༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གོ་པལ་པུར་བོད་ཁྱིམ་སློབ་གྲྭ་དང་། ཅ་མུནྚ་ས་གནས་བོད་རིགས་ཚོང་པ། ས་རཱ་བོད་ཀྱི་མཐོ་རིམ་སློབ་གཉེར་ཁང་། གཏོང་ལེན་སློབ་གྲྭ་བཅས་སུ་འཚམས་གཟིགས་དང་འབྲེལ་བོད་དོན་འཐབ་རྩོད་སྐོར་གསུང་བཤད་གནང་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཙམ་ལ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གོ་པལ་པུར་བོད་ཁྱིམ་སློབ་གྲྭར་ཕེབས་འབྱོར་སྐབས་སློབ་གྲྭའི་སློབ་སྤྱི་གཙོས་པའི་དགེ་ལས་སློབ་ཕྲུག་རྣམས་ནས་ཕེབས་བསུ་གཟབ་རྒྱས་ཞུས་གྲུབ་མཚམས་སློབ་གྲྭའི་ཁྱིམ་ཚང་དང་། འཛིན་ཁང་ཁག་ཏུ་གཟིགས་སྐོར་གནང་ཡོད། དེ་རྗེས་དཔལ་ལྡན་སྲིད་སྐྱོང་མཆོག་གིས་སློབ་གྲྭའི་ཤེས་རབ་འོད་སྣང་ཚོགས་ཁང་དུ་དགེ་ལས་སློབ་ཕྲུག་རྣམས་ལ་གསུང་བཤད་གནང་སྐབས་བཙན་བྱོལ་ནང་དུ་བོད་ཁྱིམ་སློབ་གྲྭ་གསར་འཛུགས་གནང་བའི་བརྒྱུད་རིམ་དང་། བོད་ཁྱིམ་སློབ་གྲྭ་ནས་བོད་ནས་ཕེབས་པའི་སློབ་ཕྲུག་རྣམས་ལ་ཤེས་ཡོན་དང་། དགོས་ངེས་མཐུན་རྐྱེན་སྦྱར་རྒྱུར་ཐུགས་འགན་ཆེ་བཞེས་ཀྱིས་བོད་ཀྱི་གཞོན་སྐྱེས་གསོ་སྐྱོང་གང་ལེགས་གནང་ཡོད་སྐོར་གསུངས་པ་དང་སྦྲགས། བར་ལམ་ཕྱི་ལོ་ ༢༠༠༨ ནས་བཟུང་རྒྱ་ནག་གཞུང་གིས་བོད་ནང་དམ་བསྒྲགས་སྔར་ལྷག་ཆེ་རུ་བཏང་བར་བརྟེན་བོད་ནས་བྱེས་སུ་ཕེབས་མཁན་བོད་མིའི་གྲངས་འབོར་ཉུང་དུ་ཕྱིན་པ་དང་ཆབས་ཅིག སློབ་ཕྲུག་གི་གྲངས་འབོར་ཡང་རིམ་བཞིན་ཉུང་དུ་ཕྱིན་ཡོད་ཅེས་དང་། དེ་ལས་འཕྲོས་ཏེ་བཙན་བྱོལ་ནང་དུ་སློབ་ཕྲུག་གི་གྲངས་འབོར་ཉུང་དུ་འགྲོ་རྐྱེན་གཞན་རྣམས་ནི་ཕྱི་རྒྱལ་ཁག་ཏུ་གནས་སྤོ་བྱེད་མཁན་མང་དུ་ཕྱིན་པ་དང་། ཕྲུ་གུ་སྐྱེ་ཚད་ཉུང་དུ་ཕྱིན་པའི་རྐྱེན་གྱིས་ཡིན་ཚུལ་འགྲེལ་བརྗོད་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་རྣམས་ནས་རང་ཉིད་བོད་པ་ཡིན་པའི་འདུ་ཤེས་ལྡན་པའི་ཐོག རང་གི་རྒྱལ་ཁབ་ལ་རང་བཙན་མེད་སྟབས་གནས་སྟངས་མི་འདྲ་བའི་ཐོག་གནས་ཡོད་པ་ཤེས་དགོས་ཤིང་། དེ་ལྟར་བྱུང་ན་རང་ལ་ལས་འགན་འཕར་མ་ཞིག་ཡོད་སྙམ་པའི་བསམ་བློ་སླེབས་ལ། དེ་ནས་འབད་རྩོལ་འཕར་མ་བྱ་རྒྱུའི་སེམས་ཤུགས་སྐྱེ་ངེས་ཡིན་སྐོར་གསུངས་པ་མ་ཟད། བོད་ཕྲུག་རྣམས་ནས་བོད་མིའི་སྒྲིག་འཛུགས་ཀྱི་སྒྲོམ་གཞི་དང་ལས་དོན་བྱེད་ཕྱོགས། ངོ་བོ། དམིགས་ཡུལ། སྲིད་བྱུས་སོགས་ཀྱི་སྐོར་རྒྱུས་ལོན་བྱ་རྒྱུ་གལ་གནད་ཆེན་པོ་ཡིན་སྐོར་ལམ་སྟོན་གནང་། དེ་དང་འབྲེལ་ཏེ་སློབ་གཉེར་བ་རྣམས་འཛིན་རིམ་བཅུ་གཉིས་ཐོན་རྗེས་མཐོ་སློབ་འགྲིམས་སྐབས་རང་ཉིད་ནས་བོད་མིའི་མགྲིན་ཚབ་པ་བྱས་ཏེ་བོད་ཀྱི་གནད་དོན་སྐོར་འགྲེལ་བརྗོད་གནང་དགོས་པ་དང་། དེའི་ཆེད་རང་ཉིད་ནས་བོད་ཀྱི་གནད་དོན་རྟོགས་རྒྱུ་གལ་ཆེན་པོ་ཡིན་སྐོར་ལམ་སྟོན་གནང་བཞིན། བོད་དེ་ས་ཁམས་ཆབ་སྲིད་དང་། གོ་ལའི་ཁོར་ཡུག་ལ་གལ་གནད་ཇི་ཙམ་ཆེ་ཚུལ་ལས་བརྩམས་ཏེ་བོད་ཀྱི་ཆོས་དང་རིག་གཞུང་གིས་འཛམ་གླིང་ཞི་བདེ་དང་། འགྲོ་བའི་བདེ་དོན་ལ་ཕན་ཐོགས་ཇི་ཙམ་སྒྲུབ་ཚུལ་ངོ་སྤྲོད་གནང་ཡོད།
དེ་དང་ཕྱོགས་མཚུངས་སྲིད་སྐྱོང་མཆོག་ནས་བོད་ཀྱི་ལོ་རྒྱུས་ཀྱི་འཕེལ་རིམ་དང་། བོད་དང་རྒྱ་ནག་བར་གྱི་ལོ་རྒྱུས་ཀྱི་འབྲེལ་བའི་སྐོར་གསལ་སྟོན་གནང་བཞིན་ལོ་རྒྱུས་ཐོག་ནས་བོད་དེ་རྒྱ་ནག་གི་ཆ་ཤས་ནམ་ཡང་ཆགས་མེད་ཚུལ་དཔང་རྟགས་དང་བཅས་འགྲེལ་བརྗོད་གནང་བ་མ་ཟད། དེ་དང་འབྲེལ་ཏེ་རྒྱལ་སྤྱིའི་ཁྲིམས་རིག་མཁས་པ་མ་ཧི་ཀལ་ཝན་ཝལཊ་ཝན་པ་རག་ (Michael van Walt van Praag) ལགས་དང་། གཙུག་ལག་སློབ་དཔོན་ལའུ་ཁྲན་ལགས་ཀྱིས་བརྩམས་པའི་བོད་དང་འབྲེལ་བའི་ལོ་རྒྱུས་དཔེ་དེབ་གཉིས་ཀློག་དགོས་པའི་ལམ་སྟོན་གནང་ཡོད་པ་རེད།
གོ་པུར་བོད་ཁྱིམ་སློབ་གྲྭར་འཚམས་གཟིགས་གྲུབ་མཚམས་དཔལ་ལྡན་སྲིད་སྐྱོང་མཆོག་ནས་ཅ་མུནྚ་ས་གནས་བོད་རིགས་ཚོང་པ་རྣམས་དང་ཐུག་འཕྲད་ཀྱིས་བདེ་དོན་ཞུས་དོན་ཁག་ལ་གསན་བཞེས་གནང་བ་མ་ཟད། རིང་མིན་དེ་དོན་རྟོགས་ཞིབ་གནང་རྒྱུའི་ཞལ་བཞེས་གནང་ཡོད།
ཉིན་རྒྱབ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་བཞུགས་སྒར་ཉེ་འདབས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་འཚམས་གཟིགས་དང་འབྲེལ། མཐོ་སློབ་ཀྱི་དགེ་ལས་སློབ་ཕྲུག་རྣམས་ལ་བོད་དོན་སྤྱི་དང་། ཡང་སྒོས་རྒྱལ་སྤྱིའི་སྟེང་གི་བོད་དོན་གནས་ཚུལ་སྐོར་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