུ་གསུམ་འདི་རེད། མུ་བཞི་འདི་རེད། འདི་ཡོད་ན་འདི་ཁྱབ་མི་ཁྱབ་ཅེས་ཇི་ཙམ་བྲིས་ཀྱང་རྩོད་པ་ཡར་རྒྱས་འགྲོ་ཐབས་མེད། ང་ཚོ་ལས་དང་པོ་བར་ཤོག་བུའི་སྟེང་རྩོམ་ཤློ་ཀ་གཅིག་འབྲི་དགོས་ན་མང་པོ་འགོར་གྱི་རེད། འོན་ཀྱང་དེ་ལྟར་མུ་མཐུད་འབྲི་བསྡད་ན་དུས་ཚོད་ཐུང་ཐུང་ནང་འབྲི་ཐུབ་ཅིང་། དེ་བས་ཀྱང་བྱང་ཆུབ་པ་བྱུང་ན་སྨྱུག་རྩེ་ལྷ་ཡིས་བསྒུལ་བ་འདྲ། ཞེས་པ་ལྟར་ལས་སླ་པོ་ཆགས་ཡོང་གི་ཡོད།
དེ་བཞིན་དུ་རིགས་ལམ་ལའང་ཐེངས་དང་པོ་གོམ་པ་སྤོ་སྐབས་དཀའ་ལས་ཡོད་ཀྱང་། མུ་མཐུད་ནས་རིགས་ལམ་ཐོག་རྩོད་ཅིང་དཀའ་ལས་བརྒྱབ་ན། ནམ་ཞིག་རིགས་ལམ་ཐོག་མིག་དཔེ་ལྟ་ས་དེ་ཁོ་རེད་ཅེས་པའི་དུས་ཚོད་ཅིག་འཆར་རྒྱུ་ཡོད། དེར་བརྟེན་ཕྱོགས་གང་འདྲ་ཞིག་ནས་བལྟས་ཀྱང་རིགས་ལམ་གྱི་ཁེ་ཕན་ཡོད་པ་དེ་མཁས་པ་སྔ་མ་ཚོའི་གསུང་འབུམ་ལ་ལྟ་ནའང་ཤེས་ཀྱི་འདུག་ལ། སོ་སོའི་ཉམས་མྱོང་གི་ཐོག་ནས་ཀྱང་ཅུང་ཙམ་སྒྲུབ་ཐུབ་ཀྱི་ཡོད་སྟབས། རིགས་ལམ་གྱི་ཁེ་ཕན་ཡོད་པ་དེའི་ཐོག་ཐེ་ཚོམ་རྩ་ནས་མེད། འོན་ཀྱང་ལས་དང་པོ་བའི་སློབ་ཕྲུག་མང་པོ་ཞིག་གི་བསམ་ཚུལ་དུ། རིགས་ལམ་དེ་ཡག་པོ་མི་འདུག རྩོད་པ་རྒྱག་ཡ་དེ་ཡག་པོ་མི་འདུག དེས་ཁ་རྩོད་དང་འཁྲུག་པ་མང་པོ་ཤོར་གྱི་འདུག་ཅེས་ལབ་མཁན་ཡོད། འཁྲུག་པ་མང་པོ་ཤོར་གྱི་ཡོད་ན། རྩོད་པ་རྩོད་སྟངས་མ་ཤེས་པས་བྱུང་བ་མ་གཏོགས། རྩོད་པས་འཁྲུག་པ་ཤོར་བ་མ་རེད། ལས་ཀ་གང་འདྲ་ཞིག་ཡིན་ནའང་སོ་སོའི་འགྲོ་སྟངས་འགྲོ་ལུགས་ཤིག་ཡོད་སྟབས་དེའི་འགྲོ་ལུགས་དེ་ཤེས་དགོས་ཀྱི་ཡོད། དེར་བརྟེན་རིགས་ལམ་གྱིས་ཁ་རྩོད་མང་པོ་ཤོར་གྱི་འདུག་ཟེར་བ་དེ་བདེན་པ་མ་རེད། གནས་སྐབས་རིང་དཀའ་ངལ་དེ་རིགས་ཡོང་གི་ཡོད་ན་ཕུགས་ལ་ཁེ་བཟང་ཆེ་ཤོས་དེ་འདི་ནས་རག་གི་ཡོད། ཁེ་བཟང་ཆེན་པོ་ཡོད་སར་སྐྱོན་ཆུང་ཆུང་ཡོད་པ་དེར་གདོང་ལེན་བྱེད་དགོས་ཀྱི་རེད། ད་ལྟ་འདི་ནས་རིགས་ལམ་འདུ་འཛོམས་འདི་འགོ་བཙུགས་ནས་ལོ་བཅུ་ལྷག་ཕྱིན་པ་གོ་སོང་། དེ་ལྟར་སྤོབས་པའི་ངང་བཤད་ཀྱང་ཤོད་ཆོག་པ་འདུག