༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༡༢ ཉིན་ཉི་འོང་གི་ཛེན་ནང་པའི་ཆོས་བརྒྱུད་འཛིན་པའི་དགོན་སྡེ་ཁག་དགུའི་འཐུས་མི་རྣམ་པས་བོད་ནང་གི་འགྲོ་བ་མིའི་ཐོབ་ཐང་གནས་བབ་ལ་ཐུགས་འཚབ་དང་སྦྲགས། དོན་ཚན་བདུན་འཁོད་པའི་བསྒྲགས་གཏམ་ཞིག་སྤེལ་ཏེ་རྒྱ་ནག་གཞུང་ནས་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་གཏོང་མཚམས་འཇོག་དགོས་པའི་རེ་སྐུལ་གནང་ཡོད།

དེ་ཡང་ཇོ་རན་ཇི་དགོན་པའི་ (Jorinji Temple) དགེ་འདུན་པ་ཧ་ཡ་ཤི་ཤུ་ཧི་ (Hayashi Shuei) ལགས་གཙོས་པའི་ཀྲོག་ཡོ་དང་། ན་ག་ནོ། ཨི་བ་ར་གི་མངའ་ཁུལ་གྱི་དགོན་ཁག་དགུའི་སྐུ་ཚབ་ཚོགས་ཆུང་ཞིག་ཉི་འོང་སྐུ་ཚབ་དོན་ཁང་དུ་ཆེད་ཕེབས་ཀྱིས་བསྒྲགས་གཏམ་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་སུ་གནང་སྟེ། སྐུ་ཚབ་ཚོགས་ཆུང་གི་འགོ་ཁྲིད་ཧ་ཡ་ཤི་ཤུ་ཧི་ལགས་ནས་རྒྱ་ནག་གཞུང་གིས་བོད་མིའི་ཆོས་དད་རང་དབང་ལ་ཐེ་བྱུས་བྱེད་པ་ནི་བཟང་སྤྱོད་དང་འགལ་བ་མ་ཟད་རྒྱལ་སྤྱིའི་ནང་པ་ཡོངས་ནས་ངོས་ལེན་བྱེད་ཐབས་བྲལ་ཞིང་། ཁོང་རང་རང་དབང་ལུང་པའི་ནང་གི་ནང་པ་ཞིག་ཡིན་པའི་ཆ་ནས་བོད་དང་བོད་མིའི་ཆོས་དད་རང་དབང་ཆེད་འཐབ་རྩོད་བྱ་རྒྱུ་དེ་ཁོང་གི་འགན་ཡིན་ཞེས་གསུངས། དེ་བཞིན་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེངས་འགའ་ཤས་མཇལ་རྒྱུའི་གོ་སྐབས་བྱུང་བ་མ་ཟད། མགོན་པོ་མཆོག་ཁོང་གི་སློབ་གྲྭར་ཕེབས་ཏེ་དགེ་ལས་སློབ་ཕྲུག་རྣམས་ལ་བྱམས་སྙིང་རྗེའི་སྐོར་བཀའ་སློབ་གནང་བས་ཕན་རླབས་ཆེན་པོ་བྱུང་ཞེས་གསུངས་ཡོད།གཞན་ཡང་སྐུ་ཚབ་ཚོགས་ཆུང་གི་ཚོགས་མི་རྣམས་ནས་རྒྱ་ནག་གཞུང་གི་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པ་དེར་ངོས་ལེན་བྱེད་ཐབས་མེད། གང་ཡིན་ཞེ་ན། རྒྱ་ནག་དམར་ཤོག་ཚོགས་པས་ཆོས་ཀྱི་རྣམ་གཞག་སྤྱི་དང་ཡང་སྒོས་སྐྱེ་བ་སྔ་ཕྱིའི་སྐོར་གང་ཡང་ཤེས་ཀྱི་མེད་ཅེས་གསུངས་པའི་ཐོག རིང་མིན་ཁོང་རྣམས་བོད་ཀྱི་ཆོས་དད་རང་དབང་ལ་རྒྱབ་སྐྱོར་མཚོན་ཆེད་བཞུགས་སྒར་རྡ་རམ་ས་ལར་ཆེད་ཕེབས་གནང་འཆར་ཡོད་སྐོར་གསུངས།

ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ནས་ཁོང་རྣམས་ནས་བོད་དོན་ལ་རྒྱབ་སྐྱོར་གྱི་བསྒྲགས་གཏམ་སྤེལ་བར་ཐུགས་རྗེ་ལེགས་འབུལ་ཞུས་ཏེ། བོད་ནང་གི་ཛ་དྲག་གནས་སྟངས་དང་། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་གཏོང་བྱུས་བྱེད་བཞིན་པའི་གནས་སྟངས་གསལ་བཤད་གནང་ཡོད། ཐེངས་འདིའི་གནད་དོན་དེ་བཞིན་ཉི་འོང་ནང་པའི་ཚགས་པར་བྷུག་ཀྱོའི་དུས་བབ་ (Bukkyo Times) ཅེས་པས་གནས་ཚུལ་འདོན་སྤེལ་དང་། དགེ་འདུན་པ་ཧ་ཡ་ཤི་ལགས་དང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་སུ་བཅར་འདྲི་གནང་ཡོད།

བསྒྲགས་གཏམ་ནང་འཁོད་དོན་ཚན་བདུན་ནི།

༡) ང་ཚོས་རྒྱ་ནག་གཞུང་ངོས་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་དོན་ཚན་ ༤ དགོངས་དོན་བོད་མི་རྣམས་ལ་མིང་དོན་མཚུངས་པའི་རང་སྲིད་རང་སྐྱོང་གི་ཁེ་དབང་སྤྲོད་དགོས་པའི་འབོད་སྐུལ་ཞུ་རྒྱུ།
༢) ང་ཚོས་རྒྱ་ནག་གཞུང་ངོས་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རང་སྐྱོང་དང་མི་རིགས་ས་གནས་དང་འབྲེལ་བའི་ཁྲིམས་ཡིག་གི་དོན་ཚན་ ༡༠ དང་ ༡༡ ནང་གྲངས་ཉུང་མི་རིགས་ཀྱི་སྐད་དང་ཆོས་ལུགས་རང་དབང་སྐོར་གསལ་བ་དེ་ཉིད་ལག་བསྟར་བྱ་དགོས་པའི་འབོད་སྐུལ་ཞུ་རྒྱུ།
༣) ང་ཚོས་རྒྱ་ནག་གཞུང་ལ་པཎ་ཆེན་རིན་པོ་ཆེ་དང་ཁོང་གི་སྐུ་འཁོར་ནང་མི་ལྷན་རྒྱས་གང་དུ་ཡོད་མེད་གསལ་བཤད་དང་འཕྲལ་དུ་གློད་བཀྲོལ་གཏོང་བའི་འབོད་སྐུལ་ཞུ་རྒྱུ།
༤) ང་ཚོས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ། བོད་ཀྱི་སྐད་དང་། རིག་གཞུང་། ངོ་བོ་བཅས་པ་རྒྱ་ནག་ཅན་དུ་བསྒྱུར་རྒྱུའི་སྲིད་བྱུས་ལ་སྐྱོན་བརྗོད་བྱ་རྒྱུ།
༥) ང་ཚོས་རྒྱ་ནག་གཞུང་གིས་ཆོས་ལུགས་ལ་སྡངས་འཛིན། བོད་ཀྱི་དགོན་པ་དང་སྐུ་འདྲ་གཏོར་བཅོམ། བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོ་དང་དགོན་པའི་འཛིན་སྐྱོང་ལ་ཐེ་བྱུས་བྱེད་པ་སོགས་བོད་ཀྱི་ཆོས་ལུགས་གནད་དོན་ལ་ཐེ་གཏོགས་བྱེད་བཞིན་པར་སྐྱོན་བརྗོད་བྱ་རྒྱུ།
༦) ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་སྒོ་ནི་བོད་མི་དང་། སྐུ་སྒེར་ཡིག་ཚང་གི་དབང་ཚད་ཡིན་པ་ངོས་འཛིན་དང་། ཉི་འོང་ནང་དུའང་ཕྱི་ལོ་ ༢༠༢༠ ལོའི་ཨ་རིའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་ཡིག་ནང་གི་བརྗོད་དོན་དེ་མཚུངས་ཤིག་གཏན་འབེབས་གནང་བའི་འབོད་སྐུལ་ཞུ།
༧) སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གཙོས་པའི་བོད་ཀྱི་བླ་སྤྲུལ་རྣམ་པའི་མ་འོངས་ཡང་སྲིད་བོད་མི་རྣམས་ནས་ཆོས་ཕྱོགས་ཀྱི་གནང་སྒོ་གཞིར་བཟུང་ངོས་འཛིན་གནང་རྒྱུ་དང་། རྒྱལ་སྤྱིའི་མི་མང་ནས་རྒྱ་ནག་གཞུང་གིས་ངོས་འཛིན་བསྐོ་བཞག་བྱས་པའི་བླ་མ་སུ་ལའང་ངོས་འཛིན་གནང་སྐྱོང་མི་ཡོང་བའི་རེ་སྐུལ་ཞུ།