དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ (Inter-Parliamentary Alliance on China (IPAC)) ལྷན་ཚོགས་ཐོག་མཉམ་ཞུགས་གནང་བ།

གསར་ལས་ཁང་གི་གསར་འགོད་པས།

༢༠༢༣-༠༩-༠༧

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༩ པའི་ཚེས་ ༡ ནས་ ༢ བར་ཉིན་གྲངས་གཉིས་རིང་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཏུ་རྟེན་གཞི་བྱས་པའི་ཅེག་གྲོས་ཚོགས་གོང་འོག་གཉིས་སུ་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ (Inter-Parliamentary Alliance on China (IPAC)) ལྷན་ཚོགས་གོ་སྒྲིག་ཞུས་པའི་ཐོག་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གདན་ཞུས་ལྟར་མཉམ་ཞུགས་གནང་ཡོད་འདུག་པ་དང་།ཐེངས་འདིའི་ལྷན་ཚོགས་སྐབས་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ནང་ཧྥི་ལི་ཧྥན་ (Philippines) དང་། ཀེན་ཡ་ (Kenya) པཱེ་རཱ་ཀོའེ་ (Paraguay) བཅས་རྒྱལ་ཁབ་གསུམ་ཚོགས་མིའི་ཁོངས་གསར་ཞུགས་གནང་འདུག

དེ་ཡང་དཔལ་ལྡན་ཚོགས་གཞོན་མཆོག་ཕྱི་ཟླ་ ༨ པའི་ཚེས་ ༢༩ ཉིན་བཞུགས་སྒར་རྡ་ས་ནས་ལྡི་ལི་བརྒྱུད་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཏུ་ཕེབས་ཐོན་གནང་ཡོད་པ་རེད།

ཕྱི་ཟླ་ ༩ པའི་ཚེས་ ༡ ནས་ ༢ བར་རྒྱལ་ཁབ་ ༣༠ ཙམ་ནས་གྲོས་ཚོགས་འཐུས་མི་ཁྱོན་མི་གྲངས་ ༥༠ ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་འོག་གཉིས་སུ་ལྷན་འཛོམས་ཐོག་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ངོས་ནས་འདས་ལོའི་ནང་གི་ལས་དོན་ཐོག་གྲུབ་འབྲས་ཇི་བྱུང་དང་། གདོང་ལེན་ཇི་བྱས་ཐོག་བསམ་ཚུལ་བརྗེ་ལེན་དང་། དེ་བཞིན་རྒྱ་ནག་དམར་གཞུང་གིས་རྒྱ་སྐྱེད་རིང་ལུགས་ཀྱི་སྲིད་བྱུས་ཐོག་ནས་རྒྱལ་སྤྱིའི་ནང་ཁྲིམས་དང་། ཞི་བདེ། བདེ་འཇགས། རང་དབང་། མང་གཙོ་བཅས་ལ་ཉེན་ཁ་འདྲ་མིན་བཟོས་དང་བཟོ་བཞིན་པར་གདོང་ལེན་བྱེད་ཕྱོགས་ཀྱི་ཐབས་བྱུས་ཐོག་བགྲོ་གླེང་གནང་ཡོད་འདུག

ཐེངས་འདིའི་ཚོགས་འདུ་དེར་གཙོ་བོ་རྒྱ་ནག་དང་འབྲེལ་བའི་བརྗོད་གཞི་དྲུག་གི་ཐོག་བགྲོ་གླེང་གནང་ཞིང་། དེ་ཡང་ཐའེ་ཝན་དང་། བསྐྱར་གསོ་རུང་བའི་ཐོན་ཁུངས་གཞན་རྟེན། རྒྱལ་མཚམས་ལས་བརྒལ་བའི་དྲག་གནོན། ཧོང་ཀོང་། རྒྱུད་གཅིག་ལམ་གཅིག འགྲོ་བ་མིའི་ཐོབ་ཐང་བཅས་ཡིན་འདུག

རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ལྷན་ཚོགས་གསུམ་པ་དེ་བཞིན་ཚོགས་པའི་ཟུང་འབྲེལ་ཚོགས་གཙོ་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་འོག་མའི་འཐུས་མི་ལྕམ་སྐུ་ཨི་ཝ་ ཌི་ཁོ་རོག་སི་ (Rep. Eva Decroix) མཆོག་དང་། ཚོགས་པའི་ཟུང་འབྲེལ་ཚོགས་གཙོ་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་འཐུས་མི་སྐུ་ཞབས་པ་ཝེལ་ ཧྥི་སི་ཆར་ (Sen. Pavel Fischer) མཆོག་རྣམ་གཉིས་ནས་གཙོ་སྐྱོང་གནང་ཞིང་། དེ་ཡང་ཐོག་མར་ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་ཇན་ ཨི་པ་ཝི་སི་ཀཡེ་ (Jan Lipavsky, Foreign Minister of Czech Republic) མཆོག་གིས་ཕེབས་བསུའི་གསུང་བཤད་དང་སྦྲགས། ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཐོག་མ་སྐུ་ཞབས་་ཝི་སི་ལབ་ ཧཱ་ཝིལ་ (Vaclav Havel, first President of Czech Republic) མཆོག་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གཉིས་དབར་གྱི་འབྲེལ་བའི་སྐོར་ལ་གསུངས་རྗེས། ཚོགས་བཅར་བ་རྣམ་པ་སྡེ་ཚན་གསུམ་ལ་ཆ་བགོས་ཀྱིས་གོང་གི་བརྗོད་གཞི་དང་པོ་གསུམ་པ་བར་གྱི་ཐོག་གྲོས་བསྡུར་དང་། ཉིན་རྒྱབ་བརྗོད་གཞི་ལྷག་མ་གསུམ་གྱི་ཐོག་གྲོས་བསྡུར་གནང་ཡོད་འདུག

ཕྱི་ཟླ་ ༩ པའི་ཚེས་ ༢ ཉིན་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ཟུང་འབྲེལ་ཚོགས་གཙོ་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་འཐུས་མི་སྐུ་ཞབས་པ་ཝེལ་ཧྥི་སི་ཆར་མཆོག་གིས་ཐེངས་འདིའི་ཚོགས་འདུའི་པ་རག་གི་བསྒྲགས་གཏམ་ (Prague IPAC communique) གཏན་འབེབས་མ་གནང་བའི་སྔོན། བོད་མི་མང་སྤྱི་འཐུས་ལྷན་ཚོགས་དང་། ཧོང་ཀོང་རང་དབང་། རྒྱལ་སྤྱིའི་ཡུ་གུར་ལྷན་ཚོགས་བཅས་ཀྱི་སྐུ་ཚབ་རྣམ་པའི་དགོངས་འཆར་ཁག་གསན་ཡོད་ཅིང་། མཐར་ཐའེ་ཝན་གྲོས་ཚོགས་ཀྱི་ཚོགས་གཙོ་སྐུ་ཞབས་ཡུ་ཤིས་ཀུན་ (You Si-Kun, President of the Legislative Yuan of the Republic of China) མཆོག་གིས་དྲྭ་ཐོག་ནས་གསུང་བཤད་གནང་འདུག

