༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༩ ཚེས་ ༢༦ ཉིན་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་སྤྱི་འཐུས་རྒྱུན་ལས་ཚོགས་ཁང་ནང་ཁེ་ན་ཌར་རྟེན་ཞི་བྱས་པའི་དྲ་རྒྱའི་བདེ་འཇགས་ཚོགས་པ་ (Zeropoint Security Corp) ཞེས་པའི་སྤྱི་ཁྱབ་འགན་འཛིན་སྐུ་ཞབས་ར་ཧྥལ་ རོ་ཧོ་ཛིན་སི་ཀི་ (Rafal Rohozinski) མཆོག་དང་ལྷན་མཇལ་འཕྲད་གནང་སོང་།

མཇལ་འཕྲད་སྐབས་སྐུ་ཞབས་ར་ཧྥལ་ རོ་ཧོ་ཛིན་སི་ཀི་མཆོག་གིས་ (Zeropoint Security Corp) ཞེས་པའི་དྲ་རྒྱའི་བདེ་འཇགས་ཚོགས་པའི་ངོས་ནས་བོད་མིའི་སྒྲིག་འཛུགས་ཀྱི་དྲ་རྒྱ་བདེ་འཇགས་ཡོང་ཐབས་ཐོག་མཉམ་རུབ་ཀྱི་ལས་གཞི་འགྲོ་བཞིན་ཡོད་པའི་སྐོར་ངོ་སྤྲོད་དང་སྦྲགས། དྲ་རྒྱའི་བདེ་འཇགས་ཀྱི་གལ་གནད་དང་། དེ་བརྒྱུད་བོད་ཀྱི་སྐད་ཡིག་དང་། རིག་གཞུང་། བོད་ཀྱི་གནད་དོན་སྲུང་སྐྱོབ་བྱ་རྒྱུའི་སྐོར་གསུངས་པ་དང་། དཔལ་ལྡན་ཚོགས་གཞོན་མཆོག་གིས་བོད་མིའི་སྒྲིག་འཛུགས་ཀྱི་ལས་འཆར་འོག བོད་མི་མང་སྤྱི་འཐུས་ལྷན་ཚོགས་ནས་ཀྱང་ (e-parliament) ཡི་བརྒྱུད་རིམ་མཁྱེན་རྟོགས་སླད་ཧི་མ་ཅལ་མངའ་གཞུང་གི་གྲོས་ཚོགས་ལ་ཕེབས་ཡོད་པའི་སྐོར་དང་། དེ་བཞིན་བོད་མིའི་སྒྲིག་འཛུགས་དང་། བོད་མི་རྣམས་དྲ་རྒྱའི་ཉེན་ཁ་ལས་སྲུང་སྐྱོབ་སླད་ (Zeropoint Security Corp) ངོས་ནས་བོད་མིའི་སྒྲིག་འཛུགས་ཀྱི་ཀམ་པུ་ཊར་སྡེ་ཚན་གྱི་དྲ་རྒྱའི་བདེ་འཇགས་སྲུང་སྐྱོབ་ཀྱི་ནུས་པ་གོང་མཐོར་གཏོང་དགོས་གལ་སོགས་ཀྱི་ཐོག་གསུངས་གནང་སོང་།གཞན་ཡང་དཔལ་ལྡན་ཚོགས་གཞོན་མཆོག་གིས་སྐུ་ཞབས་ཁོང་གྲོས་ཚོགས་ཀྱི་ཚོགས་ཁང་ནང་གཟིགས་སྐོར་སྣེ་ཁྲིད་དང་སྦྲགས་བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་སྐོར་ངོ་སྤྲོད་སྙིང་བསྡུས་ཞུས་གནང་ཡོད་པ་བཅས། །