གང་ཡིན་ཟེར་ན་གོང་དུ་སློབ་ཕྲུག་ཁག་ཅིག་གིས་རྟགས་གསལ་སྤྱན་འབུལ་གནང་སྐབས་རིགས་ལམ་རྐང་ཚུགས་པ་ཞིག་བྱུང་འདུག་བསམ་པ་དྲན་བྱུང་། རྩོད་པ་རྩོད་མཁན་ལ་གལ་ཆེ་ཤོས་སྤོབས་པ་དགོས་ཀྱི་རེད། འོན་ཀྱང་ང་རྒྱལ་དགོས་ཀྱི་མ་རེད། ང་རྒྱལ་ཟེར་ན་ང་རང་མ་གཏོགས་མེད། ང་མ་གཏོགས་སུས་ཀྱང་བྱེད་མི་ཤེས་ཞེས་པ་དེ་ང་རྒྱལ་རེད། ངས་བྱེད་ཐུབ། ངས་འཇོན་ཟེར་བ་དེ་སྤོབས་པ་རེད། ད་ལྟ་ཁྱེད་རང་ཚོས་རྟགས་གསལ་གཏོང་སྐབས་སྤོབས་པ་ཡག་པོ་འདུག ཡར་རྒྱས་འགྲོ་བའི་མ་རྩ་གཅིག་དེ་རེད། ང་ཚོས་རིགས་ལམ་ཐོག་མར་སྦྱོང་སྐབས་མཚན་ཉིད་དང་དབྱེ་བ། དབྱེ་བའི་མཚན་ཉིད་སོགས་ཤོད་པ་ལས་ཤུགས་ཆེན་པོར་རྩོད་ཐུབ་ཡ་མེད། འོན་ཀྱང་ད་ལྟ་ཁྱེད་རང་ཚོས་རྩོད་སྐབས་དེ་ཙམ་ཞིག་མིན་པར་ཁྱབ་པར་ཐལ་ཞེས་རིགས་པས་གནོད་བྱེད་འཕེན་སྐབས་རིགས་ལམ་སྦྱངས་ནས་གྲུབ་འབྲས་ཐོན་པའི་རྟགས་རེད། དེར་བརྟེན་ཁྱེད་རང་ཚོས་རྟགས་གསལ་གཏོང་སྐབས་༸སྐུ་མདུན་གྱི་དགོངས་གཞི་དུས་ཚོད་མྱུར་པོ་ཞིག་གི་ནང་འགྲུབ་ཀྱི་རེད་བསམ་པ་ཡོང་གི་འདུག རིགས་ལམ་སྦྱོང་བ་དེ་སོ་སོའི་གཙུག་ན་ཡོད་པའི་༸སྐུ་མདུན་གྱི་བཀའ་བཟང་པོ་ཞིག་ཡིན་བསམས་ཤིང། ༸སྐུ་མདུན་གྱི་བཀའ་ཞིག་ཡིན་ཕྱིན་བསླུ་བ་ཞིག་རྩ་བ་ཉིད་ནས་སྲིད་ཀྱི་མ་རེད་བསམས་ཏེ་ཕྱིན་པ་ཡིན་ན་སོ་སོའི་བསླབ་པ་སློབ་གཉེར་མཐའ་དག་ཡར་རྒྱས་འགྲོ་བ་མ་ཟད། དུས་ཚོད་མྱུར་པོའི་ནང་ཡར་རྒྱས་ཡོང་ཐུབ་པའི་ཚོར་སྣང་བྱུང་། རང་ཉིད་རིགས་ལམ་གྱི་རྩོད་པ་རྒྱག་སའི་ར་བ་འདི་ལྟའི་ནང་ཚུད་ཐུབ་པ་དེ་བསོད་བདེ་དང་དགའ་སྤྲོ་ཆེན་པོ་བྱུང་ཞིང་མ་འོངས་པར་འདི་ལྟ་བུའི་མཛད་སྒོའི་ནང་འགྲོ་རྒྱུའི་འདོད་པ་ཆེན་པོ་ཡོད་པ་བཅས་ཀྱི་ལམ་སྟོན་གསུང་བཤད་ཟབ་ཅིང་རྒྱས་པ་གནང་སྟེ་ཐེངས་འདིའི་རིགས་ལམ་འདུ་འཛོམས་བཀྲ་ཤིས་པའི་ངང་མཇུག་བསྒྲིལ་ཡོད་པ་བཅས།།
