༄༅། །ཕྱི་ལོ་ ༢༠༢༣ ཟླ་ ༩ ཚེས་ ༢༢ ཉིན་རྒྱབ་ཚུ་ཆོད་ ༣ པའི་ཐོག་ཉི་འོང་གི་གཞུང་འབྲེལ་མིན་པའི་ཚོགས་པ་རེ་བའི་མེ་ལྕེའི་ཚོགས་གཙོ་ནང་པའི་བླ་མ་རུ་ཀྱོ་ཨིན་ཊོ་ (Ryoko Endo) ལགས་དང་ཚོགས་མི་ཁག་ཅིག་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་སུ་འཚམས་གཟིགས་གནང་ཡོད་། ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་མཇལ་དར་སྒྲོན་ཏེ་དོན་ཁང་དུ་ཕེབས་བསུ་དང་། དེ་ནས་དོན་ཁང་གི་ཆོས་ཁང་དུ་གདན་ཞུས་རྗེས་ཕན་ཚུན་ངོ་སྤྲོད་དང་རེ་བའི་མེ་ལྕེའི་ཚོགས་པའི་དམིགས་ཡུལ་དང་ད་ཐེངས་ཐའེ་ཝན་དུ་ཕེབས་དགོས་པའི་དགོས་དམིགས་སོགས་འགྲེལ་བརྗོད་གནང་ཡོད།
དོན་གཅོད་ལས་ཁུངས་ནས་ཀྱང་ཚོགས་པའི་ཚོགས་གཙོ་དང་ཚོགས་མི་རྣམ་པ་དེ་སྔ་རྡ་སར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་བཅར་དང་། བོད་མིའི་སྒྲིག་འཛུགས་ཀྱི་དཔལ་སྲིད་སྐྱོང་མཆོག་ལ་མཇལ་འཕྲད་སོགས་ཞུས་པ་བཅས་ཉི་འོང་བོད་ཀྱི་སྐུ་ཚབ་དོན་གཅོད་ལས་ཁུངས་ནས་ངོ་སྤྲོད་གནང་སོང་བ་དང་གཙོ་བོ་ཚོགས་པའི་དམིགས་ཡུལ་མ་འོངས་འཛམ་གླིང་ཞི་བདེ་བསྐྲུན་ཐབས་ལ་འབད་བརྩོན་གནང་རྒྱུ་ཡིན་སྟབས། ཐའེ་ཝན་དོན་ཁང་ནས་ཀྱང་གལ་ཆེ་དོན་ཆེར་རྩིས་ཏེ་ཐའེ་སྡོད་བོད་རིགས་ཚོགས་པའི་ཚོགས་གཙོ་སྐུ་ཞབས་བཀྲ་ཤིས་ཚེ་རིང་ལགས་དང་། ཚོགས་གཞོན་བསྟན་འཛིན་རྣམ་དག་ལགས་གཉིས་ཀྱང་ཆེད་དུ་གདན་འདྲེན་ཞུས་ཡོད་བཅས་ངོ་སྤྲོད་ཞུས། 
དེ་ནས་ཐའེ་སྡོད་བོད་རིགས་ཚོགས་པའི་ཚོགས་གཙོ་དང་ཚོགས་གཞོན་རྣམ་གཉིས་ནས་ཀྱང་ཐའེ་ཝན་དུ་ལས་དོན་དང་ལས་འགུལ་ཇི་སྤེལ་ཐད་འགྲེལ་བརྗོད་ངོ་སྤྲོད་གནང་། རེ་བའི་མེ་ལྕེ་ཚོགས་པའི་ཚོགས་གཙོ་ནང་པའི་བླ་མ་རུ་ཀྱོ་ཨིན་ཊོ་མཆོག་ནས་ད་ལན་ཐའེ་ཝན་དང་སྐུ་ཚབ་དོན་གཅོད་ལས་ཁུངས་སུ་ངོ་བཅར་ཞུས་དགོས་དོན་དམིགས་ཡུལ་གཙོ་བོ་དེ་བཞིན་ཚོགས་པའི་ངོས་ནས་རིང་མིན་ཐའེ་ཝན་ནང་དུ་རེ་བའི་མེ་ལྕེའི་གཞི་རྒྱ་ཆེ་བའི་ལས་འགུལ་ཞིག་སྤེལ་ཐབས་ཀྱི་གྲ་སྒྲིག་ཞུ་བཞིན་ཡོད་པ་དང་། ལས་འགུལ་གྱི་དབུ་འབྱེད་མཛད་སྒོའི་ཐོག་ཐའེ་ཝན་གྱི་གནད་ཡོད་མི་སྣ་གང་མང་དང་། རྒྱ་གར་ནས་བདག་ཉིད་ཆེན་པོ་གྷན་ངྷི་མཆོག་གི་སྐུ་ཚབ་སོགས་གདན་འདྲེན་ཞུ་འཆར་སོགས་ལས་འགུལ་སྤེལ་ཕྱོགས་ངོ་སྤྲོད་དང་། བོད་ཀྱི་སྐུ་ཚབ་དོན་གཅོད་ནས་ཀྱང་གདན་ཞུས་གནང་སྐབས་གཙོ་བོ་ཐའེ་སྡོད་བོད་རིགས་ཚོགས་པའི་ཚོགས་གཙོ་ཚོགས་གཞོན་རྣམ་གཉིས་ལས་འགུལ་སྤེལ་བར་ཉམས་མྱོང་ཕུན་སུམ་ཚོགས་པ་ཡོད་སྟབས། ཁོང་ཚོ་གཙོས་གཞུང་འབྲེལ་མིན་པའི་ཚོགས་པ་དང་འབྲེལ་བ་གནང་དགོས་གལ་ཆེ་ཡིན་པ་དང་། རྣམ་པ་ཚོས་ལས་འགུལ་དེ་བཞིན་ཆབ་སྲིད་གཞན་དག་དང་མཉམ་བསྲེས་མིན་པར། འཛམ་གླིང་ཞི་བདེ་སྐྲུན་རྒྱུའི་ཆེད་དུ་ཡིན་ན་དེ་ནས་༧སྐུ་མདུན་གྱི་དགོངས་པ་དང་མཐུན་གྱི་ཡོད་སྟབས་མཐུན་འགྱུར་གང་ཐུབ་ཞུ་ཆོག་ཅེས་གསུངས་རྗེས། ཚང་མར་མཇལ་དར་རེ་ཕུལ་ཏེ་དྲན་རྟེན་གྱི་སྐུ་པར་མཉམ་སྒྲོན་ཞུས། 
གཞན་ཡང་ཕྱི་ལོ་ ༢༠༢༣ ཟླ་ ༩ ཚེས་ ༢༡ ཉིན་རྒྱབ་ཚོུད་ ༤ པའི་ཐོག་ཐའེ་ཝན་གཞུང་ནས་གཉེར་བའི་བོད་ཀྱི་རིག་གཞུང་སྒྱུ་རྩལ་དུས་ཆེན་ཐོག་མཉམ་ཞུགས་གནང་མཁན་བོད་ཀྱི་ཟློས་སྒར་གྱི་སྒྱུ་རྩལ་བ་ཟུར་པ་བཀྲས་ཆུང་ལགས་དང་པ་སངས་ལྷ་མོ་ལགས་གཙོས་པའི་རིག་གཞུང་འཁྲབ་སྟོན་པ་ཁག་ཅིག་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་སུ་ཆེད་བཅར་སྐབས། སྐུ་ཚབ་དོན་གཅོད་ནས་དགའ་བསུའི་མཇལ་དར་ཕུལ་ཏེ་དོན་ཁང་གི་ལས་བྱེས་དང་ལས་དོན། ཕུག་དམིགས་སོགས་ངོ་སྤྲོད་ཞུས་རྗེས། དོན་ཁང་གི་ཆོས་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲི་དང་སྟོན་པའི་སྐུ་བརྙན་སོགས་ལ་ཆོས་མཇལ་འཁྲིད་པ་མ་ཟད། དོན་ཁང་ངོས་ནས་ཁོང་རྣམ་པ་ཐའེ་ཝན་དུ་ཕེབས་པར་དགའ་བསུའི་དགོང་ཚིགས་ཞིག་ཀྱང་འདེགས་འབུལ་ཞུས་ཡོད། སྒྱུ་རྩལ་བ་ཁོང་རྣམ་པ་ནི་ད་ཐེངས་ཐའེ་ཝན་རིག་གཞུང་ལྷན་ཁང་ནས་ཕྱི་ལོ་ ༢༠༢༣ ཟླ་ ༩ ཚེས་ ༢༣ ནས་ ༢༤ བར་ཉིན་གཉིས་རིང་ཐའེ་ཝན་ནས་བོད་ལ་གཟིགས་ཟེར་བའི་བོད་ཀྱི་རིག་གཞུང་སྒྱུ་རྩལ་དུས་ཆེན་ལ་བོད་ཀྱི་སྲོལ་རྒྱུན་རོལ་དབྱངས་དང་། གཞས་དང་ཞབས་བྲོ་འཁྲབ་སྟོན་ཆེད་དམིགས་བསལ་གཞུང་འབྲེལ་མགྲོན་འབོད་ཞུས་པ་རེད་འདུག་པ་དང་། ཉིན་དང་པོའི་སྐུ་མགྲོན་དུ་ཨ་རི་དང་རྒྱ་གར་གྱི་གཞུང་ཚབ་གཞོན་པ་གཙོས་ཕྱི་ནང་གི་སྐུ་མགྲོན་མང་པོ་གདན་འདྲེན་ཞུས་པའི་ནང་། སྐུ་ཚབ་དོན་གཅོད་ཀྱང་ཉིན་དང་པོའི་གཟིགས་མོར་མཉམ་ཞུགས་གནང་ཡོད་པ་བཅས། །