་བཞེད་མཛད་ཅིང་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ངོ་སྤྲོད་དང་འབྲེལ། བཀའ་ཤག་སྐབས་བཅུ་དྲུག་པའི་ངོས་ནས་ལོ་རྒྱུས་ཐོག་བོད་དེ་རང་བཙན་ཡོད་པའི་རྒྱལ་ཁབ་ཅིག་ཏུ་ངོས་འཛིན་ཐོབ་ཐབས་བྱ་རྒྱུ་གལ་ཆེར་གཟིགས་ཏེ། དབུ་མའི་ལམ་གྱི་སྲིད་བྱུས་གཞི་བཞག་ཐོག་ཐབས་བྱུས་ལ་འགྱུར་བ་ཕྲན་བུ་བཏང་སྟེ་ལོ་རྒྱུས་ཐོག་བོད་རང་བཙན་ཡིན་པའི་གནས་བབ་ལ་ནན་བརྗོད་གནང་གི་ཡོད་པ་དང་། དེ་ལྟར་གནང་དགོས་དོན་ཡང་ཕྱོགས་གཅིག་ནས་རྒྱ་ནག་གཞུང་གིས་རྒྱལ་སྤྱིའི་སྟེང་བོད་ཀྱི་ལོ་རྒྱུས་འཁྱོག་བཤད་ལོག་འགྲེལ་བྱས་ཤུགས་ཆེ་དྲགས་ཏེ་རྒྱལ་སྤྱིའི་མི་མང་གིས་བོད་ནི་ལོ་རྒྱུས་ཐོག་ནས་རྒྱ་ནག་གི་ཆ་ཤས་ཡིན་ཤག་བསམ་པའི་ལོག་ཤེས་བསལ་རྒྱུ་དང་། ཕྱོགས་གཞན་ཞིག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བླ་ན་མེད་པའི་དགོངས་བཞེད་འོག་བོད་ཀྱིས་རང་བཙན་གནས་བབ་ནས་མིང་དོན་མཚུངས་པའི་རང་སྐྱོང་གནས་བབ་ལ་བབ་ཡོད་པའི་གོ་རྟོགས་སྤེལ་རྒྱུའི་ཆེད་ཡིན་སྐོར་གསུངས་ཡོད།
གཞན་ཡང་ཁོང་གིས་དེང་སྐབས་རྒྱ་ནག་ནང་སྲིད་གཞུང་གིས་མི་སེར་ཚོའི་འགྲོ་འཆག་ཉལ་འདུག་ལ་བྱ་ར་གསོ་ཉུལ་བྱས་ཏེ་དམ་བསྒྲགས་སྔར་ལྷག་གཏོང་བཞིན་པ་མ་ཟད། སྲིད་གཞུང་རང་ལ་ཆབ་སྲིད་དང་དཔལ་འབྱོར་ཐོག་ནས་དཀའ་ངལ་ཆེན་པོ་འཕྲད་ཀྱི་ཡོད་པའི་གནས་སྟངས་གསེད་བཀྲོལ་གནང་བའི་ཁར། དེང་གི་གོ་ལའི་ས་ཁམས་ཆབ་སྲིད་ཀྱི་འཕེལ་རིམ་དང་འགྱུར་ལྡོག་ངོ་སྤྲོད་དང་། དེའི་ཁྲོད་ནས་བོད་དོན་ཐོག་གོ་སྐབས་དམ་འཛིན་གནང་རྒྱུའི་འབད་རྩོལ་ཞུས་མུས་ཡིན་སྐོར་འགྲེལ་བརྗོད་གནང་རྗེས་དགེ་ལས་སློབ་གཉེར་བའི་དྲི་བར་ལན་འདེབས་གསལ་བཤད་གནང་ཡོད།
དེའི་རྗེས་དཔལ་ལྡན་སྲིད་སྐྱོང་མཆོག་ནས་ལམ་བར་དུ་གཏོང་ལེན་སློབ་གྲྭར་གཟིགས་སྐོར་དང་འབྲེལ་སློབ་གྲྭའི་སློབ་ཕྲུག་རྣམས་ལ་བོད་དང་རྒྱ་གར་བར་གྱི་ལོ་རྒྱུས་ཀྱི་འབྲེལ་བའི་སྐོར་ངོ་སྤྲོད་གནང་ཞིང་། སློབ་ཕྲུག་ཁག་ཅིག་ནས་ཧིནྡིའི་སྐད་ཐོག་རྟགས་གསལ་གཟིགས་འབུལ་ཞུས་ཏེ་དཔལ་ལྡན་སྲིད་སྐྱོང་མཆོག་གི་བཞུགས་སྒར་ཉེ་ཁུལ་འཚམས་གཟིགས་ཀྱི་ཉིན་གྲངས་གསུམ་པ་ལེགས་པར་མཇུག་སྒྲིལ་ཡོད་པ་བཅས།། 
