༄༅། །ཨ་རིའི་གྲོས་ཚོགས་གོང་མའི་འཐུས་མི་དང་བོད་དོན་ལ་ཡུན་རིང་རྒྱབ་སྐྱོར་གནང་མཁན་ལྕམ་སྐུ་ཊེ་ཧ་ནེ་ཕ་ཧེན་སི་ཊིན་ (Dianne Feinstein) མཆོག་འདས་གྲོངས་སུ་གྱུར་བའི་ཡིད་སྐྱོ་གནས་ཚུལ་ཐོན་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཐུགས་གསོ་ཞུས་ཡོད་པ་རེད།

དེ་ཡང་དཔལ་ལྡན་སྲིད་སྐྱོང་མཆོག་གི་ཐུགས་གསོའི་གསུང་འཕྲིན་ནང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་མཉེས་པོ་གནང་ཡུལ་གྱི་མཛའ་གྲོགས་དང་། བོད་དང་བོད་མིའི་རྩ་དོན་ལ་ཕན་ཐོགས་ཤུགས་ཆེ་གནང་མཁན་ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཊེ་ཧ་ནེ་ཕ་ཧེན་སི་ཊིན་མཆོག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར་ངས་ཐུགས་གསོ་ཞུ་རྒྱུ་ཡིན། 

ཕྱི་ལོ་ ༡༩༧༩ ཟླ་བ་ ༠༩ ནང་ཁོང་མོ་སན་ཕེ་རན་སིས་ཀོ་གྲོང་སྡེའི་སྤྱི་ཁྱབ་གནང་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་འབྱེད་མཛད་སྒོར་མགྲོན་འབོད་གནང་ཞིང་། ལོ་རྒྱུས་རང་བཞིན་ལྡན་པའི་མགྲོན་འབོད་དེ་ནི་མགོན་པོ་མཆོག་ཨ་རིར་ཕེབས་པ་ཐེངས་དང་པོ་ཡིན། ཕྱོགས་ཕེབས་དེ་ལ་བརྟེན་ནས་བོད་མི་དང་ཨ་རིའི་མི་མང་བར་བསམ་ཤེས་དང་གྲོགས་འདྲིས་ཀྱི་རྩ་བ་ཚུགས་ཡོད། 

དེ་དང་ཕྱོགས་མཚུངས་ལྕམ་སྐུ་ཊེ་ཧ་ནེ་ཕ་ཧེན་སི་ཊིན་མཆོག་གིས་ཨ་རིའི་གྲོས་ཚོགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མི་ལ་ཞབས་འདེགས་དང་། ཞི་བདེ། གཉིས་ཕན་བསམ་ཤེས་ཀྱི་དགོངས་གཞིར་ངོས་འཛིན་གྱི་ཨ་རིའི་གྲོས་ཚོགས་ཀྱི་གསེར་གྱི་རྟགས་མ་འབུལ་བཞེས་གནང་ཕྱོགས་ཀྱི་གྲོས་ཆོད་ངོ་སྤྲོད་གནང་ཡོད། དེ་ཙམ་མ་ཟད་ཁོང་མོས་ཨ་རིའི་གཞུང་ངོས་ནས་བོད་དོན་ལ་རྒྱབ་སྐྱོར་གནང་ཕྱོགས་ཀྱི་བོད་དོན་སྲིད་བྱུས་ཀྱི་ཁྲིམས་ཡིག་གཏན་འབེབས་གནང་བར་ཞབས་འདེགས་རླབས་ཆེ་བསྒྲུབས་ཡོད་པ་རེད། དེ་ལྟར་ལྕམ་སྐུ་ཊེ་ཧ་ནེ་ཕ་ཧེན་སི་ཊིན་མཆོག་གིས་ཨ་རི་གཞུང་ངོས་ནས་བོད་དོན་ལ་རྒྱབ་སྐྱོར་ཚད་མཐོ་གནང་ཕྱོགས་ཀྱི་ལམ་བུ་བསྟན་ཡོད། 

ལྕམ་སྐུ་ཊེ་ཧ་ནེ་ཕ་ཧེན་སི་ཊིན་མཆོག་གིས་ལྷག་བསམ་གཡོ་བ་མེད་པའི་ཐོག་ནས་བོད་དོན་རྒྱབ་སྐྱོར་དང་ཞུ་གཏུག་གནང་བ་དེས་བོད་ཀྱི་རང་དབང་འཐབ་རྩོད་ཀྱི་རྒྱུད་རིམ་ནང་ཟུབ་ཐབས་མེད་པའི་ཤུལ་རྗེས་བཞག་ཡོད། ཅེས་དང་།

མཐར་དཔལ་ལྡན་སྲིད་སྐྱོང་མཆོག་གིས་ལྕམ་སྐུ་ཊེ་ཧ་ནེ་ཕ་ཧེན་སི་ཊིན་མཆོག་གི་ལྟོས་བཅས་ནང་མི་ལྷན་རྒྱས་དང་རྒྱབ་སྐྱོར་བ་ཡོངས་ལ་ཐུགས་གསོ་ཞུས་ཡོད་པ་བཅས།།