༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༡༦ ཉིན་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་དབུ་བརྙེས་ནས་ལོ་ངོ་ ༡༥ འཁོར་བའི་དུས་དྲན་མཛད་སྒོ་བོད་ཀྱི་ཟློས་གར་ཚོགས་པའི་ཚོགས་ཁང་དུ་འཚོགས་གནང་ཡོད་པ་རེད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་མཆོག་དང་། དམིགས་བསལ་སྐུ་མགྲོན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག བོད་མི་མང་སྤྱི་འཐུས་དང་སྤྱི་ཟུར་ཁག་ཅིག དགའ་ལྡན་ཕོ་བྲང་གི་དྲུང་ཆེ། བཞུགས་སྒར་ཁུལ་གྱི་ཚོགས་སྡེ་ཁག་གི་འགན་འཛིན་སྐུ་ཚབ་རྣམ་པ། ཕྱོགས་མཐའ་ཁག་ནས་ཕེབས་པའི་དབུ་མའི་ལམ་མི་མང་ལས་འགུལ་ཁང་གི་ཚོགས་མི་རྣམ་པ་བཅས་ཚང་འཛོམས་ཐོག་མཛད་སྒོ་དངོས་སུ་དབུ་འཛུགས་གནང་ཡོད། མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་གིས་སྣང་གསལ་མར་མེ་ཞལ་ཕྱེ་དང་། དེ་ནས་བོད་རྒྱལ་ཁབ་ཆེན་པོའི་རྒྱལ་གླུ་བླངས་རྗེས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་འགན་འཛིན་དགེ་བཤེས་བློ་བཟང་ཆོས་འཕེལ་ལགས་ཀྱིས་ངོ་སྤྲོད་གསུང་བཤད་གནང་ཞིང་། སྐབས་དེར་ཁོང་གིས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་འཕེལ་རིམ་ལོ་རྒྱུས་དང་དབུ་མའི་ལམ་གྱི་ཉིན་མོ་སྲུང་བརྩི་ཞུ་ཐད་ངོ་སྤྲོད་ཞིབ་ཕྲ་གནང་ཡོད་པ་དང་། དེ་ནས་དམིགས་བསལ་སྐུ་མགྲོན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དུས་དྲན་དང་འབྲེལ་བའི་གསུང་བཤད་གནང་གྲུབ་བསྟུན་དཔལ་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་ཡོད་པ་རེེད། སྐབས་དེར་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་བཅུ་དྲུག་པའི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་བཞེད་མཛད་ཅིང་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བའི་དབུ་མའི་ལམ་གྱི་སྲིད་བྱུས་གཞིར་བཞག་ཐོག་ཐབས་བྱུས་ལ་འགྱུར་བ་ཕྲན་བུ་བཏང་སྟེ། ལོ་རྒྱུས་ཐོག་ནས་བོད་དེ་རང་བཙན་ཡོད་པའི་རྒྱལ་ཁབ་ཅིག་ཡིན་པ་གསལ་སྟོན་ངོས་འཛིན་ཐོབ་ཐབས་གནང་བཞིན་ཡོད་པ་དང་། དེ་ཡང་གཙོ་བོ་རྒྱ་ནག་གཞུང་གིས་བོད་ཀྱི་ལོ་རྒྱུས་ལ་ལོག་འགྲེལ་སྣ་ཚོགས་བྱས་ཏེ་བོད་དེ་ལོ་རྒྱུས་ཐོག་ནས་རྒྱ་ཁོངས་ཡིན་ཤག་གི་འཁྱོག་བཤད་ཤུགས་ཆེ་བྱེད་བཞིན་ཡོད་པ་དང་། གཉིས་ནས་རྒྱ་ནག་གཞུང་གི་ལོག་བཤད་ཤུགས་ཆེ་བྱས་རྐྱེན་རྒྱལ་སྤྱིའི་སྤྱི་ཚོགས་ནས་བོད་ཀྱི་ལོ་རྒྱུས་གནས་བབ་ལ་གོ་ནོར་ཐེབས་ཉེན་ཆེ་བ། གསུམ་ཐོག་ནས་བོད་མིའི་ཁྲོད་དུའང་བོད་ཀྱི་ལོ་རྒྱུས་ལ་ཤེས་རྟོགས་རྒྱུས་མངའ་ཚད་ལྡན་ཡོད་མཁན་ཉུང་ཤས་ལས་མེད་སྟབས་བོད་ཀྱི་ལོ་རྒྱུས་ལ་དོ་སྣང་དང་སློབ་གཉེར་བྱ་དགོས་པའི་སྐུལ་མ་གཏོང་སླད་ཡིན་པ་གསལ་བཤད་གནང་ཡོད། དེ་བཞིན་དཔལ་ལྡན་སྲིད་སྐྱོང་མཆོག་ནས་མུ་མཐུད་དེ། དབུ་མའི་ལམ་ལ་ཆེ་མཐོང་དང་། རིན་ཐང་། ངོས་འཛིན་ཐོབ་པར་ལོ་རྒྱུས་ཐོག་བོད་རང་བཙན་ཡིན་པའི་གནས་བབ་ནན་བརྗོད་བྱ་རྒྱུ་དེ་ཧ་ཅང་གལ་གནད་ཆེན་པོ་ཡིན་པ་ལྟར། དཔལ་ལྡན་བཀའ་ཤག་ངོས་ནས་རྒྱལ་སྤྱིའི་སྟེང་དང་། ཁྱད་པར་དུ་ཕྱི་སྲིད་ལྷན་ཁང་ཁག་ཏུ་བོད་ཀྱི་ལོ་རྒྱུས་ཀྱི་གནས་བབ་འགྲེལ་བརྗོད་གནང་གི་ཡོད་པ་མ་ཟད། དེ་སྔོན་ཨ་རིའི་གྲོས་ཚོགས་ནང་དུ་དེ་དོན་ཉན་ཞིབ་ཅིག་ཚོགས་ཡོད་པའི་ཐོག