༄༅། །ཕྱི་ལོ་ ༢༠༢༣ ཟླ་བ་ ༩ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཕགས་ཡུལ་བཀྲ་ཤིས་ལྗོངས་གདན་ས་ཁམས་པ་སྒར་གྱི་བཤད་གྲྭ་ཁམས་སྒར་འབྲུག་མཐོ་སློབ་དྷརྨ་ཀཱ་རའི་རྟེན་དང་བརྟེན་པ་བཅས་གསར་བཞེངས་ལེགས་གྲུབ་བྱུང་བ་རབ་གནས་དབུ་འབྱེད་དང་བཀའ་སློབ་བཀའ་དྲིན་སྩལ་ཡོད།

དེ་ཡང་དབུ་འབྱེད་མཛད་སྒོའི་ཐོག་༧སྐྱབས་རྗེ་ཁམས་སྤྲུལ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་དུ་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག ཆེ་བསྟོད་སྐུ་མགྲོན་དུ་ཧི་མ་ཅལ་མངའ་སྡེའི་གྲོས་ཚོགས་ཀྱི་སྤྱི་ཁྱབ་དྲུང་ཆེ་ཀི་ཤོ་རི་ལལ་ (Shri Kishori Lal) མཆོག དེ་བཞིན་སྐུ་མགྲོན་དུ་བོད་མི་མང་སྤྱི་འཐུས་རྣམ་པ་དང་། ཆོས་རིག་དྲུང་ཆེ་འཆི་མེད་ཚེ་དབྱངས་ལགས། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ་སོགས་ཕེབས་ཞུགས་གནང་ཡོད་པ་རེད། 

བཤད་གྲྭ་གསར་པ་དབུ་འབྱེད་ཀྱི་མཛད་སྒོ་དང་འབྲེལ་ཏེ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། དེ་རིང་ཁམས་སྒར་འབྲུག་མཐོ་སློབ་དྷརྨ་ཀཱ་ར་འདི་ཉིད་རྟེན་དང་བརྟེན་པ་ལེགས་གྲུབ་ཀྱི་མཛད་སྒོར་སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་༸ཞབས་ཀྱིས་བཅགས་ཤིང་བྱིན་གྱི་རླབས་པའི་སྐལ་བཟང་དུས་བཟང་གི་ཉིན་མོ་འདིར་རྒྱལ་བ་མདོ་ཁམས་པའི་དབུས་པའི་མཁན་བླ་འདུས་མང་ཡོངས་ལ་བཀའ་ཤག་གིས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།

གོང་དུ་ཁམས་སྤྲུལ་རིན་པོ་ཆེ་མཆོག་གི་བཀའ་གནང་བ་ནང་ལྟར། མཐོ་སློབ་འདི་ལོ་ཤུ་སྔོན་ལ་ཟུར་འཛུགས་བསྐྱངས་པའི་རྨང་གཞིའི་ཐོག་ནས་བཞེངས་སྐྲུན་གནང་ཡོད། ཕྱི་ལོ་ ༢༠༡༠ ལོར་སློབ་གླིང་གསར་བཞེངས་སྐོར་རྒྱ་གར་གཞུང་ལ་དེབ་སྐྱེལ་གནང་སྟེ་རིམ་པས་ལས་གཞི་ཁག་ལག་བསྟར་གནང་བཞིན་པ་རེད། ཁམས་སྤྲུལ་རིན་པོ་ཆེ་སྐུ་ཐོག་གོང་མའི་མཛད་པ་རྣམ་ཐར་སྐོར་རིན་པོ་ཆེ་མཆོག་གིས་བཀའ་གནང་ཟིན་སྟབས་བསྐྱར་ལྡབ་ཞུ་མི་དགོས་པའི་ཐོག་ནས་སློབ་གླིང་འདི་ནས་བསླབ་པ་མཐར་སོན་མཁན་མི་ཉུང་བ་ཞིག་འབྲུག་དང་ཧི་མ་ལ་ཡའི་རི་རྒྱུད་ལ་ཕེབས་ཏེ་བསྟན་པའི་བྱ་བ་རླབས་ཆེན་སྒྲུབ་བཞིན་ཡོད། ཁག་ཅིག་སྒྲུབ་ཁང་དུ་ཕེབས་ཏེ་ཚེ་དང་སྒྲུབ་པ་མཉམ་པའི་ཉམས་ལེན་གནང་བཞིན་ཡོད། ལྷག་དོན་དུ་བོད་ལ་ཕེབས་མཁན་གང་འཚམ་ཞིག་བྱུང་ཡོད་ཚོད་འདུག་པས་ཁོང་རྣམ་པ་དང་། ཁོང་རྣམ་པར་མཐུན་རྐྱེན་དང་གོ་སྐབས་སྐྲུན་མཁན་གྱི་བླ་མ་རྣམ་པ་དང་དགེ་ལས་ཡོངས་ལ་རྗེས་སུ་ཡི་རངས་ཞུ་རྒྱུ་ཡིན། མཐོ་སློབ་འདིའི་སློབ་མས་ཡོང་ཁུངས་ལ་བལྟས་པ་ཡིན་ན་རྒྱ་ཆེན་པོ་ཡོད་པ་དང་། མ་འོངས་པར་རྒྱལ་སྤྱིའི་རང་བཞིན་ལྡན་པའི་གཙུག་ལག་སློབ་གཉེར་ཁང་ཞིག་ཏུ་འགྱུར་ཐུབ་པའི་རེ་བ་ཞུ་གི་ཡོད་ལ་སློབ་མ་སྐྱེད་སྲིང་གནང་བ་བརྒྱུད་ཁོང་རྣམ་པ་གང་ནས་ཡོང་བའི་ཡུལ་ཁམས་དེ་དག་ཏུ་རྒྱལ་བསྟན་རིན་པོ་ཆེ་དར་འཕེལ་ཡོང་བའི་སྨོན་འདུན་ཞུ་གི་ཡོད།