སྐབས་དེར་དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། བོད་ནང་གི་ད་ལྟའི་ཛ་དྲག་གནས་སྟངས་ཐོག་གསུང་བཤད་གནང་ཡོད་ཅིང་། དེ་ཡང་གཙོ་བོ་གསུང་དོན། འཛམ་གླིང་རྒྱལ་ཁབ་ཁག་གིས་བོད་ཀྱི་དངོས་ཡོད་ལོ་རྒྱུས་ལ་རྒྱུས་མངའ་དང་གོ་རྟོགས་མེད་པའི་ཐོག་ནས་རྒྱ་ནག་དམར་གཞུང་གི་ལོག་འགྲེལ་ལ་ཡིད་ཆེས་བྱས་པ་དེས། རྒྱ་ནག་དམར་གཞུང་གིས་ལོ་རྒྱུས་ལ་འཁྱོག་བཤད་བྱས་ཏེ་བོད་ས་བཙན་བཟུང་བྱས་པ་ལྟར་ཉེ་འཁོར་ཁྱིམ་མཚེས་རྒྱལ་ཁབ་ཁག་གི་ས་ཁོངས་ཀྱང་དེ་ལྟར་ཧམ་བཟུང་བྱ་རྒྱུར་ཤུགས་རྐྱེན་སྤྲོད་ཀྱི་ཡོད། དེང་གི་དུས་སུ་འཛམ་གླིང་རྒྱལ་ཁབ་ཚང་མས་རྒྱ་དམར་གཞུང་ནི་མང་གཙོར་ཉེན་ཁ་ཆེ་ཤོས་ཡིན་པ་དེ་ཤེས་དགོས་པར་མ་ཟད། བོད་ཀྱི་གནད་དོན་དེ་ཧ་ཅང་གི་གལ་འགངས་ཆེན་པོ་ཞིག་ཀྱང་ཆགས་ཀྱི་ཡོད། དེར་བརྟེན། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེ་བཞིན་ཡུན་རིང་སེལ་མ་ཐུབ་པར་ལྷག་པའི་བོད་རྒྱའི་དཀའ་རྙོག་གི་ངོ་བོའི་ནང་འཇུག་རྒྱུའི་འབོད་སྐུལ་ཞུ་རྒྱུ་ཡིན་ཞེས་གསུངས་པ་དང་། དེ་བཞིན་རྒྱལ་སྤྱིའི་དབུ་ཁྲིད་རྣམ་པས་འཛམ་གླིང་སྤྱི་ལ་མཐོ་སྒང་བོད་ཀྱི་ཁོར་ཡུག་གི་གལ་གནད་རང་བཞིན་ལ་ངོས་འཛིན་དགོས་པར་མ་ཟད། མཉམ་འབྲེལ་རྒྱལ་ཚོགས་ནས་འཛམ་གླིང་གནམ་གཤིས་འགྱུར་ལྡོག་ལ་མཐོ་སྒང་བོད་ཀྱི་ཁོར་ཡུག་གི་གལ་གནད་དང་། ཤུགས་རྐྱེན་ཐོག་ཚན་རིག་དང་མཐུན་པའི་ཉམས་ཞིབ་གནང་དགོས་པའི་འབོད་སྐུལ་ཞུས་གནང་འདུག

གཞན་ཡང་འཛམ་གླིང་ནང་ཞི་བདེ་དང་། རང་དབང་། ཁྲིམས་དང་ལྡན་པ་ཞིག་ཡོང་ཐབས་སུ་རྒྱ་ནག་དམར་གཞུང་གི་འགོ་ཁྲིད་རྣམ་པ་འགན་ཁུར་ལྡན་པ་བཟོ་རྒྱུ་ནི་རྒྱ་དམར་འོག་སྡུག་སྦྱོང་མནར་གཅོད་མྱོང་མཁན་གྱི་ཁེ་ཕན་ཙམ་མ་ཡིན་པར། རྒྱ་རིགས་མི་མང་དང་། རྒྱ་ནག་གི་ཁེ་ཕན་ལའང་ཐུག་ཡོད་སྟབས། རྒྱལ་ཁབ་ཚང་མས་མཉམ་རུབ་ཀྱིས་འཛམ་གླིང་དེ་བཞིན་ཞི་བདེ་དང་། འཆམ་མཐུན་ལྡན་པ་ཞིག་ཡོང་ཐབས་གནང་དགོས་པ། དེ་བཞིན་རྒྱ་ནག་དམར་གཞུང་གིས་བོད་མིའི་ངོ་བོ་དང་། ཆོས་དང་རིག་གཞུང་། སྐད་ཡིག་བཀོལ་སྤྱོད་སོགས་ཀྱི་ཐོག་དམ་བསྒྲགས་ཤུགས་ཆེ་བྱེད་བཞིན་ཡོད་པ་སོགས་ཀྱི་སྐོར་གསུངས་རྗེས། མཐར་རྒྱལ་སྤྱིའི་གཞུང་དང་། གྲོས་ཚོགས་འཐུས་མི་རྣམ་པ། མི་མང་བཅས་ནས་བོད་ཀྱི་བདེན་པའི་འཐབ་རྩོད་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་འདུག