ད་ལྟའི་ཆར་ཨ་རིའི་གྲོས་ཚོགས་སུ་བོད་དོན་ཁྲིམས་འཆར་ཞིག་འགྲོ་བཞིན་ཡོད་ལ། གལ་ཏེ་དེ་ཉིད་གཏན་འབེབས་གནང་ཐུབ་ཚེ་ལོ་རྒྱུས་ཐོག་ནས་བོད་ནི་རང་བཙན་ཡོད་པའི་རྒྱལ་ཁབ་ཅིག་ཡིན་པ་དང་། བོད་རྒྱའི་དཀའ་རྙོག་ད་ལྟ་བསལ་མེད་པའི་རྒྱལ་སྤྱིའི་དཀའ་རྙོག་ཅིག་ཏུ་ངོས་འཛིན་ཐོབ་ཀྱི་ཡོད་སྐོར་འགྲེལ་བརྗོད་གནང་ཡོད།དེ་ལས་འཕྲོས་ཏེ་དཔལ་ལྡན་སྲིད་སྐྱོང་མཆོག་གིས་དབུ་མའི་ལམ་མི་མང་ལས་འགུལ་ཁང་གི་ཚོགས་མི་རྣམས་ནས་ཀྱང་རྒྱལ་སྤྱིའི་ཆབ་སྲིད་ཀྱི་གནས་སྟངས་དང་། རང་ཉིད་གནས་ཡུལ་རྒྱལ་ཁབ་དང་རྒྱ་ནག་བར་གྱི་འབྲེལ་བར་དོ་སྣང་གནང་བའི་ཐོག་བོད་དོན་ལ་གོ་སྐབས་དམ་འཛིན་གནང་རྒྱུར་ཐུགས་ཁུར་བཞེས་དགོས་ལམ་སྟོན་གནང་བ་དང་ཆབས་ཅིག་དེང་གི་འཛམ་གླིང་སྤྱི་དང་། ཡང་སྒོས་རྒྱ་ནག་གི་ཆབ་སྲིད་ཀྱི་འགྱུར་ལྡོག་སྐོར་འགྲེལ་བརྗོད་གནང་ཡོད་པ་རེད། 

དེ་དང་ཕྱོགས་མཚུངས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་སྟོབས་ཆེན་རྒྱལ་ཁབ་ཅིག་གི་ཁ་གཏད་དུ་འཐབ་རྩོད་བྱེད་པར་བོད་མི་ཡིན་ནོ་ཅོག་གིས་རང་གི་ཆབ་སྲིད་ཀྱི་ལངས་ཕྱོགས་དང་གནས་སྐབས་བསམ་ཚུལ་མཐུན་མིན་ལ་མ་ལྟོས་པར་ཚང་མས་ནུས་པ་མཉམ་སྤུངས་གནང་དགོས་པའི་ལམ་སྟོན་གནང་ཡོད། གཞན་ཡང་མཛད་སྒོའི་ཐོག་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གིས་གོ་སྒྲིག་ཞུས་པའི་རྩོམ་ཡིག་འགྲན་བསྡུར་གྱི་ཨང་རིམ་རྩེར་སོན་གསུམ་ལ་སྐུ་མགྲོན་གཙོ་བོ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་བརྒྱུད་བྱ་དགའ་གསོལ་སྩལ་གནང་བ་དང་། དེ་བཞིན་རྩོམ་ཡིག་འགྲན་བསྡུར་གྱི་རྩེ་ཕུད་མི་སྣ་བཅུ་གསུམ་གྱི་རྩོམ་ཡིག་ཕྱོགས་བསྡུས་གནང་བ་ “དབུ་མའི་ལམ།” ཞེས་པའི་དཔེ་དེབ་དབུ་འབྱེད་གནང་བ་དང་། དམིགས་བསལ་སྐུ་མགྲོན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་བརྒྱུད་ནས་རྩོམ་ཡིག་འགྲན་བསྡུར་གྱི་རྩེ་ཕུད་མི་སྣ་བཅུ་གསུམ་ལ་བྱ་དགའ་གནང་བ། དམིགས་བསལ་སྐུ་མགྲོན་དཔལ་ལྡན་སྲིད་སྐྱོང་མཆོག་བརྒྱུད་ནས་རྩོམ་ཡིག་དཔྱད་འདེམས་པ་གསུམ་ལ་བྱ་དགའ་གནང་ཡོད།མཐར་སྐུ་མགྲོན་གཙོ་བོ་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས་བོད་ཀྱི་རང་དབང་འཐབ་རྩོད་ཀྱི་འགན་ཡོངས་རྫོགས་གཞུང་འཛིན་མི་སྣར་མ་བསྐུར་བར་གཞི་རིམ་མི་མང་ནས་ཀྱང་འགན་ཁུར་དགོས་པའི་ལམ་སྟོན་གནང་བའི་ཐོག དབུ་མའི་ལམ་གྱི་དམིགས་ཡུལ་དང་ཐབས་ལམ་སོགས་ཀྱི་སྐོར་གསུང་བཤད་གནང་ཡོད་པ་བཅས།།