ཆོས་རིག་ལས་ཁུངས་ནས་ལོ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་རིས་མེད་ཆོས་སྡེ་ཁག་ལ་དམིགས་ནས་གཞུང་ཆེན་རིགས་གཅིག་རྐང་འཛིན་དང་། གཞུང་ཆེན་རིས་མེད་བགྲོ་གླེང་། དེང་དུས་ཚན་རིག་ཟབ་སྦྱོང་། བཙུན་མའི་དགུན་ཆོས། དགེ་བཤེས་མའི་ལས་གཞི་ཁག་ཅིག་སྤེལ་དང་སྤེལ་བཞིན་པ་དེ་དག་ནང་མཐོ་སློབ་འདི་ནས་མུ་མཐུད་མཉམ་ཞུགས་ཡོང་བའི་འབོད་སྐུལ་ཞུ་རྒྱུ་ཡིན།

ལོ་རྗེས་མའི་ཕྱི་ཟླ་ ༦ པའི་ནང་གཞུང་ཆེན་རིས་མེད་བགྲོ་གླེང་ཐེངས་དྲུག་པ་དེ་དགོན་པ་འདི་ག་རང་དུ་འཚོག་གཏན་འཁེལ་ཡོད། དེར་བརྟེན་མཐོ་སློབ་དང་བཙུན་དགོན་གཉིས་ནས་གོ་སྒྲིག་གནང་རྒྱུ་མཚོན་པས་མཉམ་ཞུགས་གནང་གི་རེད། རྒྱ་གར་སྦེང་ལོར་དུ་རྟེན་གཞི་བྱས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཚན་ཐོག་ལ་ཡོད་པའི་མཐོ་སློབ་བརྒྱུད་དགེ་འདུན་པ་ཁག་ཅིག་ནས་དེང་དུས་ཀྱི་འབུམ་རམས་པའི་སྦྱང་པ་མཐར་སོན་གྲབས་ཡོད། མཐོ་སློབ་འདི་ནས་ཀྱང་འདི་ལྟ་བུའི་གོ་སྐབས་ལེན་ཐུབ་པའི་རེ་བ་འཆང་གི་ཡོད།

ཆོས་རིག་ལས་ཁུངས་ཀྱི་ངོས་ནས་མ་འོངས་པར་དགོན་སྡེ་ཁག་གི་བསླབ་པ་མཐར་སོན་རིགས་ལ་དེ་རིགས་ཀྱི་འཆར་གཞི་སྒྲིག་བཞིན་པ་ཡིན་ཞུ་རྒྱུ་དང་། མཐའ་དོན་དེ་རིང་ཚོགས་མགོན་དུ་༸ཞབས་སོར་མཁོད་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བསྟན་ཅིང་མཛད་འཕྲིན་རྒྱས་པ་དང་། ཁམས་པ་སྒར་དང་མཐོ་སློབ་འདིའི་བླ་སློབ་ཐུགས་མཐུན་ཁྲིམས་གཙང་དང་བསྟན་པའི་བྱ་བ་ཡར་ངོའི་ཟླ་ལྟར་འཕེལ་བའི་སྨོན་ལམ་འདེབས་ཀྱི་ཡོད་ཅེས་གསུངས་ཡོད་པ་བཅས།།