༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་འགྲོ་ཕན་སྨན་རྩིས་ཁང་དང་། བཞུགས་སྒར་ཉེ་འཁོར་དགོན་སྡེ་ཁག་ཏུ་འཚམས་གཟིགས་སུ་ཕེབས་རྗེས་དྷ་ས་ཉེ་ཁུལ་གྱི་ཉིན་གྲངས་བཞིའི་འཚམས་གཟིགས་མཛད་འཆར་ཁག་ལེགས་པར་མཇུག་སྒྲིལ་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་འགྲོ་ཕན་སྨན་རྩིས་ཁང་དུ་ཕེབས་འབྱོར་སྐབས་སྨན་རྩིས་ཁང་གི་འགན་འཛིན་ཐུབ་བསྟན་ཚེ་རིང་ལགས་ཀྱིས་གཙོས་པའི་དགེ་ལས་སློབ་ཕྲུག་རྣམས་ནས་ཕེབས་བསུ་གཟབ་རྒྱས་ཞུས་ཐོག་སྨན་རྩིས་ཁང་གི་སྡེ་ཚན་ཁང་དང་། འཛིན་ཁང་དུ་གཟིགས་སྐོར་གནང་རྗེས་དགེ་ལས་སློབ་གཉེར་བ་རྣམས་ལ་དེང་གི་འཛམ་བུ་གླིང་ལ་བོད་ཀྱི་གལ་གནད་དང་། བོད་ཀྱི་ལོ་རྒྱུས་གནས་བབ་ཤེས་རྟོགས་དགོས་གལ། བོད་རྒྱའི་དཀའ་རྙོག དབུ་མའི་ལམ། བཀའ་ཤག་སྐབས་བཅུ་དྲུག་པའི་ལས་དོན་ཇི་བརྩམས་སོགས་ཀྱི་སྐོར་གསུང་བཤད་གསུང་ཡོད།
འགྲོ་ཕན་སྨན་རྩིས་ཁང་གི་འཚམས་གཟིགས་གྲུབ་མཚམས་དཔལ་ལྡན་སྲིད་སྐྱོང་མཆོག་སྔ་འགྱུར་རྙིང་མའི་བཙུན་དགོན་ཤུག་གསེབ་ཨོ་རྒྱན་རྫོང་དང་། འཇམ་དབྱངས་ཆོས་གླིང་། དཔལ་ཞ་ལུ་དགོན་པ། ཀརྨ་སྒྲུབ་བརྒྱུད་དར་རྒྱས་གླིང་བཅས་སུ་འཚམས་གཟིགས་བསྐྱངས་ཏེ་དགོན་པའི་ལས་སྣེ་ལྷན་མཇལ་མོལ་གནང་ཞིང་། ཉིན་རྒྱབ་རྡ་ས་ས་གནས་འགོ་འཛིན་ལས་ཁུངས་ཀྱི་ཚོགས་ཁང་དུ་དྷ་ས་མེག་གྷན་ཁུལ་གྱི་བོད་མི་རྣམས་ལ་བཀའ་ཤག་སྐབས་བཅུ་དྲུག་པའི་ལས་དོན་གནང་ཕྱོགས་དང་། གྲངས་ཐོ་ཉར་ཚགས་བྱ་རྒྱུའི་གལ་གནད་སྐོར་གསུངས་པ་མ་ཟད། བོད་མིའི་སྒྲིག་འཛུགས་ངོས་ནས་བོད་མི་ཁང་ཁྱིམ་མེད་པ་རྣམས་ལ་ས་ཁང་བགོ་འགྲེམས་གནང་རྒྱུའི་ལས་གཞི་དང་འབྲེལ་ཏེ། དྷ་ས་ཁུལ་དུ་གནས་སྡོད་བོད་མི་རྣམས་གཞིས་ཆགས་ཁག་ཏུ་གནས་སྤོ་གནང་འདོད་མེད་ན། སྔ་འཕྲོས་དྷ་ས་ཁུལ་དུ་བོད་མིའི་སྒྲིག་འཛུགས་ལ་དག་པའི་ས་ཆ་མེད་སྟབས། མ་འོངས་པར་ཁྲིམས་མཐུན་ཐོག་ནས་ས་ཆ་ཉོ་རྒྱུ་དང་ཁང་པ་བརྒྱབ་རྒྱུའི་ཆོག་མཆན་ཐོབ་མཚམས་མ་གཏོགས་དྷ་ས་ཁུལ་དུ་གནས་ཁང་སྤྲོད་ཐུབ་ཐབས་མེད་པ་དང་། ས་ཆ་མཁོ་ཉོ་བྱ་རྒྱུའི་ལས་གཞི་དེ་ཉིད་རྒྱ་ཆེན་པོ་ཡིན་སྟབས་ལོ་ཇི་ཙམ་འགོར་མིན་ཡང་བཤད་ཚོད་དཀའ་བ་ཡིན་སྐོར་གསལ་བཤད་ལམ་སྟོན་གནང་ཡོད།
འཚམས་གཟིགས་སྐབས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་ལྷན་དུ་ནང་སྲིད་དྲུང་འཕར་བསྟན་འཛིན་ནོར་བུ་ལགས་དང་། དྷ་ས་ས་གནས་འགོ་འཛིན་དཀོན་མཆོག་མིག་དམར་ལགས། རྡ་ས་ས་གནས་འཐུས་ཚོགས་ཀྱི་ཚོགས་གཙོ། ས་གནས་རང་བདེན་ཚོགས་ཆུང་གི་ཚོགས་མི། འབྲེལ་ཡོད་ལས་བྱེད་བཅས་ལྷན་བཅར་ཞུས་ཡོད་པ་བཅས།། 
