༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཞི་བའི་ཚལ་གྱི་དགེ་འཕེལ་གླིང་ཕོ་བྲང་ནས་འདི་ལོར་རྒྱ་ནག་ཐེ་བའི་འཛམ་གླིང་ཡུལ་གྲུ་གང་སར་རང་བྱུང་གི་རྐྱེན་ངན་གོད་ཆགས་སྔ་ཚོགས་ཤིག་བྱུང་བར་ཐུགས་གསོ་མཛད་ཡོད་པ་རེད།
དེ་ཡང་གསུང་འཕྲིན་ནང་མགོན་པོ་གང་ཉིད་མཆོག་གིས། འདི་ལོར་འཛམ་གླིང་ས་ཕྱོགས་གང་སར་རང་བྱུང་གི་རྐྱེན་ངན་གོད་ཆགས་གཅིག་རྗེས་གཉིས་མཐུད་ནས་བྱུང་ཡོད་ལ། རང་བྱུང་གི་གོད་ཆགས་ཆུ་ལོག་དང་། མེ་སྐྱོན། རླུང་འཚུབ་སོགས་ལ་བརྟེན་ནས་མི་རྒྱུ་ཟོག་གསུམ་དང་ཁོར་ཡུག་ལ་གནོད་སྐྱོན་ཚབས་ཆེ་བྱུང་ཡོད་པ་དེ་ནི་གོ་ལའི་ཚ་དྲོད་འཕར་བའི་རྐྱེན་གྱིས་ང་ཚོར་ཤུགས་རྐྱེན་སྤྲོད་ཀྱི་ཡོད་པ་གསལ་པོ་རེད།
དེ་རིང་སྔ་དྲོ་ངོས་ཀྱིས་ཤེས་ཡོན་ཅན་གྱི་མི་སྣ་ཁག་ཅིག་དང་ཐུག་འཕྲད་སྐབས་དེ་ལྟ་བུའི་རང་བྱུང་གི་ཆག་སྒོ་འཛམ་གླིང་ས་ཁུལ་འདྲ་མིན་དུ་བྱུང་སྐབས་ངོས་ཀྱིས་གནོད་སྐྱོན་འཕོག་མཁན་རྣམས་ལ་སེམས་གསོ་དང་། གང་ཐུབ་ཀྱིས་རོགས་རམ་བྱ་རྒྱུའི་འབད་རྩོལ་ཞུ་གི་ཡོད་ཅེས་བཤད་པ་ཡིན།
ཉེ་ལམ་རྒྱ་ནག་བྱང་ཕྱོགས་དང་བོད་ཀྱི་ས་ཁུལ་ཁག་ཅིག་ཏུ་ཆུ་ལོག་གིས་རྐྱེན་བྱས་ཏེ་མི་ཤི་སྐྱོན་ཆག་དང་། རྒྱུ་ཟོག རང་བྱུང་སྣོད་བཅུད་ལ་དོ་ཕོག་ཆེན་པོ་བྱུང་འདུག གོད་ཆགས་དེའི་ཁྲོད་རྐྱེན་འདས་སུ་འགྲོ་མཁན་རྣམས་ལ་བསྔོ་སྨོན་དང་། གནོད་སྐྱོན་འཕོག་མཁན་རྣམས་ལ་སེམས་གསོ་ཞུ་རྒྱུ་ཡིན། ང་ཚོ་ཚང་མ་འགྲོ་བ་མི་ཡིན་པས་ཚང་མ་བདེ་བ་འདོད་ཅིང་སྡུག་བསྔལ་མི་འདོད་པ་ཤ་སྟག་ཡིན་སྟབས། འགྲོ་བ་མི་རིགས་གཅིག་གྱུར་གྱི་འདུ་ཤེས་ལྡན་པའི་ཐོག་ཚང་མར་ཕན་ཚུན་རོགས་སྐྱོར་ཕན་གྲོགས་བྱ་རྒྱུའི་འོས་འགན་ཡོད། དུས་སྐབས་འདིར་ཡང་ངོས་ཀྱིས་རྒྱ་ནག་མི་མང་ལ་གདུང་སེམས་མཉམ་སྐྱེ་མཚོན་ཆེད་ངལ་སེལ་རོགས་སྐྱོར་སླད་ཞལ་འདེབས་འབུལ་ཐུབ་པའི་རེ་བ་རྒྱག་གི་ཡོད།
གནས་སྟངས་འདི་ལྟ་བུའི་སྐབས་ངོས་ཀྱིས་འཛམ་གླིང་ནང་གི་ཆོས་གྲོགས་ཕོ་མོ་རྣམས་ནས་རང་བྱུང་གོད་ཆགས་ཀྱི་གནོད་སྐྱོན་ཕོག་མཁན་རྣམས་ལ་བསྔོ་སྨོན་དང་། གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་སུ་ཐབས་ཤེས་ཡོད་དགུ་རྩལ་སྤྲུག་འདོན་གནང་ཡོང་བའི་རེ་སྐུལ་ཞུ་རྒྱུ་ཡིན། ཞེས་བཀའ་སྩལ་ཡོད་པ་བཅས།།