ཚོགས་འདུའི་ཞོར་དུ་དཔལ་ལྡན་ཚོགས་གཞོན་མཆོག་གིས་ཅེག་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་པེ་རིམ་སིལ་ ར་བྷ་སེ་ (Senator Premysl Rabas, Chair of Czech Parliament Tibet Group) མཆོག་དང་། ཚོགས་མི་གྲོས་ཚོགས་འོག་མའི་འཐུས་མི་ཧ་ཡ་ཊོ་ ཇོ་སིབ་ ཨོ་ཀ་མུ་ར་ (Hayato Josef Okamura, Member of Chamber of deputies) མཆོག དྲུང་ཆེ་གྲོས་ཚོགས་གོང་མའི་འཐུས་མི་ཀེ་ཊི་རི་ནཱ་ ཇེ་ཁུ་སི་ (Senator Katerina Jacques, Secretary of Czech Parliamentary Tibet Support Group) མཆོག བོད་དོན་རྒྱབ་སྐྱོར་བ་སྐུ་ཞབས་མར་ཊིན་ བྷུར་སིག་ (Mr. Martin Bursik, Supporter of Tibet) མཆོག བོད་དོན་རྒྱབ་སྐྱོར་བ་ཨི་ཌི་ཊ་ ཀེ་ལེག་ཀེ་རོ་ཝ (Edita Kleckerova Director of Lungta) མཆོག བོད་དོན་རྒྱབ་སྐྱོར་བ་གྷ་བྷེ་རི་ལ་ གྷ་ཛ་ཌི་ཀོ་ཝ་ (ProTibet Gabriela Gazdikova) མཆོག་བཅས་དང་ལྷན་མཇལ་འཕྲད་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་སྐོར་ངོ་སྤྲོད་དང་། བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་འདུག

དེ་བཞིན་དཔལ་ལྡན་ཚོགས་གཞོན་མཆོག་གིས་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ཚོགས་གཙོ་དང་། འཛིན་སྐྱོང་གནང་མཁན་གྱི་ཚོགས་མི་རྣམ་པས་ཁོང་ཉིད་བོད་མིའི་སྐུ་ཚབ་ཏུ་གདན་ཞུས་གནང་བར་ཐུགས་རྗེ་ཆེ་ཞུས་པ་དང་། འབྱུང་འགྱུར་ཡང་དེ་ལྟར་བོད་མིའི་སྐུ་ཚབ་མགྲོན་འབོད་གནང་རྒྱུའི་འབོད་སྐུལ་ཞུས་གནང་འདུག་ཅིང་། སྐབས་དེར་ཚོགས་པའི་འཛིན་སྐྱོང་གནང་མཁན་ཚོགས་མི་དང་། གཞན་ཚོགས་མི་རྣམ་པས་དཔལ་ལྡན་ཚོགས་གཞོན་མཆོག་ད་རེས་ཚོགས་བཅར་དུ་ཕེབས་པར་བསྔགས་བརྗོད་ཞུས་གནང་འདུག

རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ཚོགས་འདུ་ལེགས་པར་གྲུབ་རྗེས། དཔལ་ལྡན་ཚོགས་གཞོན་མཆོག་ཕྱི་ལོ་ ༢༠༢༣ ཟླ་ ༩ པའི་ཚེས་ ༥ ཉིན་བཞུགས་སྒར་རྡ་སར་ཕེབས་འབྱོར་བྱུང་ཡོད་འདུག་པ་བཅས། །